എന്റെ പൊന്നേ... വേഗം ഇറങ്ങിവാ! ഏറ്റവും കുറഞ്ഞ നിരക്കിൽ സ്വർണം വാങ്ങണോ? ഇതാ എത്തിപ്പോയ് ഗോൾഡ് എടിഎം

പണം ആവശ്യമുണ്ടെങ്കിൽ നാം ഇപ്പോൾ എന്താണു ചെയ്യുക. തൊട്ടടുത്തുള്ള എടിഎം കൗണ്ടറിൽ പോകും അ‌ക്കൗണ്ടിൽനിന്ന് ആവശ്യമുള്ള തുക പിൻവലിച്ച് ഉപയോഗിക്കും. എതാണ്ട് അ‌തേ രീതിയിൽ തന്നെയാണ് ഈ ഗോൾഡ് എടിഎമ്മിന്റെയും പ്രവർത്തനം. ആളുകൾക്ക് അവരുടെ ഡെബിറ്റ് അല്ലെങ്കിൽ ക്രെഡിറ്റ് കാർഡുകൾ ഉപയോഗിച്ച് ഈ ഗോൾഡ് എടിഎമ്മിൽ നിന്ന് സ്വർണ നാണയങ്ങൾ പിൻവലിക്കാം. ലോകത്തിലെ തന്നെ ഇത്തരത്തിലെ ആദ്യ ഗോൾഡ് എടിഎം ആണ് ​ഹൈദരാബാദിൽ ആരംഭിച്ചിരിക്കുന്നത് എന്നതാണ് ശ്രദ്ധേയമായ കാര്യം.

സ്വർണ വിതരണ കമ്പനിയായ ഗോൾഡ്‌സിക്ക പ്രൈവറ്റ് ലിമിറ്റഡ്, ഹൈദരാബാദ് ആസ്ഥാനമായുള്ള സ്റ്റാർട്ടപ്പായ M/s ഓപ്പൺക്യൂബ് ടെക്‌നോളജീസ് പ്രൈവറ്റ് ലിമിറ്റഡിന്റെ സാങ്കേതിക പിന്തുണയോടെ ആരംഭിച്ചതാണ് ഈ ഗോൾഡ് എടിഎം. ​ഹൈദരാബാദിലെ ബീഗംപേട്ടിൽ ഡിസംബർ 3 ന് ആണ് ഈ സ്വർണ എടിഎം ആരംഭിച്ചത്. എടിഎമ്മിൽ നിന്ന് പണം പിൻവലിക്കുന്ന അ‌തേ ലാഘവത്തിൽ ഈ എടിഎമ്മിൽനിന്ന് സ്വർണം സ്വന്തമാക്കാം.

വിപണിയിൽ ലഭ്യമായതിൽ ഏറ്റവും കുറഞ്ഞ വിലയിൽ സ്വർണം വാങ്ങാം എന്നതാണ് ഈ ഗോൾഡ് എടിഎമ്മിന്റെ ഏറ്റവും വലിയ പ്രത്യേകത. 0.5 ഗ്രാം മുതൽ 100 ഗ്രാം വരെ അളവിൽ എട്ട് ഓപ്ഷനുകളിലായി സ്വർണം വാങ്ങാം. "സ്വർണ എടിഎമ്മുകളിൽ കാണപ്പെടുന്ന എല്ലാ സ്വർണ നാണയങ്ങളും 24 കാരറ്റ് സ്വർണമാണ്, കിട്ടാവുന്നതിൽ ഏറ്റവും ശുദ്ധമായ സ്വർണമാണ് ഇവിടെ കിട്ടുകയെന്നും വിപണിയിലെ വില നിലവാരത്തെക്കുറിച്ച് ഉപഭോക്താക്കളെ അറിയിക്കുന്നതിന് നിലവിലെ സ്വർണ വിലയും ഇവിടെ പ്രദർശിപ്പിക്കുമെന്നും കമ്പനി പ്രസ്താവനയിൽ പറയുന്നു.

ഡെബിറ്റ്, ക്രെഡിറ്റ് കാർഡുകൾ കൂടാതെ സ്വർണം വാങ്ങാൻ ഉപയോഗിക്കാവുന്ന പ്രീപെയ്ഡ്, പോസ്റ്റ്പെയ്ഡ് സ്മാർട് കാർഡുകളും കമ്പനി വാഗ്ദാനം ചെയ്യുന്നുണ്ട്. എന്നാൽ 0.5 ഗ്രാം മുതൽ 100 ഗ്രാം വരെ സ്വർണം മാത്രമാണ് ഇവിടെ ലഥ്യമാകുക. 0.5 ഗ്രാമിൽ താഴെയോ 100 ഗ്രാമിൽ കൂടുതലോ സ്വർണം വാങ്ങാൻ സാധിക്കില്ല. ഉപയോക്താക്കുടെ താൽപര്യം മനസിലാക്കിയാണ് ഇത്തരമൊരു ആശയം ലോകത്ത് ആദ്യമായി ​ഹൈദരാബാദിൽ പ്രാവർത്തികമാക്കിയിരിക്കുന്നതെന്ന് കമ്പനിയുടെ വക്താക്കൾ പറയുന്നു.

മറ്റ് എടിഎമ്മുകൾ പോലെ തന്നെ ഈ ഗോൾഡ് എടിഎമ്മിന്റെ സേവനവും ആഴ്ചയിൽ ഏഴുദിവസവും 24 മണിക്കൂറും ലഭ്യമാകും. അ‌ധികം താമസിയാതെ തന്നെ രാജ്യത്തിന്റെ മറ്റു ഭാഗങ്ങളിലും ഇത്തരം ഗോൾഡ് എടിഎം സ്ഥാപിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. എന്നാൽ ​ഹൈദരാബാദിലെ ഈ ഗോൾഡ് എടിഎമ്മിന്റെ പ്രവർത്തന വിജയത്തെ ആശ്രയിച്ചാകും മറ്റു സ്ഥലങ്ങളിലും ഗോൾഡ് എടിഎമ്മുകൾ കൂടുതലായി സഥാപിക്കപ്പെടുക.

ഗോൾഡ് എടിഎമ്മിന്റെ പ്രവർത്തനം

ഠ എടിഎമ്മിൽ ഡെബിറ്റ് / ക്രെഡിറ്റ് അല്ലെങ്കിൽ സ്മാർട്ട് കാർഡ് സ്വൈപ്പ് ചെയ്യുക.
ഠ സ്വർണം വാങ്ങാൻ നൽകിയിരിക്കുന്ന ഓപ്ഷൻ തിരഞ്ഞെടുക്കുക
ഠ ശേഷം വിലയും സ്വർണവും തിരഞ്ഞെടുക്കുക
ഠ സുരക്ഷാ പിൻ നൽകുക
ഠ എടിഎം നൽകുന്ന സ്വർണനാണയങ്ങൾ കളക്ട് ചെയ്യുക.