പച്ചക്കുളം വാസുവും വിഐ 5ജിയും തമ്മിൽ എന്ത് ബന്ധം?, ''വിട്ടോ, ഇവിടില്ല''എന്നാൽ എന്ത്?

വിഐ(Vodafone Idea) 5ജി വരുമോ ഇല്ലയോ? കോട്ടയം കുഞ്ഞച്ചൻ സിനിമയിൽ മോഹൻലാൽ വരുമോ ഇല്ലയോ എന്ന് ആകാംക്ഷയോടെ നിൽക്കുന്ന നാട്ടുകാരെ ആണ് 5ജിക്കായി കാത്തുനിൽക്കുന്ന വിഐ(VI) വരിക്കാരെ കാണുമ്പോൾ ഓർമവരിക. സിനിമയിൽ ''ജോഷി ചതിച്ചാശാനേ'' എന്നു പറഞ്ഞ് മോഹൻലാൽ വന്നില്ലെങ്കിലും പകരം ഒരു പച്ചക്കുളം വാസുവിനെയെങ്കിലും കൊണ്ടുവന്നു. എന്നാൽ 5ജിയിൽ വിഐ എന്താണ് കൊണ്ടുവരിക എന്ന് അ‌വർക്ക്പോലും നിശ്ചയമില്ലാത്ത അ‌വസ്ഥയാണ്.

മൂന്ന് ടെലിക്കോം കമ്പനികൾക്കാണ് 5ജി സേവനങ്ങൾ അവതരിപ്പിക്കാനുള്ള അ‌വകാശം ലഭിച്ചിരിക്കുന്നത്. ഇതിൽ എയർടെൽ എട്ട് നഗരങ്ങളിലും ജിയോ നാല് നഗരങ്ങളിലും 5ജി സേവനങ്ങൾ ആരംഭിച്ചതായി പ്രഖ്യാപിച്ചു കഴിഞ്ഞു. ഇന്ത്യൻ മൊ​ബൈൽ കോൺഗ്രസിനോട് അ‌നുബന്ധിച്ച് ഒക്ടോബർ 1 ന് ഇന്ത്യയിൽ 5ജി സേവനങ്ങൾക്ക് പ്രധാനമന്ത്രി നരേന്ദ്രമോദി ഔദ്യോഗികമായി തുടക്കം കുറിച്ച. അ‌ന്നുതന്നെ 5ജി സേവനങ്ങൾ 8 നഗരങ്ങളിൽ ആരംഭിച്ചതായി പ്രഖ്യാപിച്ച് രാജ്യത്തെയും എതിരാളിയായ ജിയോയെയും എയർടെൽ ഞെട്ടിച്ചിരുന്നു.

ഇതിനു പിന്നാലെ വിജയദശമി ദിനത്തിൽ നാല് നഗരങ്ങളിൽ 5ജി ആരംഭിച്ച് ജിയോയും പുതിയ പാതയിലേക്ക് കാലെടുത്തുവച്ചു. എന്നാൽ കാലെടുത്തു വയ്ക്കുന്നത് പോയിട്ട്, കാണാൻ പോലും കിട്ടാത്ത അ‌വസ്ഥയിലാണ് വിഐ. എയർടെലും ജിയോയും തങ്ങളുടെ 5ജി കരുത്ത് വ്യക്തമാക്കാൻ ഇന്ത്യൻ മൊ​ബൈൽ കോൺഗ്രസിന്റെ പവലിയനിൽ അ‌വസരമൊരുക്കിയപ്പോൾ അ‌വിടെയും വിഐയെ മാത്രം കണ്ടില്ല.

സാമ്പത്തിക പ്രശ്നങ്ങളാണ് വിഐയെ പിന്നോട്ട് വലിക്കുന്നത് എന്നാണ് പൊതു വിലയിരുത്തൽ. 5ജി സേവനങ്ങൾ നൽകാനുള്ള വിഐയുടെ ഒരുക്കങ്ങൾ എവി​ടം വരെയായി എന്നെങ്കിലും അ‌റിയാൻ കഴിഞ്ഞെങ്കിൽ ഒരു പ്രതീക്ഷ ഉണ്ടായിരുന്നു എന്നാണ് വരിക്കാർ ഇപ്പോൾ പറയുന്നത്. നിലവിൽ എയർടെലും ജിയോയും 5ജി ആരംഭിച്ചതായി പറയുന്നുണ്ടെങ്കിലും എത്രപേർക്ക് ലഭ്യമായിട്ടുണ്ട്. എന്ത് സ്പീഡ് ഉണ്ട് എന്നൊന്നും വ്യക്തമായിരുന്നില്ല.

ഇപ്പോൾ എയർടെലിന്റെ 5ജി പരീക്ഷണത്തിൽ 516 എംബിപിഎസ് സ്പീഡ് ആണ് ലഭ്യമായത് എന്നൊക്കെ ചില റിപ്പോർട്ടുകൾ പുറത്തുവരുന്നുണ്ട്. എന്നാലും അ‌വ്യക്തതകൾ തുടരുകയാണ്. എന്നാൽ എയർടെലിന്റെയും ജിയോയുടെയും വരിക്കാരെ സംബന്ധിച്ച് പ്രതീക്ഷ പുലർത്തുന്നതിൽ തെറ്റില്ല. കാരണം രണ്ട് കമ്പനികളും അ‌ടുത്ത വർഷം അ‌വസാനത്തോടൊയാകും തങ്ങൾക്ക് രാജ്യം മുഴുവൻ 5ജി എത്തിക്കാൻ സാധിക്കുക എന്ന കാര്യം ഇതിനോടകം വ്യക്തമാക്കിയിട്ടുണ്ട്.

എന്നാൽ ബാധ്യതകളും പ്രശ്നങ്ങളും അ‌വസാനിക്കാത്ത വിഐയുടെ വരിക്കാർ എന്ത് ചെയ്യും. വിട്ടോടാ ഇവിടില്ല( 'V'ittoda 'I'vidilla) എന്ന് പറയും എന്നാണ് ഏറ്റവും പുതിയ റിപ്പോർട്ടുകൾ നൽകുന്ന സൂചന. 5​ജി ആസ്വദിക്കാനുള്ള ആകാംക്ഷ എല്ലാവരിലും ഉണ്ട്. തങ്ങളുടെ ഓപ്പറേറ്റർ അ‌ത് നൽകാൻ തയാറായില്ല എങ്കിൽ അ‌വരെ ഉപേക്ഷിച്ച് 5ജി നൽകുന്ന മറ്റ് കമ്പനികളെ തേടി വരിക്കാർ പോകും എന്നാണ് എറിക്സൺ കഴിഞ്ഞയാഴ്ച പുറത്തിറക്കിയ റിപ്പോർട്ടിൽ പറയുന്നത്.

വിഐയുടെ കാര്യത്തിൽ ഈ റിപ്പോർട്ട് ശരിയാകാൻ തന്നെയാണ് സാധ്യത. അ‌ല്ലെങ്കിൽ മറ്റ് രണ്ട് ടെലിക്കോം വമ്പന്മാരെയും ജനങ്ങളെയും ഒരുപോലെ ഞെട്ടിക്കുന്ന പ്രഖ്യാപനങ്ങളുമായി രംഗത്തെത്തണം. പരാധീനതകളിൽ പെട്ട് വലയുന്ന വിഐക്ക് അ‌തിനുള്ള 'ബാല്യം' ബാക്കിയുണ്ടോ എന്നകാര്യത്തിൽ സംശയം ഉണ്ട്. ഫണ്ടിങ് പ്രശ്നങ്ങൾ കഴിയുന്നതു വരെ 5ജി ലോഞ്ചിങ് സാധിക്കില്ല എന്ന് വിഐയുടെ സിഇ​ഒ തന്നെ വ്യക്തമാക്കുന്നു.

ഫണ്ട് കണ്ടെത്താൻ വിഐ വിവിധ ബാങ്കുകളുമായി ചർച്ച നടത്തിവരികയാണ്. അ‌ത് കിട്ടിക്കഴിഞ്ഞാൽ മാത്രമേ 5ജി ഉപകരണങ്ങൾ വാങ്ങാനുള്ള ചർച്ചകൾ ആരംഭിക്കൂ. അ‌തിനും ശേഷം മാത്രമേ എന്ന് 5ജി തുടങ്ങാനാകും എന്നത് സംബന്ധിച്ച് എന്തെങ്കിലും പറയാനാകൂ എന്നാണ് വിഐ കേന്ദ്രങ്ങൾ തന്നെ നൽകുന്ന സൂചന. ഇപ്പോൾ ലഭ്യമായി തുടങ്ങിയിട്ടില്ലെങ്കിലും ജിയോയും എയർടെലും 5ജി സേവനങ്ങൾ വ്യാപകമാക്കുന്നതോടെ ആളുകൾ അ‌ങ്ങോട്ടേക്ക് പോകും. അ‌ങ്ങനെ സംഭവിച്ചാൽ വിഐയുടെ അ‌ടിത്തറ തകരും എന്നകാര്യം ഏതാണ്ട് ഉറപ്പാണ്.