ഷവോമി എംഐ ബാൻഡ് 5 ഏപ്രിൽ 3 ന് അവതരിപ്പിക്കും; പ്രതീക്ഷിക്കുന്ന സവിശേഷതകൾ

ഒരേ വിഭാഗത്തിൽ മികച്ച ഉൽ‌പ്പന്നങ്ങൾ‌ കൊണ്ടുവന്ന് വിപണിയിലെ മത്സരത്തിൽ കരുത്ത് തെളിയിക്കാനും മറ്റ് കമ്പനികളെ പിന്നിലാക്കാനുമുള്ള ഷവോമിയുടെ തന്ത്രം ഫിറ്റ്നസ് ബാൻഡിന്റെ കാര്യത്തിലും തുടരുന്നു. എംഐ ബാൻഡ് 4ന്റെ വിജയത്തിന് ശേഷം ഇപ്പോഴിതാ എംഐ ബാൻഡ് 5 പുറത്തിറക്കാനുള്ള തയ്യാറെടുപ്പിലാണ് കമ്പനി. വെയറബിൾ മാർക്കറ്റിൽ എംഐ ബാൻഡ് 4ലൂടെ നേടിയെടുത്ത ആധിപത്യം ഉറപ്പിക്കലാണ് ബാൻഡ് 5ലൂടെ കമ്പനി ലക്ഷ്യമിടുന്നതെന്ന് വ്യക്തമാണ്.

ഒരു ഓൺലൈൻ ലോഞ്ച് ഇവന്റ് നടത്തുന്നതിനെ കുറിച്ച് ഷവോമി അറിയിപ്പ് തന്നിരുന്നു. പക്ഷേ ഈ ഇവന്റിൽ ഏതൊക്കെ ഉത്പന്നങ്ങളാണ് പുറത്തിറക്കുക എന്ന കാര്യം കമ്പനി വ്യക്തമാക്കിയിരുന്നില്ല. സൂചനകൾ അനുസരിച്ച് വെയറബിൾ വിപണിക്ക് ഷവോമി ലോഞ്ച് ഇവന്റിൽ പ്രതീക്ഷിക്കാൻ ഒരുപാട് ഉണ്ട്. എംഐ ബാൻഡ് 5 ഉൾപ്പെടെ ഈ പരിപാടിയിൽ രണ്ട് വെയറബിളുകൾ കമ്പനി അവതരിപ്പിക്കുമെന്നാണ് സൂചന. ഗൂഗിൾ വെയർ ഒഎസിനെ അടിസ്ഥാനമാക്കി പ്രവർത്തിക്കുന്ന പുതിയ സ്മാർട്ട് വാച്ചുകളും കുട്ടികൾക്കുള്ള സ്മാർട്ട് വെയറബിളുകളും ഇവന്റിൽ വച്ച് പുറത്തിറക്കും.

എംഐ ബാൻഡ് 5 നെക്കുറിച്ച് കൂടുതൽ വിവരങ്ങളൊന്നും തന്നെ നിലവിൽ പുറത്ത് വിട്ടിട്ടില്ല. കഴിഞ്ഞ ഓഗസ്റ്റ് മുതൽ ഷവോമി ഈ പുതിയ ബാൻഡിന് പിന്നിൽ പ്രവർത്തിക്കുന്നുണ്ട്. എഐ ബാൻഡ് 4 നെക്കാൾ പല നിലയിൽ മികച്ചതായിരിക്കും മി ബാൻഡ് 5 എന്നാണ് റിപ്പോർട്ടുകൾ. എംഐ ബാൻഡ് 5 ഒരു വലിയ ഒ‌എൽ‌ഇഡി ഡിസ്‌പ്ലേയുമായിട്ടായിരിക്കും പുറത്തിറങ്ങുകയെന്നും ഗ്ലോബൽ പതിപ്പ് പേയ്‌മെന്റ് അപ്ലിക്കേഷനുകളെ അടക്കം സപ്പോർട്ട് ചെയ്യുന്നവയായിരിക്കുമെന്നും ഡിസ്പ്ലേയിൽ മെസേജുകൾ കാണാൻ സാധിക്കുമെന്നും റിപ്പോർട്ടുകളുണ്ട്.

നിലവിൽ എംഐ ബാൻഡ് 4 ഇന്ത്യയിൽ 2,299 രൂപയ്ക്ക് ലഭ്യമാണ്. എംഐ ബാൻഡ് 3i എന്നറിയപ്പെടുന്ന വിലകുറഞ്ഞ പതിപ്പ് ഇന്ത്യയിൽ 1,299 രൂപയ്ക്ക് ലഭ്യമാകും. എംഐ ബാൻഡ് 5 പുറത്തിറങ്ങുന്നതോടെ ഇന്ത്യയിൽ എംഐ ബാൻഡ് 4 ന് വില കുറയാൻ സാധ്യതകളുണ്ട്. അതല്ലെങ്കിൽ എംഐ ബാൻഡ് 4 നേക്കാൾ കൂടിയ വിലയ്ക്ക് പ്രീമിയം ബാൻഡ് എന്ന നിലയിലായിരിക്കും ബാൻഡ് 5 പുറത്തിറക്കുക.

ഷവോമി സ്മാർട്ട് വാച്ചുകൾ നിർമ്മിക്കുന്നുണ്ടെങ്കിലും അവയൊന്നും ഇതുവരെ ഇന്ത്യയിൽ എത്തിയിട്ടില്ല. എംഐ വാച്ച് ഈ വർഷം അവസാനത്തോടെ ഇന്ത്യയിൽ എത്തുമെന്നാണ് പ്രതീക്ഷിക്കുന്നത്. നിലവിൽ ഇന്ത്യയിൽ ഷവോമി സ്മാർട്ട്‌ഫോൺ വിപണിയിലാണ് ശ്രദ്ധ കേന്ദ്രീകരിച്ചിരിക്കുന്നത്. ഇന്ത്യയിലെ ഏറ്റവും ജനപ്രീയമായ സ്മാർട്ട്ഫോൺ ബ്രാന്റ് കൂടിയാണ് ഷവോമി.