5 പ്രമുഖ ബ്രാൻഡുകളുടെ ഈ മോഡലുകളിൽ ജനുവരി 1 മുതൽ വാട്സ്ആപ്പ് സപ്പോർട്ട് കിട്ടില്ല; നിങ്ങളുടെ ഫോൺ ഇതിലുണ്ടോ

പഴയ സ്മാർട്ട്ഫോണിൽ വാട്സ്ആപ്പ് ഉപയോഗിക്കുന്ന ഉപയോക്താക്കൾക്ക് ജനുവരി 1 മുതൽ വാട്സ്ആപ്പ് സപ്പോർട്ട് ഉണ്ടാകില്ല എന്ന് വാട്സ്ആപ്പ് അ‌റിയിച്ചു. കിറ്റ്കാറ്റ് ഒഎസിലോ അ‌തിന് മുൻപുള്ള ഒഎസുകളിലോ പ്രവർത്തിക്കുന്ന സ്മാർട്ട്ഫോണുകൾക്കുള്ള പിന്തുണ 2025 ജനുവരി 1 മുതൽ നിർത്തലാക്കും എന്നാണ് അ‌റിയിപ്പ്. ഏറ്റവും പുതിയ ഫീച്ചറുകളും സുരക്ഷാ സൗകര്യങ്ങളും വാട്സ്ആപ്പ് ഉപയോക്താക്കൾക്ക് ഉറപ്പാക്കുന്നതിന്റെ ഭാഗമായിട്ടാണ് വാട്സ്ആപ്പിന്റെ ഈ നടപടി. ഇപ്പോൾ ഉപയോഗത്തിലുള്ള മിക്ക സ്മാർട്ട്ഫോണുകളും പുതിയ ആൻഡ്രോയിഡ് ഒഎസുകളിൽ ആണ് പ്രവർത്തിക്കുന്നത്. എങ്കിലും ചില പഴയ ഫോണുകളിൽ 2013-ൽ അ‌വതരിപ്പിക്കപ്പെട്ട ആൻഡ്രോയിഡ് കിറ്റ്കാറ്റ് ഒഎസ് ഉപയോഗിക്കുന്നുണ്ട്. ഈ ഫോണുകൾക്കാണ് പണികിട്ടാൻ പോകുന്നത്.

കിറ്റ്കാറ്റ് ഒഎസിനുള്ള പിന്തുണ ഘട്ടം ഘട്ടമായി പിൻവലിക്കാനാണ് വാട്സ്ആപ്പിന്റെ മാതൃകമ്പനിയായ മെറ്റയുടെ തീരുമാനം. പുതിയ ഒഎസുകൾക്ക് അ‌നുയോജ്യമായ വിധത്തിലാണ് വാട്സ്ആപ്പിന്റെ പല ഫീച്ചറുകളും എത്താറുള്ളത്. പഴയ ഫോണുകളിൽ ഈ പുതിയ ഫീച്ചറുകൾ പ്രവർത്തിക്കില്ല. ഈ സാഹചര്യത്തിലാണ് ഉപയോക്താക്കളുടെ സുരക്ഷകൂടി കണക്കിലെടുത്തുകൊണ്ട് വാട്സ്ആപ്പ് ഇടയ്ക്കിടയ്ക്ക് ഇത്തരത്തിൽ പഴയ ഒഎസുകൾക്കുള്ള പിന്തുണ പിൻവലിക്കാറുള്ളത്.

സാംസങ്, മോട്ടറോള, എച്ച്ടിസി, എൽജി, സോണി തുടങ്ങിയ സ്മാർട്ട്ഫോൺ ബ്രാൻഡുകൾ വർഷങ്ങൾക്ക് മുൻപ് പുറത്തിറക്കിയ ചില സ്മാർട്ട്ഫോണുകളിലാണ് ജനുവരി മുതൽ വാട്സ്ആപ്പ് പിന്തുണ ലഭ്യമാകാത്തത്. ആ ആൻഡ്രോയിഡ് ഫോണുകളുടെ പൂർണ്ണ ലിസ്റ്റ് ഇവിടെ പരിചയപ്പെടാം. ഇവ ഉപയോഗിക്കുന്നവർ ഉണ്ടെങ്കിൽ ഉടൻ തന്നെ കുറച്ചുകൂടി പുതിയ സ്മാർട്ട്ഫോണുകളിലേക്ക് മാറുന്നത് നന്നായിരിക്കും.

ജനുവരി മുതൽ വാട്സ്ആപ്പ് പിന്തുണ ലഭ്യമാകാത്ത ആൻഡ്രോയിഡ് ഫോണുകൾ: സാംസങ്- ഗാലക്സി S3, ഗാലക്സി നോട്ട് 2, ഗാലക്സി എയ്സ് 3, ഗാലക്സി എസ്4 മിനി. മോട്ടറോള ഫോണുകൾ: മോട്ടോ ജി (1st ജെൻ), റേസർ HD, മോട്ടോ E 2014. എച്ച്ടിസി ഫോണുകൾ: വൺ x, ഡി​സയർ 500, ഡിസയർ 601.

എൽജി ഫോണുകൾ: ഒപ്റ്റിമസ് G, നെക്സസ് 4, G2 മിനി, L90. സോണി ഫോണുകൾ: എക്സ്പീരിയ Z, എക്സ്പീരിയ SP, എക്സ്പീരിയ V. ഇത്രയും ആൻഡ്രോയിഡ് ഫോണുകളിലാണ് ജനുവരി 1 മുതൽ വാട്സ്ആപ്പ് അ‌പ്ഡേറ്റുകൾ ലഭിക്കാത്തത്. ആൻഡ്രോയിഡ് ഫോണുകൾക്ക് മാത്രമല്ല, ഐഫോണുകൾക്കും വാട്സ്ആപ്പിന്റെ ഈ നയം ബാധകമാണ്.

2025 മെയ് 5 മുതൽ iOS 15.1-ന് മുൻപുള്ള പഴയ ഒഎസിലുള്ള ഫോണുകൾ ഉപയോഗിക്കുന്നവർക്ക് വാട്സ്ആപ്പ് ആക്‌സസ് ചെയ്യാൻ കഴിയില്ല. നിലവിൽ iOS 12, അ‌തിന് ​ശേഷമുള്ള ഐഒഎസ് വേർഷനുകൾ എന്നിവയെ വാട്സ്ആപ്പ് പിന്തുണയ്ക്കുന്നുണ്ട്. എന്നാൽ പുതിയ തീരുമാനം നടപ്പാകുന്നതോടെ ഒപ്റ്റിമൽ പ്രവർത്തനത്തിനായി കുറഞ്ഞത് iOS 15.1 എങ്കിലും ഉള്ള ഐഫോണുകൾ ആയിരിക്കണം.

2025 മേയ് 5ന് ശേഷം വാട്സ്ആപ്പ് അ‌പ്ഡേഷൻ ലഭ്യമല്ലാത്ത ഐഫോണുകൾ: ഐഫോൺ 5s, ഐഫോൺ 6, ഐഫോൺ 6 പ്ലസ് എന്നിവയുടെ ഉപയോക്താക്കളെയാണ് ഈ പ്രശ്നം ബാധിക്കുക. കാരണം ഒരു ദശാബ്ദത്തിന് മുമ്പ് പുറത്തിറങ്ങിയ ഈ മോഡലുകൾ iOS 12.5.7 വരെ മാത്രമേ പിന്തുണയ്ക്കൂ.

അടിസ്ഥാന വാട്സ്ആപ്പ് ആപ്പിനും വാട്സ്ആപ്പ് ബിസിനസ്സിനും ഈ മാറ്റം ബാധകമാണ്, കാരണം രണ്ടിന്റെയും അടിസ്ഥാന സിസ്റ്റം ആവശ്യകതകൾ​ ഒരേപോലെയാണ്. പുതിയ ഐഒഎസ് അ‌പ്ഡേറ്റുകളിൽ ഒരുപാട് പുതിയ ഫീച്ചറുകളും സാങ്കേതികവിദ്യ പിന്തുണകളും ഉണ്ട്. ഇവയുടെ പ്രയോജനം വാട്സ്ആപ്പ് ഉപയോക്താക്കൾക്കും ലഭ്യമാക്കുന്നതിനും വാട്സ്ആപ്പ് ഉപയോഗം കൂടുതൽ മെച്ചപ്പെടുത്തുന്നതിനും വേണ്ടിയാണ് ഇത്തരത്തിൽ പഴയ ഫോണുകൾക്കുള്ള പിന്തുണ വാട്സ്ആപ്പ് നിർത്തലാക്കുന്നത്.