വൊഡാഫോൺ ഐഡിയയുടെ കിടിലൻ നീക്കം! പ്രീപെയിഡ് ഉപയോക്താക്കൾക്കും ഇനി ഫാമിലി ഡാറ്റ ഷെയറിംഗ്, അറിയേണ്ടതെല്ലാം

പ്രീപെയിഡ് ഉപയോക്താക്കൾക്കായി രാജ്യത്താദ്യമായി ഫാമിലി ഡാറ്റാ ഷെയറിംഗ് ഫീച്ചറുമായി വൊഡാഫോൺ ഐഡിയ (Vi). 'വി പ്രീപെയിഡ് ഫാമിലി' (Vi Prepaid Family) എന്ന പേരിൽ അവതരിപ്പിച്ച ഈ സേവനത്തിലൂടെ രാജ്യത്തെവിടെയുള്ള ബന്ധുക്കൾക്കും ഇനി പ്രീപെയിഡ് ഡാറ്റ അയച്ചുനൽകാൻ സാധിക്കും. ഉത്സവകാല യാത്രകളിലും മറ്റും പെട്ടെന്ന് ഡാറ്റ തീർന്നുപോയാൽ അടിയന്തരമായി ടോപ്പ്-അപ്പുകൾ ചെയ്യേണ്ടിവരുന്ന ബുദ്ധിമുട്ട് ഒഴിവാക്കാൻ ഇത് സഹായിക്കും. 'വി' ആപ്പിലൂടെ രാജ്യത്തുടനീളം ഈ സേവനം ലഭ്യമാണ്. ഇതിനൊപ്പം ആപ്പ് വഴി റീച്ചാർജ് ചെയ്യുന്നവർക്ക് പ്രത്യേക ഓഫറുകളും വി വാഗ്ദാനം ചെയ്യുന്നുണ്ട്.

എന്നാൽ ഈ സേവനത്തിന് ചില പ്രധാന നിബന്ധനകളുണ്ട്. ഒരു ഫാമിലി ഗ്രൂപ്പിൽ പരമാവധി നാല് അംഗങ്ങളെ വരെ ചേർക്കാം. ഒരാളെ ഗ്രൂപ്പിൽ ഉൾപ്പെടുത്തിയാൽ 90 ദിവസത്തേക്ക് മാറ്റാൻ കഴിയില്ല (ലോക്ക്-ഇൻ പിരീഡ്). ഒറ്റത്തവണയായി 500 എംബി ഡാറ്റയാണ് കൈമാറാനാകുക. ഈ ഡാറ്റയ്ക്ക് അന്ന് രാത്രി 11:59 വരെ മാത്രമേ കാലാവധിയുണ്ടാകൂ. ദിവസത്തിൽ ഒരു തവണയും, ആഴ്ചയിൽ രണ്ടുതവണയും, മാസത്തിൽ പരമാവധി നാല് തവണയും മാത്രമേ ഡാറ്റ ഷെയർ ചെയ്യാനാകൂ. രാജ്യത്തെ എല്ലാ ടെലികോം സർക്കിളുകളിലും ഈ ഫീച്ചർ ലഭ്യമാണ്.

വി പ്രീപെയിഡ് ഫാമിലി പ്ലാൻ: എങ്ങനെ സെറ്റ് ചെയ്യാം, ഡാറ്റ ഷെയർ ചെയ്യാം?

വി ആപ്പിലൂടെയാണ് ഇത് സെറ്റ് ചെയ്യേണ്ടത്. ആപ്പിലെ 'ഫാമിലി' ഓപ്ഷനിൽ ക്ലിക്ക് ചെയ്ത് ഗ്രൂപ്പ് ഉണ്ടാക്കി, ഫോണിലെ കോൺടാക്റ്റുകളിൽ നിന്ന് അംഗങ്ങളെ ക്ഷണിക്കാം. ലഭിക്കുന്ന ഒടിപി (OTP) വെരിഫൈ ചെയ്യുന്നതോടെ ഇവർ ഗ്രൂപ്പിന്റെ ഭാഗമാകും. ഒരു ഗ്രൂപ്പിൽ കുറഞ്ഞത് രണ്ട് അംഗങ്ങളെങ്കിലും ഉണ്ടായിരിക്കണം. ഫാമിലി ഗ്രൂപ്പ് വഴി ഡാറ്റ കൈമാറാനും ബാലൻസ് പരിശോധിക്കാനും സാധിക്കും. കൂടാതെ 99 രൂപയ്ക്ക് മുകളിലുള്ള റീച്ചാർജുകൾക്ക് ആപ്പ് വഴി പ്രത്യേക ഡിസ്കൗണ്ടുകളും ലഭിക്കും.

ജിയോ, എയർടെൽ പ്ലാനുകളിൽ നിന്ന് ഇത് എങ്ങനെ വ്യത്യസ്തമാകുന്നു?

എയർടെലും ജിയോയും തങ്ങളുടെ പോസ്റ്റ്‌പെയിഡ് ഉപയോക്താക്കൾക്ക് മാത്രമാണ് നിലവിൽ ഫാമിലി ഷെയറിംഗ് സൗകര്യം നൽകുന്നത്. എയർടെലിന്റെ 'ഫാമിലി', ജിയോയുടെ 'ജിയോ പ്ലസ്' എന്നിവയിലൂടെ പോസ്റ്റ്‌പെയിഡ് ഉപയോക്താക്കൾക്ക് ഡാറ്റ പൂൾ ചെയ്യാനും അംഗങ്ങളെ ചേർക്കാനും കഴിയും. എന്നാൽ പ്രീപെയിഡ് ഉപയോക്താക്കൾക്കായി ഇരു കമ്പനികളും നിലവിൽ ഇങ്ങനെയൊരു പ്ലാൻ നൽകുന്നില്ല. അതിനാൽ തന്നെ പ്രീപെയിഡിൽ ഫാമിലി പ്ലാൻ അവതരിപ്പിച്ച വൊഡാഫോൺ ഐഡിയയുടെ നീക്കം ശ്രദ്ധേയമാണ്. അതേസമയം, ഇത്തരം ഗ്രൂപ്പ് ആനുകൂല്യങ്ങൾ ആവശ്യമില്ലാത്തവർക്ക് സാധാരണ അൺലിമിറ്റഡ് പ്ലാനുകൾ തന്നെ തിരഞ്ഞെടുക്കാവുന്നതാണ്.

ഡാറ്റ ഷെയറിംഗ് ഉപയോഗിക്കുന്നതിന് മുൻപ് ചില കാര്യങ്ങൾ ശ്രദ്ധിക്കേണ്ടതുണ്ട്. ആഡ്-ഓൺ പാക്കുകൾ, നൈറ്റ് ഡാറ്റ, വീക്കെൻഡ് റോൾഓവർ ഡാറ്റ എന്നിവ ഷെയർ ചെയ്യാൻ കഴിയില്ല. ഡാറ്റ അയക്കുന്ന ആൾക്കും ലഭിക്കുന്ന ആൾക്കും ആക്ടീവ് വാലിഡിറ്റിയുള്ള പ്ലാൻ ഉണ്ടായിരിക്കണം. ഡാറ്റ പെട്ടെന്ന് തീർന്നുപോകുന്ന സന്ദർഭങ്ങളിൽ അടിയന്തര ടോപ്പ്-അപ്പുകൾ ഒഴിവാക്കാൻ ഈ ഫീച്ചർ ഏറെ ഉപകാരപ്പെടും. കൂടുതൽ ഡാറ്റ ആവശ്യമുള്ള ദിവസങ്ങൾ മുൻകൂട്ടി കണ്ട് ആപ്പ് വഴി കൃത്യമായി റീച്ചാർജ് ചെയ്താൽ ഈ സേവനം പരമാവധി പ്രയോജനപ്പെടുത്താം.