തുടരെ തുടരെ ഓഫർ പൂരം! രണ്ട് റീച്ചാർജ് പ്ലാനുകൾക്ക് 5% ഡിസ്കൗണ്ട് പ്രഖ്യാപിച്ച് BSNL

സർക്കാർ ഉടമസ്ഥതയിലുള്ള ടെലിക്കോം കമ്പനിയായ ഭാരത് സഞ്ചാർ നിഗം ലിമിറ്റഡ് സ്വകാര്യ കമ്പനികൾക്ക് എതിരേയുള്ള തങ്ങളുടെ മത്സരം കടുപ്പിച്ചുകൊണ്ട് തുടരെ തുടരെ ഓഫറുകൾ പ്രഖ്യാപിച്ചുകൊണ്ടിരിക്കുകയാണ്. 1 രൂപയുടെ ബിഎസ്എൻഎൽ ദീപാവലി ബൊണാൻസ, 1812 രൂപയുടെ പുതിയ പ്രീപെയ്ഡ് പ്ലാൻ, 225 രൂപയുടെ പുതിയ പ്രീപെയ്ഡ് പ്ലാൻ തുടങ്ങി നിരവധി പ്രഖ്യാപനങ്ങൾ അ‌ടുത്തകാലത്ത് ബിഎസ്എൻഎൽ നടത്തിയിരുന്നു. ബിഎസ്എൻഎല്ലിന്റെ ഈ ഓഫറുകളെല്ലാം കൂടുതൽ വരിക്കാരെ സ്വന്തമാക്കാനും അ‌തുവഴി കമ്പനിയുടെ ഭാവി സുരക്ഷിതമാക്കാനും ലക്ഷ്യമിട്ടാണ് അ‌വതരിപ്പിക്കപ്പെട്ടുകൊണ്ടിരിക്കുന്നത്. ദീപാവലി ഫെസ്റ്റിവൽ സീസൺ ഒരുക്കിയ അ‌വസരം മുതലെടുത്ത് തുടർച്ചയായി ഓഫറുകൾ പ്രഖ്യാപിക്കുന്ന ബിഎസ്എൻഎൽ ഇപ്പോൾ പുതിയൊരു ഓഫർകൂടി മുന്നോട്ട് വച്ചിരിക്കുന്നു.

രണ്ട് പ്രീപെയ്ഡ് പ്ലാനുകൾക്ക് ഒപ്പം 5 ശതമാനം ഡിസ്കൗണ്ട് എന്നതാണ് ബിഎസ്എൻഎല്ലിന്റെ പുതിയ ഓഫർ. ​നേര​ത്തെ സെപ്റ്റംബറിൽ ബിഎസ്എൻഎൽ ചില പ്ലാനുകളുടെ വാലിഡിറ്റി കുറച്ചിരുന്നു. ഇതിന് പ്രായശ്ചിത്തമായി അ‌ധി​കം ​വൈകാതെ തന്നെ ചില പ്ലാനുകൾക്ക് 2 ശതമാനം ഡിസ്കൗണ്ട് ബിഎസ്എൻഎൽ പ്രഖ്യാപിച്ചു. എന്നാൽ ഒക്ടോബർ 15 വരെയായിരുന്നു ആ ഓഫറുകൾ ലഭ്യമാക്കിയിരുന്നത്.

ഒക്ടോബർ 15 പിന്നിട്ടതോടെ 2 ശതമാനം ഡിസ്കൗണ്ട് പിൻവലിക്കപ്പെട്ടു. എന്നാൽ ബിഎസ്എൻഎൽ വ​രിക്കാർക്ക് കമ്പനിയുടെ ഈ നീക്കത്തിൽ ഒട്ടും നിരാശരാകേണ്ടിവന്നില്ല. കാരണം ഒരു ഓഫർ പിൻവലിച്ചതിന് പിന്നാലെ തന്നെ മുൻപ് ലഭ്യമായിരുന്നതിനെക്കാൾ മികച്ച ഓഫർ ബിഎസ്എൻഎൽ പ്രഖ്യാപിച്ചിരിക്കുന്നു. അ‌തായത് രണ്ട് പ്രീപെയ്ഡ് പ്ലാനുകളിൽ 5 ശതമാനം ഡിസ്കൗണ്ട് എന്നതാണ് പുതിയ ഓഫർ.

5 ശതമാനം ഡിസ്കൗണ്ട് ലഭിക്കുന്ന ബിഎസ്എൻഎൽ പ്ലാനുകൾ

ബിഎസ്എൻഎല്ലിന്റെ ഏറ്റവും പുതിയ ദീപാവലി ഓഫറുകളിലൊന്ന് രണ്ട് പ്രീപെയ്ഡ് പ്ലാനുകൾക്ക് 5 ശതമാനം ഡിസ്കൗണ്ട് ലഭ്യമാകും എന്നതാണ്. 485 രൂപ, 1999 രൂപ എന്നീ പ്ലാനുകൾക്കാണ് 5 ശതമാനം ഡിസ്കൗണ്ട് ലഭ്യമാകുക. ബിഎസ്എൻഎൽ സെൽഫ് കെയർ ആപ്പ് വഴി റീച്ചാർജ് ചെയ്യുമ്പോഴാണ് ഈ ഡിസ്കൗണ്ട് ലഭ്യമാകുക.

ഡിസ്കൗണ്ട് കാലാവധി

2025 ഒക്ടോബർ 18 മുതൽ പ്രാബല്യത്തിൽ വന്ന 5 ശതമാനം ഡിസ്കൗണ്ട് ഓഫർ 2025 നവംബർ 18 വരെയാണ് ലഭ്യമാക്കിയിരിക്കുന്നത്. അ‌തായത് നവംബർ 18 അ‌വസാനിക്കും മുമ്പ് ഈ രണ്ട് പ്ലാനുകൾ ഉപയോഗിച്ച് റീച്ചാർജ് ചെയ്യുന്നവർക്ക് യഥാർഥ വിലയ്ക്ക് പകരം നിശ്ചിത ശതമാനം ഡിസ്കൗണ്ട് കഴിഞ്ഞുള്ള തുക നൽകിയാൽ മതി.

5 ശതമാനം ഡിസ്കൗണ്ടിന്റെ കണക്കുകൾ

ബിഎസ്എൻഎൽ ആപ്പിൽ നൽകിയിരിക്കുന്ന വിവരങ്ങൾ പ്രകാരം ഇപ്പോൾ പ്രഖ്യാപിച്ചിരിക്കുന്ന 5 ശതമാനം ഡിസ്കൗണ്ടിന്റെ നേട്ടം വരിക്കാരനും അ‌നാഥാലയങ്ങൾക്കും ലഭ്യമാകും. അ‌തായത് 2.5 ശതമാനം ഡിസ്കൗണ്ട് വരിക്കാരനും 2.5 ശതമാനം ഡിസ്കൗണ്ട് അ‌നാഥാലയങ്ങൾക്ക് സംഭാവനയായും നൽകുമെന്ന് ബിഎസ്എൻഎൽ അ‌റിയിച്ചിരിക്കുന്നു. ഇനി ഈ പ്ലാനുകളുടെ ഡിസ്കൗണ്ട് വിലയും ആനുകൂല്യങ്ങളും കൂടി പരിചയപ്പെടാം.

485 രൂപയുടെ ബിഎസ്എൻഎൽ പ്ലാനിന്റെ ഡിസ്കൗണ്ട്

പുതുക്കിയ പ്ലാൻ ആനുകൂല്യങ്ങൾ പ്രകാരം, 72 ദിവസ വാലിഡിറ്റിയിൽ അ‌ൺലിമിറ്റഡ് കോളിങ്, 2ജിബി പ്രതിദിന ഡാറ്റ, ദിവസം 100 എസ്എംഎസ് എന്നീ ആനുകൂല്യങ്ങൾ ഈ പ്ലാൻ വാഗ്ദാനം ചെയ്യുന്നു. ഇപ്പോൾ 2.5 ശതമാനം ഡിസ്കൗണ്ടിന് ശേഷം 472 രൂപ 88 ​പൈസ മാത്രം ഈ പ്ലാനിനായി അ‌ടച്ചാൽ മതി.

1999 രൂപയുടെ ബിഎസ്എൻഎൽ പ്ലാനിന്റെ ഡിസ്കൗണ്ട്

ഇപ്പോൾ ഈ പ്ലാൻ 2.5 ശതമാനം ഡിസ്കൗണ്ടിന് ശേഷം 1949 രൂപ 03 ​പൈസ വിലയിൽ ബിഎസ്എൻഎൽ സെൽഫ് കെയർ ആപ്പിൽ ലഭ്യമാകുന്നു. 330 ദിവസ വാലിഡിറ്റിയിൽ അ‌ൺലിമിറ്റഡ് കോളിങ്, പ്രതിദിനം 1.5ജിബി ഡാറ്റ, ദിവസം 100 എസ്എംഎസ് എന്നിവ ഈ പ്ലാനിൽ ലഭ്യമാകുന്നു.