WhatsApp Pay: കാത്തിരിപ്പിനൊടുവിൽ വാട്സ്ആപ്പ് പേ എത്തുന്നു; എൻപിസിഐയുടെ അനുമതി ലഭിച്ചു

ബീറ്റ പരിശോധനയുടെ ഭാഗമായി ഇന്ത്യയിലെ ഒരു ദശലക്ഷം ഉപയോക്താക്കൾക്ക് 2018 മുതൽ വാട്ട്‌സ്ആപ്പ് പേ സേവനം ലഭ്യമാക്കിയിരുന്നു. എൻ‌പി‌സി‌ഐയുടെ അംഗീകാരം ലഭിക്കാൻ വൈകിയതിനാലാണ് ഔദ്യോഗികമായി സേവനം ആരംഭിക്കാൻ വൈകിയത്. വാട്സ്ആപ്പിന് ഇന്ത്യയിൽ വൻ ഉപഭോക്തൃ പിന്തുണയാണ് ഉള്ളത്. ഈ പിന്തുണ വാട്സ്ആപ്പ് പേയ്മെന്റ്സ് എന്ന സേവനത്തെ വേഗത്തിൽ ജനപ്രീയമാക്കുമെന്നാണ് കമ്പനി പ്രതീക്ഷിക്കുന്നത്.

നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യ (എൻ‌പി‌സി‌ഐ) ഡിജിറ്റൽ പേയ്‌മെന്റ് സേവനം ഘട്ടംഘട്ടമായി പ്രവർത്തിപ്പിക്കാൻ വാട്സ്ആപ്പിന് അനുമതി നൽകിയിട്ടുണ്ടെന്ന് റിസർവ് ബാങ്ക് ഉദ്യോഗസ്ഥൻ വ്യക്തമാക്കിയതായി ബിസിനസ് സ്റ്റാൻഡേഡ് റിപ്പോർട്ട് ചെയ്യുന്നു. ആർ‌ബി‌ഐ വാട്സ്ആപ്പിന് അംഗീകാരം നൽകി ദിവസങ്ങൾക്ക് ശേഷമാണ് എൻ‌പി‌സി‌ഐ അംഗീകാരവും ലഭിച്ചത്.

റോൾ ഔട്ടിന്റെ ആദ്യ ഘട്ടത്തിൽ 10 ദശലക്ഷത്തിലധികം ആളുകൾക്ക് വാട്സ്ആപ്പ് പേ മെസേജിംഗ് ആപ്പ് വഴി ലഭ്യമാക്കും. ലോഞ്ചിന് ശേഷം വാട്ട്‌സ്ആപ്പ് പേ ഇന്ത്യയിലെ ഏറ്റവും വലിയ മൊബൈൽ പേയ്‌മെന്റ് അപ്ലിക്കേഷനുകളിലൊന്നായി മാറുമെന്ന് വ്യക്തമാണ്. നിലവിൽ വാട്സ്ആപ്പ് അപ്ലിക്കേഷന് രാജ്യത്ത് 450 ദശലക്ഷത്തിലധികം ഉപയോക്താക്കളുണ്ട്.

വാട്‌സ്ആപ്പ് പേയ്ക്ക് എൻ‌പി‌സി‌ഐയിൽ നിന്ന് അനുമതി ലഭിക്കാൻ വളരെയേറെ ബുദ്ധിമുട്ടേണ്ടി വന്നിരുന്നു. വാട്സ്ആപ്പിന്റെ മാതൃ കമ്പനിയായ ഫേസ്ബുക്ക് പാലിക്കേണ്ട ഡാറ്റ സുരക്ഷയുമായി ബന്ധപ്പെട്ട പ്രശ്നങ്ങളായിരുന്നു ഇതിന് കാരണം. വാട്‌സ്ആപ്പിന് ഡാറ്റ സംരക്ഷണ സ്വഭാവം കണക്കിലെടുത്ത് അനുമതി നൽകുന്നതിൽ റിസർവ് ബാങ്കും ഇന്ത്യൻ സർക്കാരും താല്പര്യം കാണിച്ചില്ല.

ഇന്ത്യയിലെ ഡിജിറ്റൽ പേയ്മെന്റ് മേഖലയിൽ വാട്സ്ആപ്പ് പേയുടെ പ്രവർത്തനം സുഗമമാവില്ല. ഇതിനകം തന്നെ നിരവധി പേയ്‌മെന്റ് അപ്ലിക്കേഷനുകൾ വിപണിയിൽ ഉണ്ട്. അലി ബാബയുടെ പിന്തുണയുള്ള പേടിഎം, ഗൂഗിളിന്റെ ഗൂഗിൾ പേ ആപ്ലിക്കേഷൻ, ഫോൺ പെ, മൊബിവിക് എന്നിവയുമായുള്ള കടുത്ത മത്സരത്തിനായിരിക്കും ഇനി ഈ വിപണി സാക്ഷ്യം വഹിക്കുക.

നിലവിൽ ഇന്ത്യയിൽ ഏറ്റവും കൂടുതൽ ഉപയോഗിക്കുന്ന പേയ്‌മെന്റ് അപ്ലിക്കേഷനാണ് ഗൂഗിൾ പേ. രണ്ടാം സ്ഥാനത്തുള്ളത് പേടിഎമ്മാണ്. ഇന്ത്യയിലെ ഡിജിറ്റൽ പേയ്‌മെന്റ് രംഗത്ത് ആധിപത്യം പുലർത്തുന്ന ഈ അപ്ലിക്കേഷനുകളുടെ വിപണി പിടിച്ചെടുക്കലായിരിക്കും വാട്സ്ആപ്പ് പേയുടെ ലക്ഷ്യം. വാട്സ്ആപ്പിന്റെ ജനപ്രീതി പേയ്മെന്റ് ആപ്പിലേക്ക് കൂടി വികസിപ്പിക്കാൻ കമ്പനി ശ്രമിക്കും.

പേടിഎം, ഫോൺ പെ, ഗൂഗിൾ പേ എന്നിവയടക്കമുള്ള പേയ്‌മെന്റ് ആപ്ലിക്കേഷനുകൾ പണം കൈമാറുന്നതിനോ പേയ്‌മെന്റുകൾ നടത്തുന്നതിനോ മാത്രമല്ല ഉപയോഗിക്കുന്നത്. മൂവി, ട്രെയിൻ, വിമാന ടിക്കറ്റുകൾ എന്നിവ ബുക്ക് ചെയ്യുന്നതിനും മെട്രോ കാർഡുകൾ ഡിടിഎച്ച് മുതലായവ റീചാർജ് ചെയ്യുന്നതിനും ഈ ആപ്പുകളിൽ സംവിധാനങ്ങളുണ്ട്.

നിലവിലുള്ള ഡിജിറ്റൽ പേയ്മെന്റ് ആപ്പുകളിൽ ഉപയോക്താക്കൾക്ക് ബാങ്ക് അക്കൗണ്ടുകളിലേക്ക് നേരിട്ട് പണം കൈമാറാനുള്ള സംവിധാനവും ലഭ്യമാണ്. വാട്സ്ആപ്പ് പേ പേടിഎം പോലെ സ്വന്തം വാലറ്റ് ഉണ്ടാക്കുമോ എന്ന കാര്യവും വ്യക്തമല്ല. എന്തായാലും ഇന്ത്യയിലെ ഡിജിറ്റൽ ട്രാൻസാക്ഷൻ രംഗത്ത് വലിയ മുന്നേറ്റത്തിന് വാട്സ്ആപ്പ് പേയുടെ വരവോടെ സാക്ഷ്യം വഹിക്കുമെന്നാണ് പ്രതീക്ഷിക്കാവുന്നത്.