ഇത് കളിയല്ല! സൗജന്യമായി ആധാർ അപ്‌ഡേറ്റ് ചെയ്യാനുള്ള സമയപരിധി സർക്കാർ വീണ്ടും നീട്ടി

യുണീക്ക് ഐഡൻ്റിഫിക്കേഷൻ അതോറിറ്റി ഓഫ് ഇന്ത്യ (യുഐഡിഎഐ) ആധാർ ഉടമകൾക്ക് അവരുടെ വിശദാംശങ്ങൾ ഓൺലൈനായി സൗജന്യമായി അപ്‌ഡേറ്റ് ചെയ്യാനുള്ള സമയപരിധി വീണ്ടും നീട്ടി. യഥാർത്ഥത്തിൽ 2024 സെപ്റ്റംബർ 14ന് സജ്ജീകരിച്ചിരുന്ന സമയപരിധി ഇപ്പോൾ 2024 ഡിസംബർ 14ലേക്ക് മാറ്റി. ജൂൺ 14ന് ശേഷം ഇത് രണ്ടാം തവണയാണ് UIDAI സമയപരിധി നീട്ടുന്നത്. ഇപ്പോൾ സർക്കാർ ഇന്ത്യൻ പൗരന്മാർക്ക് യുഐഡിഎഐയുടെ ഔദ്യോഗിക ഓൺലൈൻ പോർട്ടലിൽ അവരുടെ വിവരങ്ങൾ യാതൊരു നിരക്കും കൂടാതെ അപ്‌ഡേറ്റ് ചെയ്യാൻ 90 ദിവസം കൂടി നൽകുന്നു. എന്നിരുന്നാലും, ഈ സേവനം ഓൺലൈൻ അപ്‌ഡേറ്റുകൾക്ക് മാത്രമേ ലഭ്യമാകൂ എന്നത് ശ്രദ്ധിക്കേണ്ടതാണ്.

ആധാർ കേന്ദ്രത്തിൽ ബയോമെട്രിക് വിവര അപ്‌ഡേറ്റ് ഉൾപ്പെടെ ഉള്ള എല്ലാ അപ്‌ഡേറ്റുകൾക്കും തുടർന്നും ഫീസ് ആവശ്യമാണ്. എന്നാൽ ആധാർ അപ്ഡേറ്റ് ചെയ്യാനും സമയബന്ധിതമായി സമയപരിധി പുതുക്കാനും സർക്കാർ ജനങ്ങളെ പ്രേരിപ്പിക്കുന്നത് എന്ത് കൊണ്ടാണ്? 12 അക്ക തനത് തിരിച്ചറിയൽ നമ്പറായ ആധാർ ഓരോ ഇന്ത്യൻ താമസക്കാരനും ഒരു നിർണായക രേഖയായി മാറിയിരിക്കുന്നു. ഇത് ഐഡൻ്റിറ്റിയുടെയും വിലാസത്തിൻ്റെയും തെളിവായി മാത്രമല്ല, വിവിധ ദൈനംദിന പ്രവർത്തനങ്ങൾക്കും അത്യന്താപേക്ഷിതമാണ്.

സർക്കാർ പദ്ധതികൾക്ക് അപേക്ഷിക്കുന്നതും ബാങ്ക് അക്കൗണ്ടുകൾ തുറക്കുന്നതും മുതൽ യാത്രാ ടിക്കറ്റുകൾ ബുക്ക് ചെയ്യുന്നതിനും ആദായ നികുതി ഫയൽ ചെയ്യുന്നതിനും വരെ ആധാർ നിരവധി പ്രക്രിയകളിൽ ആവശ്യമായി വരാറുണ്ട്. അതിൻ്റെ വർദ്ധിച്ച് വരുന്ന പ്രാധാന്യം, ഇത് ചൂഷണം ചെയ്യുന്നവരുടെ ലക്ഷ്യമായി മാറുകയാണ്. ആധാർ വിശദാംശങ്ങൾ അപ്‌ഡേറ്റ് ചെയ്യുന്നത് അപ്‌ഡേറ്റ് ചെയ്ത റെക്കോർഡ് സൂക്ഷിക്കാനും ആധാറുമായി ബന്ധപ്പെട്ട തട്ടിപ്പുകൾക്കെതിരെ പോരാടാനും സർക്കാരിനെ സഹായിക്കുമെന്ന് ആധാറിൻ്റെ ഭരണസമിതിയായ യുഐഡിഎഐ വെളിപ്പെടുത്തുന്നു.

ഡെമോഗ്രാഫിക്, ബയോമെട്രിക് വിവരങ്ങളുടെ കൃത്യത ഉറപ്പാക്കാൻ ഓരോ 10 വർഷത്തിലും അവരുടെ വിശദാംശങ്ങൾ അപ്‌ഡേറ്റ് ചെയ്യാൻ ആധാർ ഉടമകളെ ഇന്ത്യൻ സർക്കാർ ഇപ്പോൾ ശക്തമായി പ്രോത്സാഹിപ്പിക്കുന്നു. നിരവധി കാരണങ്ങളാൽ നിങ്ങളുടെ ആധാർ അപ്ഡേറ്റ് ചെയ്യുന്നത് നിർണായകമാണ്. കാലഹരണപ്പെട്ട വിവരങ്ങൾ മൂലമുണ്ടാകുന്ന കാലതാമസമില്ലാതെ, പൊതു പദ്ധതിയും സേവനങ്ങളും ശരിയായ വ്യക്തിക്ക് എത്തിക്കുന്നുവെന്ന് ഉറപ്പാക്കാൻ സർക്കാരിനെ ആധാർ അപ്ഡേറ്റ് സഹായിക്കുന്നു.

കൂടാതെ, കൃത്യവും അപ്-ടു-ഡേറ്റുമായ വിശദാംശങ്ങൾ നിലനിർത്തുന്നതിലൂടെ, ആധാർ തട്ടിപ്പ് തടയാൻ സഹായിക്കുന്നു. സാമ്പത്തിക ഇടപാടുകൾ, സ്കൂൾ അല്ലെങ്കിൽ കോളേജ് പ്രവേശനങ്ങൾ, യാത്രാ ബുക്കിംഗുകൾ എന്നിവ ഉൾപ്പെടെ വിവിധ പരിശോധനാ പ്രക്രിയകളിൽ ആധാർ ഉപയോഗിക്കാറുണ്ട്. നിങ്ങളുടെ വിശദാംശങ്ങൾ കൃത്യമാണെന്ന് ഉറപ്പാക്കുന്നത് ഈ പ്രക്രിയകളിലെ സങ്കീർണതകൾ ഒഴിവാക്കാനും സഹായിക്കുന്നു.

ആധാർ ഓൺലൈനിൽ അപ്‌ഡേറ്റ് ചെയ്യുന്നത് നിങ്ങളുടെ വീട്ടിലിരുന്ന് ചെയ്യാവുന്ന ഒരു സിമ്പിൾ പ്രോസസ്സ് ആണ്. അതിനായി ഔദ്യോഗിക UIDAI വെബ്സൈറ്റ് ആയ myaadhaar.uidai.gov.in/ സന്ദർശിക്കുക. ശേഷം ആധാർ സെൽഫ് സർവീസ് പോർട്ടലിലേക്ക് പോകുക. ലോഗിൻ ചെയ്യുന്നതിന് നിങ്ങളുടെ ആധാർ നമ്പറും രജിസ്റ്റർ ചെയ്ത മൊബൈൽ നമ്പറിലേക്ക് അയച്ച വൻ ടൈം പാസ്‌വേഡും (OTP) നൽകുക.

നിങ്ങളുടെ ആധാർ പ്രൊഫൈലിൽ പ്രദർശിപ്പിച്ചിരിക്കുന്ന ഐഡൻ്റിറ്റിയും വിലാസ വിശദാംശങ്ങളും പരിശോധിക്കുക. ഏതെങ്കിലും വിവരങ്ങൾ തെറ്റോ കാലഹരണപ്പെട്ടതോ ആണെങ്കിൽ, അപ്ഡേറ്റിലേക്ക് പോകുക. ഉചിതമായ ഡോക്യുമെൻ്റ് ടൈപ് (ഐഡൻ്റിറ്റി പ്രൂഫ് അല്ലെങ്കിൽ അഡ്രസ് പ്രൂഫ്) തിരഞ്ഞെടുത്ത് ഒറിജിനൽ ഡോക്യുമെൻ്റിൻ്റെ സ്കാൻ ചെയ്ത പകർപ്പ് അപ്ലോഡ് ചെയ്യുക. JPEG, PNG, PDF എന്നിവ ഡോക്യുമെന്റിനെ സപ്പോർട്ട് ചെയുന്ന ഫോർമാറ്റുകൾ. 2 എംബി ആണ് ഫയൽ സൈസിന്റെ പരിധി.

നിങ്ങളുടെ അപ്‌ഡേറ്റ് റിക്വസ്റ്റ് സബ്മിറ്റ് ചെയ്തതിന് ശേഷം, നിങ്ങൾക്ക് ഒരു സർവീസ് റിക്വസ്റ്റ് നമ്പർ (SRN) ലഭിക്കും. നിങ്ങളുടെ അപ്‌ഡേറ്റിൻ്റെ സ്റ്റാറ്റസ് ട്രാക്ക് ചെയ്യാൻ ഈ നമ്പർ ഉപയോഗിക്കുക. വിലാസവും പേരും പോലുള്ള ഡെമോഗ്രാഫിക് അപ്‌ഡേറ്റുകൾ ഓൺലൈനിൽ ചെയ്യാമെങ്കിലും, ബയോമെട്രിക് അപ്‌ഡേറ്റുകൾക്ക് (വിരലടയാളങ്ങൾ, ഐറിസ് സ്‌കാനുകൾ, ഫോട്ടോഗ്രാഫുകൾ എന്നിവ പോലുള്ളവ) യുഐഡിഎഐ അംഗീകൃത ആധാർ കേന്ദ്രം നേരിട്ട് സന്ദർശിക്കേണ്ടതുണ്ട്.

കൂടാതെ, ഓരോ 10 വർഷത്തിലും കുട്ടികളുടെ ആധാർ വിശദാംശങ്ങൾ അപ്‌ഡേറ്റ് ചെയ്യാൻ ശുപാർശ ചെയ്യുന്നു. അല്ലെങ്കിൽ അവർക്ക് 15 വയസ്സ് തികയുമ്പോൾ, അവരുടെ പുതുക്കിയ ബയോമെട്രിക് വിവരങ്ങൾ ഉൾപ്പെടുത്താൻ ശുപാർശ ചെയ്യുന്നു. ബയോമെട്രിക് വിവരങ്ങൾ അപ്ഡേറ്റ് ചെയ്യാനായി നിങ്ങളുടെ കുട്ടിയുമായി അടുത്തുള്ള ആധാർ എൻറോൾമെൻ്റ് കേന്ദ്രം സന്ദർശിക്കുക.

അവിടുന്ന് ലഭിക്കുന്ന ആധാർ എൻറോൾമെൻ്റ് ഫോം പൂരിപ്പിക്കുക. കുട്ടിക്ക് അഞ്ച് വയസ്സിന് താഴെ പ്രായമുണ്ടെങ്കിൽ, നിങ്ങളുടെ കുട്ടിയുടെ ബയോമെട്രിക് ഡാറ്റയോ ഫോട്ടോയോ സമർപ്പിക്കുക. ശേഷം ബയോമെട്രിക് അപ്ഡേറ്റുകൾക്ക് ബാധകമായ ഫീസ് അടയ്ക്കുക. ഇത്രയുമാണ് കുട്ടികളുടെ ബയോമെട്രിക് വിവരങ്ങൾ അപ്‌ഡേറ്റ് ചെയ്യുവാൻ ചെയ്യേണ്ടത്.

ഈ ലേഖനം നിങ്ങൾക്ക് ഉപകാരപ്രദം എന്ന് തോന്നുന്നുണ്ടോ? ഇത്തരത്തിൽ ഉപകാരപ്രദമായ നിരവധി ലേഖനങ്ങൾ Gizbot മലയാളത്തിൽ ഉണ്ട്. കൂടുതൽ ടെക്ക് ന്യൂസുകൾ, ടെക്ക് ടിപ്‌സുകൾ, റിവ്യൂകൾ, ലോഞ്ചുകൾ എന്നിവക്ക് Gizbot മലയാളം ഫോള്ളോ ചെയ്യൂ. ലേഖനങ്ങളിൽ പറയുന്നവ നിങ്ങൾക്ക് ഉപകാരപ്പെടുമെന്ന് ഉറപ്പാണ്.