സ്മാർട്ട്ഫോണുകളിൽ എംആധാർ (mAadhaar) ആപ്പ് ഡൌൺലോഡ് ചെയ്ത് ഉപയോഗിക്കുന്നത് എങ്ങനെ

എംആധാർ ആപ്പ് ഡൗൺലോഡ് ചെയ്യുമ്പോൾ നിങ്ങളുടെ പ്രൊഫൈൽ, രജിസ്റ്റർ ചെയ്ത ഫോൺ നമ്പർ, വിലാസം, പേര്, ഫോട്ടോഗ്രാഫ്, ലിംഗഭേദം, മറ്റ് വിവരങ്ങൾ എന്നിവ ആപ്പിൽ സേവ് ചെയ്യപ്പെടും എന്ന കാര്യം ശ്രദ്ധിക്കുക. വാഹനങ്ങളുടെ വിവരങ്ങളും ഡ്രൈവിങ് ലൈസൻസും കൊണ്ടുനടക്കുന്നതിന് പകരം ഉപയോഗിക്കുന്ന എംപരിവാഹൻ ആപ്പ് പോലെ എളുപ്പം ഉപയോഗിക്കാവുന്ന ആപ്പാണ് എംആധാർ. ഈ ആപ്പ് നിങ്ങളുടെ ഫോണിൽ ഡൌൺലോഡ് ചെയ്ത് ഉപയോഗിക്കേണ്ടത് എങ്ങനെയെന്ന് വിശദമായി നോക്കാം.

എംആധാർ ആപ്പ് ഡൌൺലോഡ് ചെയ്യുന്നത് എങ്ങനെ

നിങ്ങൾക്ക് എംആധാർ ആപ്പ് ഡൗൺലോഡ് ചെയ്യണമെങ്കിൽ താഴെ കൊടുത്തിരിക്കുന്ന കാര്യങ്ങൾ ചെയ്താൽ മതി. ഈ ആപ്പ് ഏത് ആൻഡ്രോയ്ഡ് സ്മാർട്ട്ഫോണിലും ഐഫോണിലും ലഭ്യമാകും.

• നിങ്ങൾ ഉപയോഗിക്കുന്നത് ആൻഡ്രോയിഡ് ഫോൺ ആണെങ്കിൽ ഗൂഗിൾ പ്ലേ സ്റ്റോറും ആപ്പിൾ ഐഫോൺ ആണെങ്കിൽ ആപ്പിൾക് ആപ്പ് സ്റ്റോറും തുറക്കുക.

• എംആധാർ എന്ന് സെർച്ച് ചെയ്യുക

• നിങ്ങൾക്ക് നിരവധി ഓപ്ഷനുകൾ ലഭിക്കും, എന്നാൽ യുഐഡിഎഐയുടെ എംആധാർ ആപ്പ് തിരഞ്ഞെടുക്കണം.

• ആപ്പ് ഇൻസ്റ്റാൾ ചെയ്യുക

• സ്മാർട്ട്‌ഫോണിൽ ആപ്പ് തുറക്കുക.

• 'ക്രിയേറ്റ് പാസ്വേർഡ് ബിഫോർ ഇംപോർട്ടിങ് യുവർ ആധാർ പ്രൊഫൈൽ ഓൺ ദിസ് മൊബൈൽ എന്ന ഫോം കാണും

• ഒരു പാസ്വേർഡ് നൽകുക

മുകളിൽ പറഞ്ഞിരിക്കുന്ന കാര്യങ്ങൾ ചെയ്താൽ തന്നെ നിങ്ങളുടെ സ്മാർട്ട്‌ഫോണിൽ എംആധാർ ആപ്പ് ഡൗൺലോഡ് ആവുകയും പ്രൊഫൈൽ സെറ്റാവുകയും ചെയ്യും. ഇത്രയും ചെയ്താൽ മാത്രം പോര. ഇനി നിങ്ങളുടെ സ്മാർട്ട്‌ഫോണിൽ എംആധാർ ആപ്പിലേക്ക് ആധാർ വിശദാംശങ്ങൾ ലിങ്ക് ചെയ്യേണ്ടതുണ്ട്. ഇതും വളരെ എളുപ്പമാണ്. ഇത്തരത്തിൽ ലിങ്ക് ചെയ്തില്ലെങ്കിൽ നിങ്ങളുടെ ഫോണിൽ എംആധാർ ആപ്പ് ഇൻസ്റ്റാൾ ചെയ്ത് വച്ചിരിക്കുന്നതുകൊണ്ട് കാര്യമൊന്നും ഇല്ല എന്നത് കൂടി ഓർക്കുക. അതുകൊണ്ട് തന്നെ എംആധാർ ആപ്പിലേക്ക് ആധാർ കാർഡ് വിവരങ്ങൾ ലിങ്ക് ചെയ്യേണ്ടത് എങ്ങനെയാണ് എന്ന് നോക്കാം.

വിവരങ്ങൾ ലിങ്ക് ചെയ്യാൻ

• 12 അക്ക ആധാർ നമ്പർ നൽകുകയോ ആധാർ കാർഡോ കീയോ സ്കാൻ ചെയ്യുകയോ ചെയ്യുക.

• നിങ്ങൾ ഉപയോഗിക്കുന്ന മൊബൈൽ നമ്പർ യുഐഡിഎഐയുമായി ലിങ്ക് ചെയ്തിരിക്കുന്നത് തന്നെയാണെന്ന് ഉറപ്പാക്കുക.

• വിശദാംശങ്ങൾ നൽകി കഴിഞ്ഞാൽ, ചെക്ക് ക്ലിക്കുചെയ്യുക. നിങ്ങൾ സ്ക്രീൻ റിഫ്രഷ് ചെയ്യുകയോ ക്ലോസ് ചെയ്യുകയോ ചെയ്യുന്നില്ലെന്ന് ഉറപ്പാക്കുക.

• മൊബൈൽ നമ്പറിലേക്ക് നിങ്ങൾക്ക് ഒരു ഒടിപി ലഭിക്കും. ഈ ഒടിപി നൽകി സബ്മിറ്റ് ചെയ്യുക

മുകളിൽ പറഞ്ഞിരിക്കുന്ന കാര്യങ്ങൾ ചെയ്തുകഴിഞ്ഞാൽ എംആധാർ ആപ്പിന്റെ ഹോംപേജിൽ പോയി നിങ്ങളുടെ പ്രൊഫൈൽ ടാപ്പുചെയ്ത് നിങ്ങൾക്ക് ആധാർ പ്രൊഫൈൽ കാണാൻ കഴിയും. നിങ്ങൾ ക്രിയേറ്റ് ചെയ്ത പ്രൊഫൈൽ പാസ്‌വേഡ് നൽകി വിവരങ്ങൾ നേടാനും സാധിക്കും. മുകളിൽ പറഞ്ഞിരിക്കുന്ന കാര്യങ്ങളെല്ലാം വളരെ എളുപ്പം ചെയ്യാവുന്നതാണ്. ഇത് ചെയ്താലുള്ള ഗുണം നിങ്ങളുടെ ആധാർ കാർഡ് എപ്പോഴും കൊണ്ടുനടക്കേണ്ടതില്ല എന്നതാണ്. നിങ്ങളുടെ ഫോണിൽ നിന്നും ധാരാളം സ്റ്റോറേജ് അപഹരിക്കുന്നതോ സുരക്ഷിതമല്ലാത്തതോ ആയ ആപ്പല്ല എം ആധാർ എന്നതിനാൽ ഇത് ഡൌൺലോഡ് ചെയ്യാവുന്നതാണ്.