2,999 രൂപയ്ക്ക് 7 ദിവസത്തെ ബാറ്ററി ലൈഫും കിടിലൻ ഫീച്ചറുകളുമായൊരു സ്മാർട്ട് വാച്ച്

നോയിസ് കളർഫിറ്റ് പൾസ് ബസ്സ്: വില

നോയിസ് കളർഫിറ്റ് പൾസ് ബസ്സ് സ്മാർട്ട് വാച്ചിന് ഇന്ത്യയിൽ 4,999 രൂപയാണ് വില. എന്നാൽ ഇപ്പോൾ ഈ വാച്ച് 2.999 രൂപയ്ക്ക് ലഭ്യമാകും. ഗോനോയിസ്.കോം എന്ന കമ്പനിയുടെ ഔദ്യോഗിക വെബ്സൈറ്റിലൂടെയാണ് ഈ വിലയ്ക്ക് ലഭിക്കുന്നത്. ആമസോണിൽ വാച്ചിന്റെ വില 3499 രൂപയാണ്. റോസ് പിങ്ക്, ജെറ്റ് ബ്ലാക്ക്, ഒലിവ് ഗ്രീൻ, ഷാംപെയ്ൻ ഗ്രേ, ഇലക്ട്രിക് ബ്ലൂ എന്നിങ്ങനെ അഞ്ച് നിറങ്ങളിലാണ് സ്മാർട്ട് വാച്ച് ലഭ്യമാകുന്നത്. ഇന്നലെ മുതൽ തന്നെ ഈ സ്മാർട്ട് വാച്ചിന്റെ വിൽപ്പന ആരംഭിച്ചിട്ടുണ്ട്. വിപണിയിലെ 4000 രൂപ വില വിഭാഗത്തിൽ വരുന്ന സ്മാർട്ട് വാച്ചുകൾക്കെല്ലാം വെല്ലുവിളി ഉയർത്താൻ പോന്ന നോയിസ് കളർഫിറ്റ് പൾസ് ബസ്സിന്റെ ഫീച്ചറുകൾ നോക്കാം.

നോയിസ് കളർഫിറ്റ് പൾസ് ബസ്സ്: സവിശേഷതകൾ

പുതിയ നോയിസ് കളർഫിറ്റ് പൾസ് ബസ്സ് സ്മാർട്ട് വാച്ചിൽ 240 x 280 പിക്സൽ റെസല്യൂഷനുള്ള 1.69 ഇഞ്ച് എൽസിഡി ഡിസ്പ്ലേയാണുള്ളത്. ഇതൊരു ടച്ച്‌സ്‌ക്രീൻ ഡിസ്പ്ലെയാണ്. ആൻഡ്രോയിഡ്, ഐഒഎസ് ഓപ്പറേറ്റിംഗ് സിസ്റ്റങ്ങളിൽ പ്രവർത്തിക്കുന്ന സ്മാർട്ട്ഫോണുകളുമായി കണക്റ്റ് ചെയ്യാൻ ബ്ലൂടൂത്ത് 5.1 കണക്റ്റിവിറ്റിയും സ്മാർട്ട് വാച്ചിൽ നൽകിയിട്ടുണ്ട്. ഫിറ്റ്നസ്, ഹെൽത്ത് ഫീച്ചറുകളുടെ കാര്യത്തിലും നോയിസ് കളർഫിറ്റ് പൾസ് ബസ്സ് ഒട്ടും പിന്നിലല്ല.

സാധാരണ ഗതിയിൽ ഈ വില വിഭാഗത്തിൽ ലഭിക്കുന്ന എല്ലാ മികച്ച ഫീച്ചറുകളും നോയിസ് കളർഫിറ്റ് പൾസ് ബസ്സ് സ്മാർട്ട് വാച്ചിലും നൽകിയിട്ടുണ്ട്. നോയിസ് കളർഫിറ്റ് പൾസ് ബസ്സ് ഉപയോക്താക്കൾക്ക് 150-ലധികം ക്ലൗഡ് അധിഷ്‌ഠിത കസ്റ്റമൈസ് ചെയ്യാവുന്ന വാച്ച് ഫെയ്‌സുകൾ നൽകുന്നുവെന്ന് കമ്പനി അവകാശപ്പെടുന്നു. ഈ വാച്ച് ഒറ്റ ചാർജ് ചെയ്താൽ ഏഴ് ദിവസം വരെ ബാറ്ററി ബാക്ക് അപ്പ് ലഭിക്കുമെന്നും കമ്പനി അവകാശപ്പെടുന്നു.

ഈ സ്മാർട്ട് വാച്ചിൽ ആരോഗ്യ കാര്യങ്ങൾ നിരീക്ഷിക്കാനായി ഒപ്റ്റിക്കൽ ഹാർട്ട് റേറ്റ് സെൻസറും രക്തത്തിലെ ഓക്സിജന്റെ അളവ് അറിയാൻ സഹായിക്കുന്ന എസ്പിഒ2 മോണിറ്ററും ഉണ്ട്. ഈ സ്‌മാർട്ട് വാച്ചിന് നിങ്ങളുടെ ഉറക്ക രീതികൾ നിരീക്ഷിക്കാനും രക്തസമ്മർദ്ദം, സമ്മർദ്ദ നില, ആർത്തവചക്രം എന്നിവ നിരീക്ഷിക്കാനും കഴിയും. ഇത്തരത്തിൽ ആരോഗ്യ സംബന്ധമായി ബജറ്റ് സ്മാർട്ട് വാച്ചുകൾ നൽകുന്ന എല്ലാ ഫീച്ചറുകളും നോയിസ് കളർഫിറ്റ് പൾസ് ബസ്സ് നൽകുന്നു.

നിങ്ങളുടെ ഫോണും വാച്ചും ബ്ലൂടൂത്ത് ഉപയോഗിച്ച് കണക്‌റ്റ് ചെയ്‌തിരിക്കുകയാണെങ്കിൽ കോളുകൾ അറ്റൻഡ് ചെയ്യാൻ നോയിസ് കളർഫിറ്റ് പൾസ് ബസ്സിലൂടെ സാധിക്കും. കോളുകൾ വിളിക്കാനുള്ള ഡയൽ പാഡും ഈ സ്മാർട്ട് വാച്ചിൽ നൽകിയിട്ടുണ്ട്. ഇത്തരം കോളിങ് ഫീച്ചറുമായി വരുന്ന സ്മാർട്ട് വാച്ചുകൾ 5000 രൂപയിൽ താഴെ വില വിഭാഗത്തിൽ ലഭിക്കുന്നത് അപൂർവ്വമാണ്. ഉപയോക്താക്കൾക്ക് അവരുടെ ഫോണിലെ മ്യൂസിക്കും ക്യാമറയും സ്മാർട്ട് വാച്ചിലൂടെ തന്നെ നിയന്ത്രിക്കാനും കഴിയും. നോയിസ് കളർഫിറ്റ് പൾസ് ബസ്സ് വാട്ടർ റെസിസ്റ്റന്റ് ഡിസൈനുമായിട്ടാണ് വരുന്നത്.