പിശുക്കി, എങ്കിലും വെ​റൈറ്റിയാണ്! VI വോയ്സ്- എസ്എംഎസ് ​ഒൺലി പ്രീപെയ്ഡ് പ്ലാൻ പുറത്തിറക്കി

ഡാറ്റ ആനുകൂല്യം ഇല്ലാതെ വോയ്സ്, എസ്എംഎസ് എന്നീ ആനുകൂല്യങ്ങൾ ഉൾപ്പെടുന്ന വാലിഡിറ്റി പ്ലാനുകൾ അ‌വതരിപ്പിക്കണം എന്ന ട്രായി നിർദേശം പാലിച്ച് വൊഡാഫോൺ ഐഡിയയും (VI) പുതിയ പ്രീപെയ്ഡ് പ്ലാൻ പ്രഖ്യാപിച്ചു. ജിയോയും എയർടെലും രണ്ട് വോയ്സ്- എസ്എംഎസ് ഒൺലി പ്ലാനുകൾ അ‌വതരിപ്പിച്ചപ്പോൾ വിഐ ഒരു വോയ്സ്- എസ്എംഎസ് ഒൺലി പ്ലാൻ മാത്രമാണ് അ‌വതരിപ്പിച്ചിട്ടുള്ളത്. 1,460 രൂപ വിലയിലാണ് വിഐയുടെ ഏക വോയ്സ്- എസ്എംഎസ് ഒൺലി പ്ലാൻ എത്തിയിരിക്കുന്നത്. മറ്റ് രണ്ട് കമ്പനികളും അ‌വതരിപ്പിച്ചതിൽ നിന്ന് വേറിട്ട് നിൽക്കുന്നതാണ് വിഐയുടെ ​വോയ്സ്- എസ്എംഎസ് ഒൺലി പ്രീപെയ്ഡ് പ്ലാൻ.

1,460 രൂപയുടെ വിഐ വോയ്സ്- എസ്എംഎസ് ഒൺലി പ്രീപെയ്ഡ് പ്ലാൻ: ഈ വിഐ വോയ്സ്, എസ്എംഎസ് ​​ഒൺലി പ്ലാൻ 270 ദിവസത്തെ വാലിഡിറ്റിയിൽ അൺലിമിറ്റഡ് വോയ്‌സ് കോളിംഗും 100 എസ്എംഎസും വാഗ്ദാനം ചെയ്യുന്നു. ഈ പ്ലാനിനൊപ്പം അധിക ആനുകൂല്യങ്ങളൊന്നുമില്ല. അ‌ധികം റീച്ചാർജ് പ്ലാനുകൾ വാഗ്ദാനം ചെയ്യാത്ത ഒരു വാലിഡിറ്റി കാലയളവാണ് ഈ പ്ലാനിൽ വിഐ നൽകിയിരിക്കുന്നത്.

ഒരേയൊരു വോയ്സ്- എസ്എംഎസ് ഒൺലി പ്ലാൻ മാത്രമാണ് അ‌വതരിപ്പിച്ചിരിക്കുന്നത് എങ്കിലും വിഐ ഇപ്പോൾ തങ്ങളുടെ വെബ്​സൈറ്റിൽ 'Only Calling Plans with Validity' എന്ന തലക്കെട്ടിൽ ഒരു ലിങ്ക് നൽകിയിട്ടുണ്ട്. ഇതിൽ കോളിങ് ആനുകൂല്യത്തിൽ ശ്രദ്ധ കേന്ദ്രീകരിച്ച്, കുറഞ്ഞ അ‌ളവിൽ ഡാറ്റ സഹിതം ലഭ്യമായ വിഐ പ്രീപെയ്ഡ് പ്ലാനുകൾ ലിസ്റ്റ് ചെയ്തിരിക്കുന്നു.

കോളിങ് ആനുകൂല്യത്തിൽ ശ്രദ്ധ കേന്ദ്രീകരിച്ചുകൊണ്ടുള്ള വിഐ പ്ലാനുകൾ വിവരിക്കുന്ന പ്രത്യേക പേജിൽ 99 രൂപ, 128 രൂപ, 138 രൂപ, 198 രൂപ പ്ലാനുകളാണ് ലിസ്റ്റ് ചെയ്തിരിക്കുന്നത്. ഇവ യഥാക്രമം 15, 18, 20, 30 ദിവസത്തെ വാലിഡിറ്റി കാലയളവ് വാഗ്ദാനം ചെയ്യുന്നു. ഈ പ്ലാനുകളുടെ ആനുകൂല്യങ്ങളിൽ ചെറിയ അ‌ളവ് ഡാറ്റയും ടോക്ക് ടൈമും അല്ലെങ്കിൽ ലോക്കൽ ഓൺ-നെറ്റ് ​നൈറ്റ് മിനിറ്റുകളും ഉൾപ്പെടുന്നു.

വിഐക്ക് മുൻപ് തന്നെ ജിയോയും എയർടെലും തങ്ങളുടെ വോയ്സ്- എസ്എംഎസ് ഒൺലി പ്രീപെയ്ഡ് പ്ലാനുകൾ പ്രഖ്യാപിച്ചിരുന്നു. ജിയോയുടെ വോയ്സ്- എസ്എംഎസ് ഒൺലി പ്ലാനുകൾ 458 രൂപ, 1,958 രൂപ എന്നീ വിലകളിലാണ് എത്തിയിരിക്കുന്നത്. 499 രൂപ, 1,959 രൂപ വിലകളിലാണ് എയർടെലിന്റെ വോയ്‌സ്, എസ്എംഎസ് ഒൺലി പ്രീപെയ്ഡ് പ്ലാനുകൾ അ‌വതരിപ്പിക്കപ്പെട്ടിരിക്കുന്നത്.

ജിയോയുടെ 458 രൂപ വോയ്‌സ്-ഒൺലി പ്ലാൻ അ‌ൺലിമിറ്റഡ് വോയ്‌സ് കോളുകളും 1000 എസ്എംഎസും 84 ദിവസത്തെ വാലിഡിറ്റിയിൽ ലഭ്യമാക്കിയിരിക്കുന്നു. 1,958 രൂപയുടെ ജിയോ വോയ്‌സ്-ഒൺലി പ്ലാൻ 365 ദിവസ വാലിഡിറ്റിയിൽ അൺലിമിറ്റഡ് വോയ്‌സ് കോളുകൾ, 3,600 എസ്എംഎസ് എന്നിവ വാഗ്ദാനം ചെയ്യുന്നു. ജിയോ ആപ്പുകളിലേക്കുള്ള ആക്സസ് ഈ പ്ലാനുകളിൽ അ‌ധിക ആനുകൂല്യമായി ലഭ്യമാണ്.

എയർടെലിന്റെ 499 രൂപയുടെ വോയ്സ്- എസ്എംഎസ് ഒൺലി പ്രീപെയ്ഡ് പ്ലാൻ 84 ദിവസത്തെ വാലിഡിറ്റിയിൽ അൺലിമിറ്റഡ് വോയ്‌സ് കോളുകളും 900 എസ്എംഎസും വാഗ്ദാനം ചെയ്യുന്നു. 1,959 രൂപയുടെ വോയ്സ്- എസ്എംഎസ് ഒൺലി പ്രീപെയ്ഡ് പ്ലാൻ 365 ദിവസ വാലിഡിറ്റിയിൽ അ‌ൺലിമിറ്റഡ് കോളിങ്, ആകെ 3600 എസ്എംഎസ് എന്നിവ വാഗ്ദാനം ചെയ്യുന്നു. ഇവയുടെ എയർടെൽ റിവാർഡുകളിൽ 3 മാസത്തേക്ക് അപ്പോളോ 24/7 സർക്കിൾ അംഗത്വവും സൗജന്യ ഹലോ ട്യൂണുകളും ഉൾപ്പെടുന്നു.

മൂന്ന് സ്വകാര്യ കമ്പനികളുടെ വോയ്സ്- എസ്എംഎസ് ഒൺലി പ്രീപെയ്ഡ് പ്ലാനുകളിൽ ജിയോയുടെ പ്ലാനാണ് ഏറ്റവും കുറഞ്ഞ വിലയിൽ ലഭ്യമായിട്ടുള്ളത്. അ‌തേസമയം വിഐ മറ്റാരും നൽകാത്ത ഒരു വാലിഡിറ്റി കാലയളവിലുള്ള വോയ്സ്- എസ്എംഎസ് ഒൺലി പ്ലാൻ അ‌വതരിപ്പിച്ചുകൊണ്ട് വേറിട്ട് നിൽക്കുന്നു. ബിഎസ്എൻഎല്ലിന് ഡാറ്റ ഇല്ലാതെ കോളിങ്, എസ്എംഎസ് ആനുകൂല്യങ്ങൾ മാത്രമുള്ള പ്ലാൻ വളരെ നാളായി ഉണ്ട്. ട്രായിയുടെ നിർദേശത്തിന്റെ അ‌ടിസ്ഥാനത്തിൽ പുതിയ പ്ലാൻ ഇറക്കുമോയെന്ന് ഇപ്പോൾ വ്യക്തമല്ല.