സോണി ആൽഫ 1 ഫുൾ ഫ്രെയിം മിറർലെസ്സ് ക്യാമറ വിപണിയിലെത്തി; വിലയും സവിശേഷതകളും

സോണി ആൽഫ 1 ക്യാമറയിലെ 50.1 എംപി സെൻസറിന് 30fps വരെ നേറ്റീവ് 8കെ വീഡിയോകൾ റെക്കോർഡ് ചെയ്യാൻ സാധിക്കും. സെക്കൻഡിൽ 30 ഇമേജുകൾ വരെ ഷൂട്ട് ചെയ്യാനുള്ള സംവിധാനവും ഈ ക്യാമറയിൽ ഉണ്ട്. വളരെ വേഗത്തിൽ ഫോട്ടോകൾ എടുക്കാൻ സാധിക്കുന്നു എന്നത് വൈൽഡ് ലൈഫ്, സ്പോർട്സ് ഫോട്ടോഗ്രാഫർമാർക്ക് ഏറെ പ്രയോജനപ്പെടുന്നതാണ്.

സോണി ആൽഫ 1 ക്യാമറയിൽ വലിയ ഇമേജ് ബഫറാണ് ഉള്ളത്. 155 ഫുൾ-ഫ്രെയിം കംപ്രസ് ചെയ്ത റോ ഇമേജുകളും 165 എഎഫ്, എഇ ഫംഗ്ഷണാലിറ്റിയുള്ള 165 ഫുൾ-ഫ്രെയിം ജെപിഇജി ഇമേജുകളും ഷൂട്ട് ചെയ്യാൻ ഈ ക്യാമറയ്ക്ക് സാധിക്കും. വിപണിയിൽ ലഭ്യമായ ഈ വില വിഭാഗത്തിലെ ഏറ്റവും മികച്ച ക്വാളിറ്റി നൽകുന്ന ക്യാമറകളിൽ ഒന്ന് തന്നെയാണ് ഇത്.

പുതിയതും മെച്ചപ്പെട്ടതുമായ ഓട്ടോഫോക്കസ് സംവിധാനവുമായാണ് സോണി ആൽഫ 1 ക്യാമറ വരുന്നത്. ഇത് സെക്കൻഡിൽ 120 കാൽക്കുലേഷൻസ് വരെ നടത്തുന്നു. ഇതിനൊപ്പം അഞ്ച്-ആക്സിസ് ഇൻ-ബോഡി ഇമേജ് സ്റ്റെബിലൈസേഷനും ക്യാമറയിൽ ഉണ്ട്. മികച്ച ഐ‌എസ്ഒ റേഞ്ചും ഈ ക്യാമറയുടെ സവിശേഷതയാണ്. 100 മുതൽ 32,000 വരെയാണ് ക്യാമറയുടെ ഐഎസ്ഒ റേഞ്ച്. ഫോട്ടോ എടുക്കുമ്പോൾ ഇത് 50 മുതൽ 102,400 വരെയും ലഭ്യമാകും.

സോണി ആൽഫ 1 ലെ ഓട്ടോഫോക്കസ് സിസ്റ്റത്തെ ഐ ഓട്ടോഫോക്കസ് സിസ്റ്റം എന്നാണ് വിളിക്കുന്നത്. ഇത് മനുഷ്യരെയും മൃഗങ്ങളെയും വളരെ വേഗത്തിൽ ട്രാക്കുചെയ്യുന്നു. വീഡിയോ സവിശേഷതകൾ പരിശോധിച്ചാൽ, ക്യാമറ 8കെ 30 എഫ്പിഎസ്, 10 ബിറ്റ് കളർ, 4കെ 120 എഫ്പിഎസ് എന്നിവ ഷൂട്ട് ചെയ്യാനുള്ള ശേഷിയുമായിട്ടാണ് വരുന്നത്. എക്സ്റ്റേണൽ റെക്കോർഡറിന്റെ സഹായത്തോടെ ക്യാമറയ്ക്ക് 16-ബിറ്റ് റോ വീഡിയോ ഷൂട്ട് ചെയ്യാനും കഴിയും.

സോണി ആൽഫ 1: വിലയും ലഭ്യതയും

സോണി ആൽഫ 1 ക്യാമറയുടെ ബോഡിക്ക് മാത്രം അമേരിക്കയിൽ 6,500 ഡോളറാണ് വില. മാർച്ച് മുതൽ ഈ ബോഡിയുടെ വിൽപ്പന ആരംഭിക്കും. ഇതുവരെ ഈ ക്യാമറ ഇന്ത്യൻ വിപണിയിൽ അവതരിപ്പിക്കുന്നതിനെ കുറിച്ച് വിവരങ്ങളൊന്നും ഇല്ല. ഈ ക്യാമറ ഫോട്ടോഗ്രാഫിയിലെ തുടക്കകാർക്ക് വേണ്ടിയുള്ളതല്ല. വളരെ പ്രൊഫഷണലായി ഫോട്ടോഗ്രാഫി മേഖലയിലുള്ള ആളുകൾക്ക് പ്രയോജനപ്പെടുന്ന ക്യാമറയാണ് ഇത്. ഇന്ത്യൻ വിപണിയിൽ ഈ ക്യാമറ വൈകാതെ അവതരിപ്പിച്ചേക്കും. ഏകദേശം അഞ്ച് ലക്ഷം രൂപയോളമായിരിക്കും ക്യാമറയുടെ ഇന്ത്യയിലെ വില.