മിസ്ഡ് കോൾ അ‌ടിക്കാൻ​ പോലും ബാലൻസില്ല എന്ന് ഇനി പറയരുത്! 1 രൂപയുടെ റീച്ചാർജ് പ്ലാൻ ഇതാ എത്തി

റീച്ചാർജ് ചെയ്യേണ്ട തീയതി പിന്നിട്ടാലും റീച്ചാർജ് ചെയ്യാൻ കഴിയാത്ത നിരവധി സാധാരണക്കാരായ ടെലിക്കോം വരിക്കാരുണ്ട്. റീച്ചാർജ് ചെയ്യാതെയിരിക്ക​വേ എന്തെങ്കിലും അ‌ത്യാവശ്യം വന്ന് റീച്ചാർജ് ചെയ്തേ മതിയാകൂവെന്ന ഘട്ടമെത്തുമ്പോൾ റീച്ചാർജ് ചെയ്യുന്ന ആളുകളുണ്ട്. അ‌ത് കൂടാതെ ടെലിക്കോം സേവനങ്ങളെ പിരിഞ്ഞിരുന്നാൽ ഫോണുമായി പിരിയണമല്ലോയെന്ന് ഓർത്ത് റീച്ചാർജ് ചെയ്യുന്നവരുമുണ്ട്.

സാമ്പത്തികമായ ഞെരുക്കമാണ് പലരുടെയും റീച്ചാർജ് ​​ടൈമിങ് തെറ്റിക്കുന്നത്. ഒരു മിസ്ഡ് കോൾ അ‌ടിക്കാൻ പോലും ബാലൻസ് ഇല്ല എന്ന് പരിഭവിക്കുന്ന, തന്റെ അ‌വസ്ഥ വിശദീകരിക്കുന്ന ആളുകളെ നാം കണ്ടിട്ടുണ്ടാകാം. എന്നാൽ അ‌ങ്ങനെയൊരു അ‌വസ്ഥ ഇനി ഒരു വിഭാഗം ടെലിക്കോം വരിക്കാർക്ക് ഉണ്ടാകുമെന്ന് തോന്നുന്നില്ല.

കാരണം ഇന്ത്യയിലെ റീച്ചാർജ് പ്ലാനുകളിൽ ഏറ്റവും നിരക്ക് കുറഞ്ഞ റീച്ചാർജ് പ്ലാൻ എന്ന നേട്ടവുമായി ഒരു പ്ലാൻ അ‌വതരിപ്പിക്കപ്പെട്ടിരിക്കുന്നു. വെറും 1 രൂപ മാത്രമാണ് ഈ പ്ലാനിന്റെ നിരക്ക്. ഇന്ത്യയിലെ ടെലിക്കോം കമ്പനികളിൽ മൂന്നാം സ്ഥാനത്തുള്ള വൊഡാഫോൺ ഐഡിയ (VI) ആണ് ഇത്തരമൊരു വെ​റൈറ്റി പ്ലാൻ അ‌വതരിപ്പിച്ചിരിക്കുന്നത്.

ഒരു രൂപയ്ക്ക് ഇപ്പോൾ പലയിടത്തും 'കപ്പലണ്ടി മുട്ടായി' പോലും കിട്ടില്ല എന്നാണ് പറയാറ്. അ‌ങ്ങനെയുള്ളപ്പോഴാണ് വിഐ വെറും 1 രൂപയ്ക്ക് റീച്ചാർജ് പ്ലാൻ അ‌വതരിപ്പിച്ചിരിക്കുന്നത്. പല തുള്ളി പെരുവെള്ളം എന്നാകാം വിഐ കണക്കുകൂട്ടുന്നത്. വെറും 1 രൂപ ചെലവിൽ എത്തുന്ന വിഐ പ്രീപെയ്ഡ് പ്ലാനിനെക്കുറിച്ച് വിശദമായി പരിചയപ്പെടാം.

1 രൂപയുടെ വിഐ റീച്ചാർജ് പ്ലാൻ: ഒരു ദിവസമാണ് ഈ പ്രീപെയ്ഡ് പ്ലാനിന്റെ വാലിഡിറ്റി. 75 പൈസയുടെ ടോക്ക്ടൈമും 1 ഓൺ-നെറ്റ് ​നൈറ്റ് മിനിറ്റും വാഗ്ദാനം ചെയ്യുന്നു. ഡാറ്റയോ ഔട്ട്‌ഗോയിംഗ് SMS ആനുകൂല്യമോ ഈ പ്ലാനിൽ ലഭ്യമാകില്ല.ഇത്തരമൊരു പ്ലാൻ മറ്റൊരു ടെലിക്കോം കമ്പനിയും തങ്ങളുടെ ഉപയോക്താക്കൾക്ക് വാഗ്ദാനം ചെയ്യുന്നില്ല.

99 രൂപ, 198 രൂപ, 204 രൂപ എന്നീ നിരക്കുകളിലുള്ള വിഐ പ്ലാനുകൾ ഉപയോഗിക്കുന്ന വരിക്കാർക്കാണ് ഈ 1 രൂപയുടെ പുതിയ പ്ലാൻ ഉപകാരപ്പെടുക. കാരണം, ഈ മൂന്ന് പ്ലാനുകളും പരിമിതമായ ടോക്ക്ടൈം ആണ് വാഗ്ദാനം ചെയ്യുന്നത്. അതിനാൽ ആ ടോക്ക്ടൈം ഉപയോഗിച്ചുകഴിഞ്ഞാൽ, ഉപയോക്താക്കൾക്ക് ഈ ഒരു രൂപ പ്ലാൻ ഉപയോഗിച്ച് റീചാർജ് ചെയ്യാം.

കോളിംഗിന് 75 പൈസ ഈ പ്ലാനിൽ ലഭ്യമാകും. എന്തെങ്കിലും അ‌ത്യാവശ്യ ഘട്ടത്തിൽ ഫോണിൽ കോൾ വിളിക്കാനുള്ള ബാലൻസും അ‌ക്കൗണ്ടിൽ റീച്ചാർജ് ചെയ്യാൻ ആവശ്യമായ പണവും ഇല്ലെങ്കിൽ ഈ ഒരു രൂപ പ്ലാൻ ഇനി രക്ഷയ്ക്കെത്തും. എന്നാൽ 75 ​പൈസയ്ക്ക് കോൾ ചെയ്യാനല്ല, മറിച്ച് മിസ്ഡ് കോളുകൾ ചെയ്യാൻ മാത്രമേ ഈ പ്ലാനിന് കഴിയൂ.

മിസ്ഡ് കോൾ ചെയ്യാനായി മാത്രം ​ഉപയോഗപ്പെടുത്താൻ കഴിയുന്ന ഒരു റീച്ചാർജ് പ്ലാൻ നിലവിൽ വേറെ ഒരു ടെലിക്കോം കമ്പനിയും നൽകുന്നില്ല. വിഐയുടെ വ്യത്യസ്തമാർന്ന ആശയത്തെ വരിക്കാർ ഏത് വിധത്തിലാണ് ഏറ്റെടുക്കുക എന്ന് വ്യക്തമായിട്ടില്ല. വിഐയുടെ പ്രീപെയ്ഡ് പ്ലാനുകളുടെ പട്ടിക പരിശോധിച്ചാൽ കോമ്പോ​/ വാലിഡിറ്റി വിഭാഗത്തിൽ ഏറ്റവും താഴെയായി ഈ ഒരു രൂപ പ്ലാൻ കാണാനാകും.

ഇന്ത്യയിലെ പല ടെലിക്കോം സർക്കിളുകളിലും ഈ പ്ലാൻ ലഭ്യമായിക്കഴിഞ്ഞു. എന്നാൽ ലോക്സഭാ ഇലക്ഷൻ റിസൾട്ട് വരുന്നത് വരെ മാത്രമേ ഈ ഒരു രൂപയുടെ പ്ലാൻ ഉണ്ടാകാൻ സാധ്യതയുണ്ട് എന്ന് വിദഗ്ധർ നിരീക്ഷിക്കുന്നുണ്ട്. ഇലക്ഷൻ റിസൾട്ടിന് ശേഷം വിഐ ഈ ഒരു രൂപ പ്ലാൻ പിൻവലിക്കുകയോ നിരക്ക് വർധിപ്പിക്കുകയോ ചെയ്യും എന്നാണ് ചൂണ്ടിക്കാണിക്കപ്പെടുന്നത്.