സാംസങ് ഗാലക്സി S26 ഉപയോക്താക്കൾക്ക് വമ്പൻ അപ്‌ഡേറ്റ്; വൺ യുഐ 9 ഇന്ത്യയിൽ ലഭ്യമായിത്തുടങ്ങി, ഉടൻ ചെയ്യേണ്ടത് ഇതാണ്

സാംസങ്ങിന്റെ ഏറ്റവും പുതിയ വൺ യുഐ 9 (One UI 9) സ്റ്റേബിൾ അപ്‌ഡേറ്റ് ഇന്ത്യയിൽ ലഭ്യമായിത്തുടങ്ങി. ഗാലക്സി S26, S26+, S26 അൾട്രാ ഉപയോക്താക്കൾക്ക് സെപ്റ്റംബർ 30 ആയ ഇന്നുമുതൽ അപ്‌ഡേറ്റ് ലഭിച്ചുതുടങ്ങിയതായി റിപ്പോർട്ടുണ്ട്. ഘട്ടങ്ങളായാണ് ഈ ഒടിഎ (OTA) അപ്‌ഡേറ്റ് ഫോണുകളിലേക്ക് എത്തുന്നത്. ഫോണിലെ Settings > Software update > Download and install വഴി അപ്‌ഡേറ്റ് വന്നിട്ടുണ്ടോ എന്ന് പരിശോധിക്കാം. കൂടുതൽ ആകർഷകമായ ഡിസൈൻ, ശക്തമായ പ്രൈവസി ഫീച്ചറുകൾ, മികച്ച പെർഫോമൻസ്, പുതിയ ഗാലക്സി എഐ അപ്‌ഗ്രേഡുകൾ എന്നിവയാണ് ഈ പുതിയ അപ്‌ഡേറ്റിന്റെ പ്രധാന പ്രത്യേകതകൾ.

സെപ്റ്റംബർ പകുതിയോടെയാണ് ഗാലക്സി S26 മോഡലുകൾക്കായി വൺ യുഐ 9 സ്റ്റേബിൾ അപ്‌ഡേറ്റ് സാംസങ് പ്രഖ്യാപിച്ചത്. തുടർന്ന്, സെപ്റ്റംബർ 25-ന് ഇന്ത്യൻ വിപണിക്ക് അനുയോജ്യമായ പ്രത്യേക ഫീച്ചറുകളോടെ അപ്‌ഡേറ്റ് ഇന്ത്യയിലുമെത്തുമെന്ന് കമ്പനി സ്ഥിരീകരിച്ചു. സ്കാം ഡിറ്റക്ഷൻ (Scam Detection), പ്രൈവസി അലേർട്ടുകൾ (Privacy Alerts), സെക്യൂരിറ്റി ബ്രീഫ് (Security Brief), മൈ ഫാൻക്യാം (My FanCam) എന്നിവയാണ് ഇതിലെ പ്രധാന ഫീച്ചറുകൾ. മോഡലിനും പ്രദേശത്തിനും അനുസരിച്ച് അപ്‌ഡേറ്റിന്റെ വലിപ്പത്തിലും ബിൽഡ് നമ്പറിലും മാറ്റമുണ്ടാകാം.

ഗാലക്സി S26 ഫോണുകളിൽ വൺ യുഐ 9 എങ്ങനെ അപ്‌ഡേറ്റ് ചെയ്യാം?

അപ്‌ഡേറ്റ് ഇൻസ്റ്റാൾ ചെയ്യുന്നതിന് മുമ്പ് സ്മാർട്ട് സ്വിച്ച് (Smart Switch) അല്ലെങ്കിൽ ഗൂഗിൾ ഡ്രൈവ് ഉപയോഗിച്ച് ഫോണിലെ ഡാറ്റ ബാക്കപ്പ് ചെയ്യുക. ഫോണിൽ കുറഞ്ഞത് 50 ശതമാനമെങ്കിലും ചാർജ് ഉണ്ടെന്ന് ഉറപ്പാക്കുകയും നല്ല വൈഫൈ നെറ്റ്‌വർക്കിലേക്ക് കണക്റ്റ് ചെയ്യുകയും വേണം. ശേഷം Settings എടുത്ത് Software update വഴി Download and install കൊടുക്കാം. പുതിയ അപ്‌ഡേറ്റ് ശരിയായി ഇൻസ്റ്റാൾ ആകാൻ ഫോണിൽ കുറഞ്ഞത് 8 ജിബി സ്റ്റോറേജ് എങ്കിലും ഒഴിവുണ്ടായിരിക്കണം. ഫോൺ റീസ്റ്റാർട്ട് ആയ ശേഷം ഗാലക്സി സ്റ്റോർ (Galaxy Store) തുറന്ന് സാംസങ് ആപ്പുകൾ കൂടി അപ്‌ഡേറ്റ് ചെയ്യുക.

വൺ യുഐ 9 അപ്‌ഡേറ്റിന് ശേഷം ശ്രദ്ധിക്കേണ്ട കാര്യങ്ങൾ

അപ്‌ഡേഷന് ശേഷം ഇന്ത്യയിൽ ലഭ്യമാക്കിയിട്ടുള്ള പ്രൈവസി അലേർട്ട്സ്, സെക്യൂരിറ്റി ബ്രീഫ്, സ്കാം ഡിറ്റക്ഷൻ എന്നീ ഫീച്ചറുകൾ പരിശോധിച്ച് ഉറപ്പുവരുത്തുക. കൂടാതെ ഗാലക്സി എഐയിലുള്ള 'നൗ നഡ്ജ്' (Now Nudge), 'ക്രിയേറ്റീവ് സ്റ്റുഡിയോ' (Creative Studio) ഫീച്ചറുകളും പരീക്ഷിച്ചുനോക്കാം. അപ്‌ഡേറ്റ് ചെയ്യുമ്പോൾ ക്യാമറ, ബാറ്ററി സെറ്റിംഗ്സുകൾ റീസെറ്റ് ആകാൻ സാധ്യതയുള്ളതിനാൽ അവ വീണ്ടും പരിശോധിക്കുന്നത് നന്നായിരിക്കും. ഓരോ മോഡലിനും അനുസരിച്ച് അപ്‌ഡേറ്റ് വിവരങ്ങളിൽ മാറ്റമുണ്ടാകാം എന്നതിനാൽ ഇൻസ്റ്റാളേഷന് ശേഷം ഫോണിലെ ചേഞ്ച്‌ലോഗ് (changelog) വായിച്ചുനോക്കുക.

പല ഘട്ടങ്ങളായാണ് ഇന്ത്യയിൽ അപ്‌ഡേറ്റ് എത്തുന്നത്, അതിനാൽ നിങ്ങളുടെ ഫോണിൽ ഇപ്പോൾ അപ്‌ഡേറ്റ് കണ്ടില്ലെങ്കിലും പരിഭ്രാന്തരാകേണ്ടതില്ല. കുറച്ചുസമയത്തിന് ശേഷമോ നാളെയോ വീണ്ടും പരിശോധിച്ചുനോക്കുക. അപ്‌ഡേറ്റ് ചെയ്യുമ്പോൾ എന്തെങ്കിലും സാങ്കേതിക പ്രശ്നങ്ങൾ ഉണ്ടായാൽ സാംസങ് മെമ്പേഴ്സ് (Samsung Members) വഴി റിപ്പോർട്ട് ചെയ്യാം. മറ്റ് വഴികളിലൂടെ ഫേംവെയർ സൈഡ്‌ലോഡ് ചെയ്യുന്നത് ഒഴിവാക്കുക. പുതിയ ഡിവൈസുകളിൽ പഴയ വേർഷനിലേക്ക് മാറുന്നത് (Rollback) എളുപ്പമല്ലാത്തതിനാൽ പൂർണമായി തയാറായ ശേഷം മാത്രം അപ്‌ഡേറ്റ് ചെയ്യുക.