പത്ത് മിനിട്ടിനുള്ളിൽ സ്വിഗ്ഗി ചൂടോടെ എത്തിച്ച് തരും, ഫുഡല്ല സ്മാർട്ട് ഫോൺ!

സ്വിഗ്ഗി എന്ന് കേൾക്കുമ്പോൾ ഭക്ഷണമാണ് പൊതുവേ നമ്മുടെ മനസ്സിലെത്തുക. എന്നാൽ ഗ്രോസറി ഐറ്റംസുകൾക്കായി സ്വിഗ്ഗി ഇൻസ്റ്റാമാർട്ട് ആപ്പും വെബ് സൈറ്റും പ്രവർത്തിക്കുന്നുണ്ട്. ഗ്രോസറി സാധനങ്ങൾ മാത്രമല്ല, ഇപ്പോഴിതാ സ്മാർട്ട് ഫോൺ ഡെലിവെറിയും സ്വിഗ്ഗി ഇൻസ്റ്റാമാർട്ട് ചെയ്യുന്നുമെന്ന പുതിയ റിപ്പോർട്ടുകളാണ് പുറത്തുവരുന്നത്. അതും ഫാസ്റ്റ് ഡെലിവറി സൗകര്യമാണ് ഇവർ തരുന്നത്. ഓർഡർ ചെയ്ത് 10 മിനിട്ടിനുള്ളിൽ സ്മാർട്ട് ഫോൺ ഇവർ എത്തിച്ചു തരും. സ്വിഗ്ഗി ഇൻസ്റ്റാമാർട്ട് ഇന്ത്യയിലെ സ്മാർട്ട്ഫോണുകൾക്കായി ഒരു ഫാസ്റ്റ് ഡെലിവറി സേവനം കഴിഞ്ഞ ദിവസമാണ് പ്രഖ്യാപിച്ചത്.

ആപ്പിൾ, സാംസങ്, വൺപ്ലസ്, റെഡ്മി തുടങ്ങിയ ബ്രാൻഡുകളുടെ സ്മാർട്ട്ഫോണുകൾ തിരഞ്ഞെടുത്ത സ്ഥലങ്ങളിലെ ഉപഭോക്താക്കൾക്ക് ഈ ക്വിക്ക് ഡെലിവറി പ്ലാറ്റ്ഫോം വിൽക്കും. സേവനം പിന്നീട് കൂടുതൽ പ്രദേശങ്ങളിലേക്ക് വ്യാപിപ്പിക്കും. ഉപഭോക്താക്കൾക്ക് ഏറ്റവും പുതിയ ഐഫോൺ 16ല ഇൻസ്റ്റന്റ് ഡെലിവറി പ്ലാറ്റ്ഫോമിൽ ഓർഡർ ചെയ്ത് ദ്രുത ഡെലിവറി നേടാം. ഓർഡർ ലഭിച്ച് 10 മിനിറ്റിനുള്ളിൽ സ്മാർട്ട്ഫോണുകൾ ഡെലിവറി ചെയ്യുമെന്ന് സ്വിഗ്ഗി അവകാശപ്പെടുന്നു.

ഇൻസ്റ്റാമാർട്ടിൽ നിന്ന് സ്മാർട്ട്ഫോണുകൾ വാങ്ങുന്നവർക്ക് പേയ്മെന്റ് സംബന്ധമായ ഓഫറുകളും ലഭിക്കും. 10 നഗരങ്ങളിൽ സ്മാർട്ട്ഫോണുകൾ എത്തിക്കാൻ ഇൻസ്റ്റാമാർട്ട് തിങ്കളാഴ്ച പങ്കിട്ട ഒരു പത്രക്കുറിപ്പിലാണ് അറിയിച്ചത്. തിരഞ്ഞെടുത്ത ഇന്ത്യൻ നഗരങ്ങളിൽ 10 മിനിറ്റ് കൊണ്ട് സ്മാർട്ട്ഫോണുകൾ ഡെലിവറി ചെയ്യുന്ന പുതിയ സംവിധാനമാണ് സ്വിഗ്ഗി ഇൻസ്റ്റാമാർട്ടിലൂടെ ഉപയോക്താക്കൾക്ക് എത്തിക്കുന്നത്.

ഐഫോൺ 16ഇ, സാംസങ് ഗാലക്സി എം35, വൺപ്ലസ് നോർഡ് സിഇ, വൺപ്ലസ് നോർഡ് സിഇ 4 ലൈറ്റ്, റെഡ്മി 14സി എന്നിവയുൾപ്പെടെയുള്ള സ്മാർട്ട്ഫോണുകൾ ബാംഗ്ലൂർ, ഡൽഹി, മുംബൈ, ചെന്നൈ, ഫരീദാബാദ്, നോയിഡ, ഗുഡ്ഗാവ്, കൊൽക്കത്ത, ഹൈദരാബാദ്, പൂനെ തുടങ്ങിയ നഗരങ്ങളിൽ തൽക്ഷണ ഡെലിവറി പ്ലാറ്റ്ഫോമിൽ ലഭ്യമാകും. കൂടുതൽ നഗരങ്ങളിലേക്കും ഈ സേവനം ഉടൻ ലഭ്യമാകുമെന്ന് സ്ഥിരീകരിച്ചിട്ടുണ്ട്. കേരളത്തിൽ വൈകാതെ ഈ സേവനം ലഭ്യമാകുമെന്ന് പ്രതീക്ഷിക്കാം.

ഓർഡർ ലഭിച്ചാൽ 10 മിനിറ്റിനുള്ളിൽ ഈ ഹാൻഡ്സെറ്റുകൾ ഡെലിവറി ചെയ്യുമെന്ന് പരസ്യപ്പെടുത്തിയിട്ടുണ്ട്. മോട്ടറോള, ഓപ്പോ, വിവോ, റിയൽമി തുടങ്ങിയ ബ്രാൻഡുകളിൽ നിന്നുള്ള മൊബൈൽ ഫോണുകളും ഇൻസ്റ്റാമാർട്ടിൽ വേഗത്തിൽ ഡെലിവറി ചെയ്യാൻ ലഭ്യമാകുമെന്ന് സ്ഥിരീകരിച്ചിട്ടുണ്ട്. എന്നാൽ മോഡലുകൾ വ്യക്തമാക്കിയിട്ടില്ല.

ഐസിഐസിഐ ബാങ്ക് ക്രെഡിറ്റ് കാർഡുകൾ ഉപയോഗിച്ച് മൊബൈൽ ഫോൺ വിഭാഗത്തിൽ 11,499 രൂപയ്ക്ക് മുകളിലുള്ള ഓർഡറുകൾക്ക് 5 ശതമാനം കിഴിവ് അല്ലെങ്കിൽ 4,000 രൂപ വരെ കിഴിവ് ലഭിക്കും. ബ്ലിങ്കിറ്റും സെപ്റ്റോയും നിലവിൽ നിരവധി ഇന്ത്യൻ നഗരങ്ങളിൽ സമാനമായ സ്മാർട്ട്ഫോൺ ഡെലിവറി സേവനങ്ങൾ വാഗ്ദാനം ചെയ്യുന്നുണ്ട്.

ആപ്പിളിന്റെ ഉൽപ്പന്നങ്ങൾ ഡോർസ്റ്റെപ്പ് ഡെലിവറി വാഗ്ദാനം ചെയ്യുന്നതിനായി ഇരു ബ്രാൻഡുകളും അടുത്തിടെ കൈകോർത്തിരുന്നു. തിരഞ്ഞെടുത്ത ഇന്ത്യൻ നഗരങ്ങളിൽ വിവോ സ്മാർട്ട്ഫോണുകളുടെയും അസൂസ് കീബോർഡുകളുടെയും മൗസിന്റെയും വേഗത്തിലുള്ള ഡെലിവറികൾ സെപ്റ്റോ വാഗ്ദാനം ചെയ്യുന്നുണ്ട്. നിലവിൽ സെപ്റ്റോയിൽ ഐഫോൺ, ഐപാഡ്, ആപ്പിൾ വാച്ച്, എയർപോഡുകൾ, മറ്റ് ആക്സസറികൾ എന്നിവ ഓർഡർ ചെയ്യാൻ കഴിയും.

ഓർഡറുകൾ നൽകുമ്പോൾ ഉപയോക്താക്കൾക്ക് ലോഞ്ച് ഓഫറുകളും നോ-കോസ്റ്റ് ഇഎംഐ ഓഫറുകളും ലഭിക്കും. ഓർഡർ ലഭിച്ച് 10 മിനിറ്റിനുള്ളിൽ ഉൽപ്പന്നങ്ങൾ ഡെലിവറി ചെയ്യുമെന്നാണ് ഇവർ അവകാശപ്പെടുന്നത്. അടുത്തിടെ പുറത്തിറക്കിയ ഐഫോൺ 16e , എയർപോഡ്സ് 4 , ഐപാഡ് മോഡലുകൾ സെപ്റ്റോയിൽ വേഗത്തിൽ ഡെലിവറി ചെയ്യാൻ ലഭ്യമാകുമെന്ന് സ്ഥിരീകരിച്ചിട്ടുണ്ട്. കഴിഞ്ഞ 30 ദിവസത്തിനുള്ളിൽ പത്ത് ലക്ഷത്തിലധികം ഉപയോക്താക്കൾ സെപ്റ്റോയിൽ ആപ്പിൾ ഇനങ്ങൾക്കായി തിരഞ്ഞതായി അധികൃതർ പറയുന്നുണ്ട്. അതേസമയം ബ്ലിങ്കിറ്റ് സാംസങ് ഗാലക്സി എസ് 24 സീരീസ്, പ്ലേസ്റ്റേഷൻ 5, സ്വർണ്ണ, വെള്ളി നാണയങ്ങൾ എന്നിവ വിൽക്കുന്നതിലാണ് ശ്രദ്ധ കേന്ദ്രീകരിച്ചിട്ടുള്ളത്.