എന്താണ് കിസാൻ ക്രഡിറ്റ് കാർഡ്, ഇതിനായി അപേക്ഷ നൽകേണ്ടതെങ്ങനെ?

എന്താണ് കിസാൻ ക്രെഡിറ്റ് കാർഡ്?

അമിത നിരക്ക് ഈടാക്കുന്ന പണമിടപാട് സ്ഥാപനങ്ങളുടെ കടക്കെണിയിൽ നിന്ന് കർഷകരെ രക്ഷിക്കുക എന്ന ലക്ഷ്യത്തോടെയുള്ള പദ്ധതിയാണ് കിസാൻ ക്രെഡിറ്റ് കാർഡ്. കുറഞ്ഞ നിരക്കിൽ വായ്പയെടുക്കാനായി സർക്കാർ ഉണ്ടാക്കിയ കിസാൻ ക്രെഡിറ്റ് കാർഡിലൂടെ വാഗ്ദാനം ചെയ്യുന്ന പലിശ നിരക്ക് രണ്ട് ശതമാനം വരെ കുറവായിരിക്കും. വായ്പയെടുത്ത വിളയുടെ വിളവെടുപ്പ് കാലത്തെയോ അത് വിറ്റഴിക്കാനുള്ള കാലയളവിനെയോ അടിസ്ഥാനമാക്കിയുള്ള ദീർഘകാല തിരിച്ചടവ് കാലയളവും സർക്കാർ നൽകും.

കിസാൻ ക്രെഡിറ്റ് കാർഡിന് അപേക്ഷിക്കാൻ കഴിയുന്നത് ആർക്കൊക്കെ

മറ്റ് ആളുകളുടെ ഭൂമിയിൽ കൃഷി ചെയ്യുന്നവർ ഉൾപ്പെടെ കാർഷിക മേഖലയുമായി ബന്ധപ്പെട്ട ഏതൊരു വ്യക്തിക്കും ഈ പദ്ധതിക്ക് അപേക്ഷിക്കാൻ അർഹതയുണ്ട്. അപേക്ഷകന് 18 നും 75 നും ഇടയിൽ പ്രായമുണ്ടായിരിക്കണം; 60 വയസ്സിനു മുകളിൽ പ്രായമുള്ളവർക്ക്, ഒരു കോ-അപ്ലിക്കേന്റ് ഉണ്ടായിരിക്കണം എന്ന് നിബന്ധനയുണ്ട്.

കിസാൻ ക്രെഡിറ്റ് കാർഡിനായി അപേക്ഷിക്കുന്നതെങ്ങനെ?

ഈ സ്കീം ലഭിക്കുന്നതിന് അപേക്ഷകൻ ആദ്യം അവരുടെ അവരവർക്ക് അക്കൌണ്ട് ഉള്ള ബാങ്കിന്റെ വെബ്സൈറ്റ് സന്ദർശിക്കണം. സ്റ്റേറ്റ് ബാങ്ക് ഓഫ് ഇന്ത്യ, ആക്സിസ് ബാങ്ക്, ഇന്ത്യൻ ഓവർസീസ് ബാങ്ക്, ബാങ്ക് ഓഫ് ഇന്ത്യ, എച്ച്ഡി‌എഫ്സി ബാങ്ക് എന്നിവയിലാണ് നിലവിൽ ഈ സംവിധാനം നൽകിയിട്ടുള്ളത്. ഈ ബാങ്കുകളിൽ ഏതെങ്കിലും ഒന്നിന്റെ ഔദ്യോഗിക വെബ്സൈറ്റിൽ നിന്നും അപേക്ഷാ ഫോം പ്രിന്റ് ചെയ്ത് എടുക്കാം.

അപേക്ഷ ഫോം ഇംഗ്ലീഷ്, ഹിന്ദി ഭാഷകളിലായി കൊമേഴ്ഷ്യൽ ബാങ്കുകളുടെ വെബ്‌സൈറ്റിലെ കെ‌സി‌സി വിഭാഗത്തിൽ ലഭ്യമാകും. ഈ അപേക്ഷയിൽ വിള വിതയ്ക്കൽ, ഭൂമി രേഖപ്പെടുത്തൽ തുടങ്ങിയ അടിസ്ഥാന വിവരങ്ങൾ ആവശ്യമാണ്. ഈ വിവരങ്ങൾ ശരിയായി പൂരിപ്പിച്ചുകഴിഞ്ഞാൽ സബ്മിറ്റ് ബട്ടണിൽ ക്ലിക്കുചെയ്യുക. സബ്മിറ്റ് ചെയ്താൽ പിന്നീടുള്ള ഉപയോഗങ്ങൾക്കായി ഒരു അപ്ലിക്കേഷൻ റഫറൻസ് നമ്പർ ജനറേറ്റ് ചെയ്യപ്പെടും.

അപേക്ഷകൻ പാൻ കാർഡിന്റെയോ ആധാർ കാർഡിന്റെയോ പകർപ്പ് പോലുള്ള ഐഡന്റിറ്റി തെളിയിക്കാനുള്ള രേഖകൾ അടുത്തുള്ള ബാങ്ക് ശാഖയിൽ സമർപ്പിക്കേണ്ടതാണ്. അതിനൊപ്പം MNREGA നൽകിയ ജോബ് കാർഡും വോട്ടറുടെ ഐഡി കാർഡും ആധാർ കാർഡും നൽകണം. കൂടാതെ വിലാസം തെളിയിക്കുന്നതിനായി റേഷൻ കാർഡും ബാങ്ക് അക്കൗണ്ട് സ്റ്റേറ്റ്മെന്റ്, മൂന്ന് മാസത്തിൽ കൂടാത്ത യൂട്ടിലിറ്റി ബിൽ എന്നിവയും സമർപ്പിക്കണം.

അപേക്ഷിക്കുമ്പോൾ ആവശ്യമായ മറ്റ് പ്രധാന രേഖകളിൽ ലാൻഡ് പേപ്പറുകൾ, അപേക്ഷകന്റെ പാസ്‌പോർട്ട് സൈസ് ഫോട്ടോ, സെക്യൂരിറ്റി പിഡിസി ഉൾപ്പെടെ ബാങ്ക് നൽകിയ ആവശ്യപ്പെടുന്ന മറ്റ് രേഖകൾ എന്നിവയും അപേക്ഷയോടൊപ്പം നൽകേണ്ടതുണ്ട്. ലോൺ ഓഫീസർ വായ്പ തുക അനുവദിച്ചുകഴിഞ്ഞാൽ ക്രഡിറ്റ് കാർഡ് അപേക്ഷകന്റെ വിലാസത്തിലേക്ക് അയയ്ക്കും. അതിനുശേഷം, എല്ലാ കാർഡ് ഉടമകൾക്കും അവരുടെ കാർഡിന്റെ ക്രെഡിറ്റ് പരിധി അനുസരിച്ച് സാധനങ്ങൾ വാങ്ങാനും മറ്റ് ആവശ്യങ്ങൾക്കും ഇത് ഉപയോഗിക്കാം. എടുത്ത തുകയ്ക്ക് അനുസരിച്ച പലിശ മാത്രമേ ഈടാക്കുകയുള്ളു.