സുരക്ഷ മുഖ്യം! ഇന്ത്യൻ റെയിൽവേയ്ക്ക് 5 MHz സ്പെക്ട്രം അ‌നുവദിക്കണമെന്ന് ട്രായി ശുപാർശ

ഇന്ത്യൻ റെയിൽവേയ്ക്ക് 700 മെഗാഹെർട്സ് ബാൻഡിൽ 5 മെഗാഹെർട്സ് ജോടിയാക്കിയ സ്പെക്ട്രം അധികമായി നൽകണമെന്ന് ടെലിക്കോം റെഗുലേറ്ററി അ‌തോറിറ്റി ഓഫ് ഇന്ത്യ (TRAI) ശുപാർശ ചെയ്തു. റെയിൽവേ ട്രാക്കുകളിൽ സുരക്ഷ വർധിപ്പിക്കാനും സുരക്ഷാ സംവിധാനങ്ങൾ ഫലപ്രദമായി ഉപയോഗിക്കാനും ഉദ്ദേശിച്ചാണ് സ്പെക്ട്രം അനുവദിക്കാൻ ശുപാർശ ചെയ്തിരിക്കുന്നത്. ടെലികമ്മ്യൂണിക്കേഷൻ വകുപ്പിൻ്റെ (DoT) അഭ്യർത്ഥനയെ തുടർന്നാണ് ഈ തീരുമാനം. റെയിൽവേ ആശയവിനിമയം നവീകരിക്കാനും ഇതിലൂടെ ലക്ഷ്യമിടുന്നു. ഇതിന് മുൻപ് അ‌നുവദിച്ച് സ്പെക്ട്രത്തിന് പുറമേയാണ് അ‌ധികമായി 5 മെഗാഹെർട്സ് സ്പെക്ട്രം കൂടി അ‌നുവദിക്കുന്നത്.

റെയിൽവേയെ ആധുനിക വൽക്കരിക്കാനുള്ള നീക്കങ്ങളുടെ കൂടി ഭാഗമായാണ് അ‌ധിക സ്പെക്ട്രം അ‌നുവദിക്കുന്നത്.
2021-ൽ 700 മെഗാഹെർട്‌സ് ബാൻഡിൽ 5 മെഗാഹെർട്‌സ് സ്‌പെക്‌ട്രം ഇന്ത്യൻ റെയിൽവേയ്‌ക്കായി ടെലിക്കോം വകുപ്പ് ​ അനുവദിച്ചിരുന്നു. 700 MHz ബാൻഡിൽ സംപ്രേക്ഷണം ചെയ്യുന്ന ടെലികോം സിഗ്നലുകൾക്ക് വലിയൊരു പ്രദേശത്തെ ഉൾക്കൊള്ളാൻ കഴിയും, 5G നെറ്റ്‌വർക്കിന് ഇത് വളരെ അ‌ത്യന്താപേക്ഷിതമായി കണക്കാക്കപ്പെടുന്നു.

വാണിജ്യാവശ്യങ്ങൾക്കായിട്ടാണ് എങ്കിൽ 700 MHz ബാൻഡിലെ ഒരു മെഗാഹെർട്‌സിൻ്റെ (MHz) സ്‌പെക്‌ട്രത്തിൻ്റെ വില 3,927 കോടി രൂപയായി നിശ്ചയിച്ചിരിക്കുന്നു. ഇന്ത്യൻ റെയിൽവേയ്‌ക്കായി 10 മെഗാഹെർട്‌സ് ബാൻഡ് സൃഷ്‌ടിക്കുകയും മുമ്പ് അ‌നുവദിച്ച 5 മെഗാഹെർട്‌സ് ബ്ലോക്കുമായി പുതിയ സ്‌പെക്‌ട്രം സമന്വയിപ്പിക്കണമെന്നും ട്രായ് ശുപാർശയിൽ നിർദ്ദേശിക്കുന്നു.

എൻസിആർടിസി, മറ്റ് ആർആർടിഎസ്, മെട്രോ റെയിൽ ശൃംഖലകൾ എന്നിവയ്‌ക്ക് 5 മെഗാഹെർട്‌സ് ബ്ലോക്ക് അനുവദിക്കാനും ട്രായി ശുപാർശയിൽ പറയുന്നു. 700 മെഗാഹെർട്സ് ബാൻഡിൽ 10 മെഗാഹെർട്സ് ഫ്രീക്വൻസി സ്പെക്ട്രത്തിൻ്റെ തുടർച്ചയായ ബ്ലോക്ക് ഇന്ത്യൻ റെയിൽവേയ്ക്കും തൊട്ടടുത്തുള്ള 5 മെഗാഹെർട്സ് ബ്ലോക്ക് എൻസിആർടിസി/ മറ്റ് ആർആർടിഎസ്/ മെട്രോ റെയിൽ ശൃംഖലകൾക്കും നൽകുന്നതിന് സ്പെക്ട്രം ഹാർമോണൈസേഷൻ നടത്തണം.

ഇന്ത്യൻ റെയിൽവേയും എൻസിആർടിസിയും മറ്റ് ഗതാഗത ശൃംഖലകളും തമ്മിലുള്ള റേഡിയോ ആക്സസ് നെറ്റ്‌വർക്ക് (RAN) ഷെയറിങ് സാധ്യതകൾ വിലയിരുത്തുന്നതിന് ഫീൽഡ് ട്രയൽ ആവശ്യമാണെന്ന് ട്രായി പറഞ്ഞു. ഇത് വിജയകരമാണെങ്കിൽ, ഓവർലാപ്പിംഗ് ഏരിയകളിൽ കാര്യക്ഷമമായ സ്പെക്ട്രം ഉപയോഗത്തിലേക്ക് നയിച്ചേക്കാം. ഈ ട്രയലിൻ്റെ ഫലം ഒരു മൾട്ടി-ഓപ്പറേറ്റർ കോർ നെറ്റ്‌വർക്ക് (MOCN) വഴി RAN ഷെയർ സംബന്ധിച്ച കൂടുതൽ തീരുമാനങ്ങൾ എടുക്കുന്നതിനും സഹായിക്കും.

സ്‌പെക്‌ട്രം ചാർജുകളെ സംബന്ധിച്ച്, ടെലിക്കോം വകുപ്പ് നിർദ്ദേശിച്ച പ്രകാരം, റോയൽറ്റി ചാർജുകൾക്കും ക്യാപ്‌റ്റീവ് ഉപയോഗത്തിനുള്ള ലൈസൻസ് ഫീസിനും നിലവിലുള്ള ഫോർമുലയെ അടിസ്ഥാനമാക്കി ഫീസ് ഈടാക്കണമെന്ന് ട്രായി ശുപാർശ ചെയ്തു. നിലവിൽ ജിയോയും (10 മെഗാഹെർട്‌സ്), ബിഎസ്എൻഎല്ലും (10 മെഗാഹെർട്‌സ് റിസർവ്‌ഡ്) മാത്രമാണ് 700 മെഗാഹെർട്‌സ് ബാൻഡിൽ സ്‌പെക്‌ട്രം കൈവശം വച്ചിരിക്കുന്നത്.

2,100 MHz, 700 MHz എന്നിങ്ങനെ രണ്ട് സ്പെക്ട്രം ബാൻഡുകൾ ഉപയോഗിച്ചുകൊണ്ടാണ് ബിഎസ്എൻഎൽ 4ജി വ്യാപനം നടത്തുന്നത്. ഇതിൽ 2,100 MHz ബാൻഡ് 4G സേവനങ്ങൾക്കായിട്ടാണ്, 700 MHz ബാൻഡ് 5ജി സേവനങ്ങൾക്കായും. 4ജി വ്യാപനം പൂർത്തിയാകുന്ന മുറയ്ക്ക് ചെറിയ സോഫ്ട്വേർ അ‌പ്ഡേഷനിലൂടെ അ‌തിവേഗം 5ജി സേവനങ്ങൾ ആരംഭിക്കാനാണ് ബിഎസ്എൻഎൽ ലക്ഷ്യമിട്ടിരിക്കുന്നത്.

അ‌ടുത്ത വർഷം ജൂ​ൺ - ജൂ​ലൈ കാലയളവിൽ 5ജി സേവനങ്ങൾ ആരംഭിക്കാൻ സാധിക്കും എന്നാണ് ബിഎസ്എൻഎൽ പ്രതീക്ഷിക്കുന്നത്. ​തദ്ദേശീയമായി 5ജി ടെക്നോളജി അ‌ടക്കം വിജയകരമായി വികസിപ്പിച്ചുകഴിഞ്ഞു. എന്നാൽ 5ജി സേവനങ്ങൾ ആരംഭിക്കുന്നതിന് മുൻപ് ലക്ഷ്യമിട്ട 4ജി വ്യാപനം പൂർത്തിയാക്കേണ്ടതുണ്ട്. ഇന്ത്യയിലാകെ 1 ലക്ഷം ​സൈറ്റുകളിൽ 4ജി എത്തിക്കാനാണ് ടിസിഎസ് നേതൃത്വത്തിലുള്ള കൺസോർഷ്യത്തിന് കരാർ നൽകിയിരിക്കുന്നത്. ഇതിൽ 62000+ ടവറുകൾ ഇതിനകം സ്ഥാപിച്ചുകഴിഞ്ഞു.