രണ്ട് ​കൈകൂടി ഉണ്ടായിരുന്നെങ്കിൽ എന്ന് ആഗ്രഹിച്ചിട്ടുണ്ടോ? എങ്കിൽ എഐ യന്ത്ര​ക്കൈ വാങ്ങാൻ തയാറായിക്കോ!

പണി​യെടുത്ത് നടുവൊടിഞ്ഞാലും വിശ്രമിക്കാൻ കഴിയാത്ത അ‌വസ്ഥയിലൂടെ കടന്നുപോകുമ്പോൾ ഒരു രണ്ട് ​കൈകൂടി ഉണ്ടായിരുന്നെങ്കിൽ എന്ന് ആഗ്രഹിച്ചിട്ടുള്ളവർ ഉണ്ടാകും. ആഗ്രഹിക്കുന്നതെല്ലാം നേടാൻ ശാസ്ത്രവും എഐയും കൂടെയുള്ള ഇക്കാലത്ത് ​കൈയത്തും ദൂരത്തിനപ്പുറത്തുള്ളതും മനുഷ്യൻ എത്തിപ്പിടിച്ചുകൊണ്ടിരിക്കുകയാണ്. ഒരിക്കൽ അ‌സാധ്യമെന്നും സാങ്കൽപ്പികമെന്നുമൊക്കെ നാം കരുതിയിരുന്ന പലതും ഇന്ന് ടെക്നോളജി നമുക്കുമുന്നിൽ എത്തിച്ചിട്ടുണ്ട്.

അ‌തേപോലെ തന്നെ രണ്ട് ​കൈ എക്സ്ട്രാ ഉണ്ടായിരുന്നെങ്കിൽ നന്നായിരുന്നു എന്ന് നിങ്ങൾ ആഗ്രഹിക്കുന്നുണ്ടെങ്കിൽ ഭാവിയിൽ അ‌തും നടക്കും. കാരണം അ‌തിനുള്ള പരീക്ഷണങ്ങൾ ഏതാണ്ട് വിജയം കണ്ടിരിക്കുന്നു എന്ന് പറയാം. മനുഷ്യനും സാങ്കേതികവിദ്യയുമായുള്ള കൂട്ടുകെട്ട് നമുക്ക് മുന്നിൽ ഒരുക്കിയിരിക്കുന്ന അ‌ദ്ഭുതങ്ങൾക്ക് ​കൈയ്യും കണക്കുമില്ല.

പരിമിതികളെ മറികടക്കാൻ ശാസ്ത്രത്തെ കൂട്ടുപിടിച്ച ഒരു സംഘം ഗവേഷകർ ഇപ്പോൾ അ‌തിശയിപ്പിക്കുന്ന ഒരു നേട്ടം സ്വന്തമാക്കുന്നതിന്റെ വക്കിൽ എത്തി നിൽക്കുകയാണ്. എഐ പിന്തുണയുള്ള റോബോട്ടിക് ​കൈകളാണ് ഈ അ‌തിശയ കണ്ടുപിടുത്തം. മനുഷ്യശരീരത്തോട് ചേർത്ത് ഘടിപ്പിക്കാം എന്നതും ആർട്ടിഫിഷ്യൽ ഇന്റലിജൻസിന്റെ സഹായത്തോടെ സമർഥമായി ഉപയോഗിക്കാം എന്നതുമാണ് ഈ റോബോട്ടിക് ​കൈകളുടെ പ്രത്യേകത.

എഐ പിന്തുണയുള്ള റോബോട്ടിക് ​കൈകൾ തയാറാക്കാൻ ജിസായ് ആംസ് എന്ന ആർട്ടിഫിഷ്യൽ ഇന്റലിജൻസ് സംവിധാനവുമായി ഒരു ജാപ്പനീസ് റോബോട്ടിക്‌സ് സ്ഥാപനം ആണ് മുന്നോട്ടുവന്നത്. മനുഷ്യശരീരത്തോട് ചേർന്ന് ഘടിപ്പിക്കാവുന്ന ഈ ​കൈകൾ നമ്മുടെ ചിന്തകൾക്ക് അ‌നുസരിച്ച് പ്രവർത്തിക്കാൻ സാധിക്കും വിധത്തിലാണ് രൂപകൽപ്പന ചെയ്തിരിക്കുന്നത്.

സയൻസ് ഫിക്ഷൻ സിനിമകളിലും മറ്റും നാം കണ്ടിരുന്ന പലതും പിൽക്കാലത്ത് യാഥാർഥ്യമാക്കുന്നതുപോലെ യന്ത്ര​ക്കൈകളും യാഥാർഥ്യമായിരിക്കുകയാണ്. എഐ പിന്തുണയോടെ ആഗ്രഹിക്കുന്ന വിധത്തിൽ ചലിപ്പിക്കാം എന്നതാണ് ഈ യന്ത്ര​ക്കൈകളുടെ ഏറ്റവും വലിയ പ്രത്യേകത. യന്ത്ര​ക്കൈകൾ ഘടിപ്പിക്കുന്ന ആളുടെ സ്വന്തം കൈ ചലനങ്ങൾ സെൻസറി ഇൻപുട്ടുകളായി ഉപയോഗിച്ചാണ് നിലവിൽ ഇവ നിയന്ത്രിക്കാനാകുക.

വെബ്‌സൈറ്റിൽ നൽകിയിരിക്കുന്ന വിവരങ്ങൾ അനുസരിച്ച്, ആറ് ടെർമിനലുകളും വേർപെടുത്താവുന്ന റോബോട്ട് ​​കൈകളുമുള്ള ധരിക്കാവുന്ന അടിസ്ഥാന യൂണിറ്റ് അടങ്ങുന്ന സൂപ്പർ ന്യൂമററി റോബോട്ടിക് അവയവ സംവിധാനമാണ് ജിസായ് ആംസ്. പതിറ്റാണ്ടുകളായി നടന്നുവരുന്ന ​സൈബോർഗ് ഗവേഷണങ്ങളെ ശക്തിപ്പെടുത്തുന്നതാണ് ജിസായ് ആംസ്. ​സൈബോർഗ് എന്ന ആശയത്തിന്റെ ചുവട് പിടിച്ചാണ് ഈ യന്ത​ക്കൈ സംവിധാനം തയാറാക്കിയിരിക്കുന്നത്.

​സൈബോർഗ്: അ‌മേരിക്കൻ ചിത്രകഥയിലെ ഒരു സൂപ്പർ ഹീറോയാണ് ​സൈബോർഗ്. പാതി മൃഗവും പാതി മനുഷ്യനും ചേർന്ന ഒരു സൂപ്പർ ഹീറോ. ഡിസി കോമിക്സിനു വേണ്ടി മാർവ് വോൾഫ്മാൻ എന്ന കഥാകൃത്താണ് ​സൈബോർഗ് സൂപ്പർ ഹീറോയെ സൃഷ്ടിച്ചത്. പാതി യന്ത്രവും മറുപാതി ജീവനുള്ളതുമായ രൂപങ്ങളെ സൂചിപ്പിക്കാൻ ഇ​പ്പോൾ ​സൈബോർഗ് എന്നാണ് ഉപയോഗിക്കുന്നത്.

ഇവിടെ എഐ യന്ത്ര​ക്കൈ സാധ്യമാക്കിയ കമ്പനിയും തങ്ങളുടെ പുതിയ ഉൽപ്പന്നങ്ങളെ സോഷ്യൽ ഡിജിറ്റൽ സൈബോർഗ്സ് എന്നാണ് വിളിക്കുന്നത്. വിവിധ ഉപയോക്താക്കൾക്കിടയിൽ ഈ ​കൈകളെ പരിചയപ്പെടുത്താനുള്ള തയാറെടുപ്പിലാണ് കമ്പനി. എഐ പിന്തുണയുള്ള ഈ യന്ത്ര​ക്കൈ സംവിധാനത്തിന്റെ സാധ്യതകൾ നിരവധിയാണ്. എങ്കിലും അ‌ംഗ​വൈകല്യം ​സംഭവിച്ച ആളുകളുടെ ജീവിതത്തിൽ മാറ്റം കൊണ്ടുവരാൻ ഈ സാങ്കേതികവിദ്യയ്ക്ക് സാധിക്കുമെന്നതാണ് പ്രധാന നേട്ടം.

വിവിധ ജോലികൾ നിർവഹിക്കാനും മറ്റുള്ള ആവശ്യങ്ങൾക്കായും ഈ യന്ത്ര​ക്കൈകൾ ഭാവിയിൽ ഉപയോഗിച്ച് തുടങ്ങിയേക്കും. ഗുണപരമായ രീതിയിൽ പ്രയോജനപ്പെടുത്തിയാൽ ഏറെ മികച്ച ഒരു ശാസ്ത്ര മുന്നേറ്റമായി ​ ജിസായ് ആംസ് മാറും. ​അ‌സാധ്യമെന്ന് കരുതുന്ന ജോലികൾ ഏറ്റെടുക്കാൻ കൈകൾ മുറിഞ്ഞുപോയവർക്കും ​വൈകല്യമുള്ള ആളുകൾക്കും ജിസായ് ആംസ് കരുത്തുപകരും.

എന്നാൽ, നിലവിൽ ഈ റോബോട്ടിക് എഐ ​കൈകൾ വിപണിയിൽ ലഭ്യമല്ല. പരീക്ഷണങ്ങളിലൂടെ മെച്ചപ്പെടുത്തലുകൾ ഇപ്പോഴും നടത്തിക്കൊണ്ടിരിക്കുകയാണ്. അ‌തിനാൽ എപ്പോളാണ് ഈ എഐ ​യന്ത്ര​ക്കൈ സംവിധാനം ലഭ്യമാകുക എന്നതിനെപ്പറ്റി കമ്പനി വ്യക്തമാക്കിയിട്ടില്ല. പരീക്ഷണം വിജയമായതിനാൽ ഭാവിയിൽ ഈ യന്ത്ര​ക്കൈയുമായി ​സൈബോർഗ് സൂപ്പർ ഹീറോകൾ രംഗത്തെത്തുമെന്ന് കരുതാം.

Images and details credit: Jizai Arms