ഗാഡ്ജറ്റുകളിലെ ഐപി റേറ്റിങുകളെക്കുറിച്ച് അറിയേണ്ടതെല്ലാം

എന്താണ് ഐപി റേറ്റിങ്

ഇലക്ട്രോണിക്സ് ഡിവൈസുകൾക്ക് പൊടിയിൽ നിന്നും വെള്ളത്തിൽ നിന്നുമുള്ള സംരക്ഷണം കമ്പനികൾ ഉറപ്പാക്കാറുണ്ട്. ഇതിന്റെ ശേഷി അളക്കുന്നതിന് സാർവത്രികമായി അംഗീകരിക്കപ്പെട്ട യൂണിറ്റാണ് ഐപി റേറ്റിങ്. നിങ്ങളുടെ കയ്യിലുള്ള ഏത് ഗാഡ്ജറ്റിനും ഈ റേറ്റിങ് ഉണ്ടായിരിക്കും. പൊടിയിൽ നിന്നും വെള്ളത്തിൽ നിന്നും ഗാഡ്ജറ്റിന്റെ ബോഡിക്കുള്ളിലെ ഇലക്ട്രിക്ക് പാർട്ടുകൾക്ക് എത്ര മാത്രം സംരക്ഷണം ഉണ്ടെന്നുള്ളതാണ് ഈ റേറ്റിങ് വ്യക്തമാക്കുന്നത്.

ഡിവൈസിലെ ഐപി റേറ്റിങ് അതിൽ ലഭ്യമായിരിക്കുന്ന പ്രൊട്ടക്ഷന്റെ റഫറൻസ് മാത്രമാണെന്നത് യൂസേഴ്സ് മനസിലാക്കണം. ഐപി റേറ്റിങ് ഉള്ള ഡിവൈസുകൾക്ക് കേടുപാടുകൾ ഉണ്ടാകില്ല എന്നൊരു ധാരണ പാടില്ല. മാത്രമല്ല വ്യത്യസ്ത ഐപി റേറ്റിങുകൾ ഉള്ള ഡിവൈസുകൾ വ്യത്യസ്തമായ പ്രതിരോധം ഓഫർ ചെയ്യുന്നു. ഐപി68 റേറ്റിങ് ഉള്ള ഡിവൈസിന്, ഐപി55 റേറ്റിങ് ഉള്ള ഡിവൈസിനെക്കാളും പൊടിയിൽ നിന്നും വെള്ളത്തിൽ നിന്നും സംരക്ഷണം ലഭിക്കും. ഐപി റേറ്റിങ് പൊടിയിൽ നിന്നും വെള്ളത്തിൽ നിന്നുമാണ് ഗാഡ്ജറ്റുകൾക്ക് സംരക്ഷണം നൽകുന്നത്. കോഫി, മദ്യം എന്നിവ പോലെയുള്ള മറ്റ് ലിക്വിഡുകൾ ഈ കൂട്ടത്തിൽ ഉൾപ്പെടുത്തരുത്.

ഐപി റേറ്റിങുകൾ വെള്ളത്തിനും പൊടിക്കും എതിരായ പ്രൊട്ടക്ഷന്റെ സ്റ്റാൻഡേർഡ് മെഷർമെന്റ് ആണ്. അന്താരാഷ്ട്ര ഇലക്ട്രോ ടെക്നിക്കൽ കമ്മീഷനാണ് (ഐഇസി) ഇത് ഔദ്യോഗികമായി സ്റ്റാൻഡേർഡൈസ്ഡ് ചെയ്യുന്നത്. ഒരു ഇലക്ട്രോണിക് ഡിവൈസിന് ഐപി റേറ്റിങ് നൽകുന്നതിന് മുമ്പ് അതി നിരവധി ലാബ് പരിശോധനകൾക്ക് വിധേയം ആകാറുണ്ട്. ഐപി റേറ്റിങിന്റെ മെഷർമെന്റുകളെക്കുറിച്ച് കൂടുതൽ അറിയാൻ താഴേക്ക് വായിക്കുക.

എല്ലാ ഐപി റേറ്റിങും ഐപി68, ഐപി55 എന്നിങ്ങനെയുള്ള രണ്ട് നമ്പരുകളിലാണ് വരുന്നത്. ആദ്യത്തെ അക്കം പൊടിയിൽ നിന്നും കണികകളിൽ നിന്നുമുള്ള സംരക്ഷണത്തെ സൂചിപ്പിക്കുന്നു. 0 മുതൽ 6 വരെയുളള സ്കെയിലിൽ ആണ് ഇത് വരുന്നത്. 6 ആണ് ഏറ്റവും ഉയർന്ന റേറ്റിങ്. രണ്ടാമത്തെ അക്കം ജല പ്രതിരോധത്തെ പ്രതിനിധീകരിക്കുന്നു. 0 മുതൽ 8 വരെയുള്ള സ്കെയിലിൽ ആണ് ഇത് വരുന്നത്. എട്ട് ആണ് ഏറ്റവും കൂടിയ റേറ്റിങ്. ഒരു ഡിവൈസിന് ലഭ്യമാകുന്ന ഏറ്റവും ഉയർന്ന ഐപി റേറ്റിങ് ആണ് ഐപി68. വിവിധ ഐപി റേറ്റിങുകളും അവ അർഥമാക്കുന്നത് എന്തെന്നും അറിയാൻ തുടർന്ന് വായിക്കുക.

• ഐപി68 റേറ്റിങ് - 1.5 മീറ്റർ വരെ ആഴമുള്ള വെള്ളത്തിൽ മുങ്ങിക്കിടന്നാലും 30 മിനിറ്റ് വരെ സംരക്ഷണം ലഭിക്കുന്നു. പൊടിയിൽ നിന്നും പ്രൊട്ടക്ഷൻ ലഭിക്കും.
• ഐപി67 റേറ്റിങ് - 1 മീറ്റർ വരെ ആഴമുള്ള വെള്ളത്തിൽ മുങ്ങിക്കിടന്നാലും 30 മിനിറ്റ് വരെ സംരക്ഷണം ലഭിക്കുന്നു. പൊടിയിൽ നിന്നും പ്രൊട്ടക്ഷൻ ലഭിക്കും.
• ഐപി55 റേറ്റിങ് - വിയർപ്പിൽ നിന്നും പൊടിയിൽ നിന്നും സംരക്ഷണം ലഭിക്കുന്നു.
• ഐപിഎക്സ്5 റേറ്റിങ് - പൊടിയിൽ നിന്നും യാതൊരു സംരക്ഷണവും ഇല്ല. വെള്ളത്തിനെതിരെ അൽപ്പം പ്രൊട്ടക്ഷനും ലഭിക്കുന്നു.