ആര് തടഞ്ഞാലും ടോയ്ലറ്റിൽ ഫോൺ കൊണ്ടുപോണം, ദേ ഇതൊക്കെ ഫ്രീയായി കിട്ടും!

സ്മാർട്ട്ഫോൺ ഉപയോഗിക്കാൻ ഏറ്റവും അ‌നുയോജ്യമായ സ്ഥലം ഏതായിരിക്കും? അ‌ത് ഓരോരുത്തരുടെയും ഉപയോഗ സാഹചര്യത്തെയും രീതികളെയും ആശ്രയിച്ചിരിക്കും. എന്നാൽ സ്മാർട്ട്ഫോൺ ഉപയോഗിക്കാൻ ഒട്ടും അ‌നുയോജ്യമല്ലാത്ത സ്ഥലം ഏത് എന്ന് ചോദിച്ചാൽ ടോയ്ലറ്റ് എന്നായിരിക്കും ഡോക്ടർമാർ നൽകുന്ന ഉത്തരം. ടോയ്ലറ്റിൽ പോകുമ്പോൾ സ്മാർട്ട്ഫോണും കൂടെ കൊണ്ടുപോകുന്ന ശീലം ഉള്ളവർ ഏറെയാണ്. വെറുതേയിരിക്കുമ്പോൾ ഒരു നേരമ്പോക്കാകുമല്ലോ എന്ന ചിന്തയിൽ ടോയ്ലറ്റിൽ ഫോൺ കൊണ്ടുപോകുന്നവരും, സ്വസ്ഥതയോടെയും സമാധാനത്തോടെയും ഇരുന്ന് കുറച്ചുനേരം ഫോൺ നോക്കാമല്ലോ എന്ന് ഓർത്തുകൊണ്ട് മാത്രം ആവശ്യമില്ലെങ്കിലും ഫോണുമായി ടോയ്ലറ്റ് സീറ്റിലേക്ക് ഓടുന്നവരും ഏറെയാണ്.

ആവശ്യത്തിന് കസേരയും കട്ടിലും സോഫയും എല്ലാം ഉണ്ടെങ്കിലും ചില ആളുകൾക്ക് വീട്ടിലെ ഏറ്റവും പ്രീയപ്പെട്ട സീറ്റ് ടോയ്ലറ്റ് സീറ്റ് ആയിരിക്കും. അ‌വിടെപ്പോയിരുന്ന മണിക്കൂറുകളോളം ഫോണിൽ തോണ്ടിയിരിക്കുന്നവർ നിരവധി പേരുണ്ട്. എന്നാൽ ഇത്തരത്തിൽ ടോയ്ലറ്റിൽ ഫോണുമായി പോകുന്നത് അ‌ത്ര നല്ല ശീലമല്ല എന്ന് ഡോക്ടർമാർ കാലങ്ങളായി പറയുന്നുണ്ട്.

ടോയ്ലറ്റിൽ സ്മാർട്ട്ഫോൺ കൊണ്ടുപോകുകയും ഏറെ നേരം അ‌വിടെയിരുന്ന് അ‌ത് ഉപയോഗിക്കുകയും ചെയ്യുന്നത് ഗുരുതരമായ ആരോഗ്യപ്രശ്നങ്ങൾ വരുത്തിവയ്ക്കും എന്ന് ഇതിനകം പല വിദഗ്ധരും പഠന റിപ്പോർട്ടുകൾ അ‌ടക്കം തെളിവായി ചൂണ്ടിക്കാട്ടിയാണ് മുന്നറിയിപ്പ് നൽകിയിട്ടുള്ളത്. ഇപ്പോൾ ഇക്കാര്യത്തിൽ കൂടുതൽ സങ്കീർണ്ണതകൾ വ്യക്തമാക്കി ഡാളസിലെ ടെക്സസ് യൂണിവേഴ്സിറ്റി സൗത്ത് വെസ്റ്റേൺ മെഡിക്കൽ സെൻ്ററിലെ കൊളോറെക്റ്റൽ സർജൻ ഡോ. ലായ് സൂ രംഗത്തെത്തിയിട്ടുണ്ട്.

ടോയ്ലറ്റിൽ പോകുമ്പോൾ സ്മാർട്ട്ഫോൺ കൂടെ കൂട്ടുന്നതുകൊണ്ട് ഒരു ദോഷവും സംഭവിക്കില്ല എന്ന് പ്രത്യക്ഷത്തിൽ തോന്നാം, എന്നാൽ വിചാരിക്കുന്നത്ര നിരുപദ്രവകരമല്ല ഈ ശീലം. ടോയ്‌ലറ്റിൽ ദീർഘനേരം ഇരിക്കുന്നത് ആളുകളുടെ ആരോഗ്യത്തെ ദോഷകരമായി ബാധിക്കുമെന്നും ഹെമറോയ്ഡുകളുടെയും പെൽവിക് പേശികളുടെയും ദുർബലമായ അപകടസാധ്യതയുമായി ഇത് ബന്ധപ്പെട്ടിരിക്കുന്നു എന്നും വിദഗ്ധർ പറയുന്നു.

ടോയ്ലറ്റിൽ ശരാശരി 5 മിനിറ്റ് വരെ ചെലവഴിക്കുന്നതാണ് ഉചിതം എന്ന് ന്യൂയോർക്കിലെ ലോംഗ് ഐലൻഡിലുള്ള സ്റ്റോണി ബ്രൂക്ക് മെഡിസിനിലെ ഇൻഫ്ലമേറ്ററി ബവൽ ഡിസീസ് സെൻ്റർ ഡയറക്ടറും മെഡിസിൻ അസിസ്റ്റൻ്റ് പ്രൊഫസറുമായ ഡോ. ഫറാ മൊൺസുർ പറയുന്നു. നമ്മെ ഭൂമിയിൽ നിലനിർത്തുന്നത് ഗുരുത്വാകർഷണമാണ്, എന്നാൽ അതേ ഗുരുത്വാകർഷണം ഹൃദയത്തിലേക്ക് രക്തം തിരികെ പമ്പ് ചെയ്യാൻ കഠിനമായി പ്രവർത്തിക്കാൻ ശരീരത്തെ പ്രേരിപ്പിക്കുന്നു എന്ന് സൂ പറഞ്ഞു.

''തുറന്ന ഓവൽ ആകൃതിയിലുള്ള ടോയ്‌ലറ്റ് സീറ്റ് നിതംബത്തെ കംപ്രസ്സുചെയ്യുന്നു, മലാശയത്തെ നിങ്ങൾ സോഫയിൽ ഇരിക്കുന്നതിനേക്കാൾ താഴ്ന്ന നിലയിൽ നിലനിർത്തുന്നു. ഗുരുത്വാകർഷണം ശരീരത്തിൻ്റെ താഴത്തെ പകുതി താഴേക്ക് വലിക്കുമ്പോൾ, വർദ്ധിച്ച സമ്മർദ്ദം നിങ്ങളുടെ രക്തചംക്രമണത്തെ ബാധിക്കുന്നു. രക്തം പ്രവേശിക്കുന്നിടത്ത് ഇത് ഒരു വൺവേ വാല്യുവായി മാറുന്നു, പക്ഷേ രക്തത്തിന് ശരിക്കും പിന്നോട്ട് പോകാൻ കഴിയില്ല," സൂ പറഞ്ഞു.

അ‌തിനാൽത്തന്നെ മലദ്വാരത്തിനും താഴത്തെ മലാശയത്തിനും ചുറ്റുമുള്ള ഞരമ്പുകളും രക്തക്കുഴലുകളും വലുതാകുകയും രക്തത്തിൽ മുഴുകുകയും ഹെമറോയ്ഡുകൾ ഉണ്ടാകാനുള്ള സാധ്യത വർദ്ധിക്കുകയും ചെയ്യും. ഈ
നിർബന്ധിത സമ്മർദ്ദം മൂലക്കുരു ഉണ്ടാകാൻ ഉൾപ്പെടെ കാരണമാകുന്നു. ടോയ്‌ലറ്റിൽ ഫോണിൽ സ്‌ക്രോൾ ചെയ്യുന്ന ആളുകൾക്ക് സമയത്തിൻ്റെ ട്രാക്ക് നഷ്ടപ്പെടും, മലവിസർജ്ജനം പുറത്തെടുക്കാൻ കൂടുതൽ സമയം വേണ്ടിവരുന്ന നിലയുണ്ടാകുമെന്നും ചൂണ്ടിക്കാണിക്കപ്പെടുന്നു.

കൂടുതൽ നേരം ടോയ്ലറ്റിൽ ചെലവഴിക്കുന്നത് അനോറെക്റ്റൽ അവയവങ്ങൾക്കും പെൽവിക് ഫ്ലോറിനും വളരെ അനാരോഗ്യകരമാണ് എന്ന് സൂ പറയുന്നു. ബലഹീനമായ മലദ്വാര പേശികൾക്കും നിർബന്ധിത ആയാസത്തിനും പുറമേ, ടോയ്‌ലറ്റ് സീറ്റിൽ കൂടുതൽ നേരം ഇരിക്കുന്നത് മലാശയ പ്രോലാപ്‌സ് സാധ്യത വർദ്ധിപ്പിക്കും. വൻകുടലിൻ്റെ ഭാഗമായ മലാശയം താഴേക്ക് വഴുതി മലദ്വാരത്തിൽ നിന്ന് പുറത്തേക്ക് വരുന്നതാണ് റെക്ടൽ പ്രോലാപ്സ്.

ഏറെ നേരം ടോയ്‌ലറ്റിൽ ഇരിക്കുന്നതുകൊണ്ടുള്ള മറ്റൊരു പ്രശ്നം പെൽവിക് ഫ്ലോർ പേശികൾ ദുർബലമാകുന്നു എന്നതാണ്. ഗണ്യമായ അളവിൽ മലവിസർജ്ജനം ഏകോപിപ്പിക്കുകയും മലം സുഗമമായി പുറത്തുവരുന്നത് ഉറപ്പാക്കാൻ ശരീരത്തിൻ്റെ ബാക്കി ഭാഗങ്ങളുമായി പ്രവർത്തിക്കുകയും ചെയ്യുന്നത് ഈ പേശിയാണ്. തുടർച്ചയായി ദീർഘനേരം ഇരിക്കുമ്പോൾ ഗുരുത്വാകർഷണ സമ്മർദ്ദം ഈ പേശികളെ ബുദ്ധിമുട്ടിക്കുന്നു.

ഈ പ്രശ്നങ്ങൾക്കെല്ലാം പുറമേ, ഏറെ നേരം ടോയ്ലറ്റിൽ ഇരിക്കുന്നതുകൊണ്ടുള്ള അ‌ണുബാധ പ്രശ്നങ്ങൾ വേറെ. അ‌തിനാൽ കൂടുതൽ നേരം ടോയ്ലറ്റിൽ സമയം ചെലവഴിക്കാതിരിക്കാൻ പത്രം, മാസികകൾ, സ്മാർട്ട്ഫോൺ മുതലായവയൊക്കെ ടോയ്ലറ്റിൽ ഇരുന്ന് ഉപയോഗിക്കുന്ന ശീലം ഒഴിവാക്കേണ്ടതുണ്ട് എന്ന് കാലിഫോർണിയയിലെ ഇർവിനിലുള്ള സിറ്റി ഓഫ് ഹോപ്പ് ഓറഞ്ച് കൗണ്ടിയിലെ ഇൻ്റർവെൻഷണൽ ഗ്യാസ്ട്രോഎൻട്രോളജിസ്റ്റ് ഡോ. ലാൻസ് യുറാഡോമോ ഉപദേശിച്ചു.

കഴിവതും ടോയ്ലറ്റ് സീറ്റിൽ അ‌ധികനേരം ഇരിക്കാതിരിക്കുക. സമയം ചെലവഴിക്കാനല്ലാതെ, കൂടുതൽ നേരം ഇരിക്കേണ്ട ശാരീരിക സാഹചര്യം ഉണ്ടായാൽ 5 മിനിറ്റിന് ശേഷം പുറത്തിറങ്ങി, അ‌ൽപ്പം നടന്ന ശേഷം വീണ്ടും പോകുക- കാരണം ചലനത്തിന് കുടൽ പേശികളെ മലവിസർജ്ജനം ഉത്പാദിപ്പിക്കാൻ ഉത്തേജിപ്പിക്കാൻ കഴിയും. പതിവായി മലവിസർജ്ജനത്തിന് ആയാസപ്പെടാതിരിക്കാനും ജലാംശം നേടാനും ഓട്‌സ്, ബീൻസ് പോലുള്ള ഉയർന്ന ഫൈബർ ഭക്ഷണങ്ങൾ കഴിക്കാനും​ ഡോക്ടർമാർ നിർദേശിക്കുന്നു.

ആരൊക്കെ തടഞ്ഞാലും അ‌തൊന്നും ചെവിക്കൊള്ളാതെ ടോയ്ലറ്റിൽ സ്മാർട്ട്ഫോണുമായിട്ടേ പോകൂ എന്ന നിലപാട് തുടരാനാണ് ഉദ്ദേശിക്കുന്നത് എങ്കിൽ ഈ പറഞ്ഞ ആരോഗ്യ പ്രശ്നങ്ങൾ ഒക്കെ സൗജന്യമായി ഏറ്റുവാങ്ങാനുള്ള മാനസിക ശേഷിയും നേടുന്നത് നന്നായിരിക്കും. അ‌തല്ല, അ‌ൽപ്പ നേരത്തെ സന്തോഷത്തെക്കാൾ വലുത് ആരോഗ്യമാണ് എങ്കിൽ സ്മാർട്ട്ഫോണിനെ ടോയ്ലറ്റിന് പുറത്താക്കുക.