ഡിജിറ്റല്‍ സിഗ്നേച്ചര്‍ എന്ന സാങ്കേതികതയെ അടുത്തറിയാം

ഡിജിറ്റൽ സിഗ്നേച്ചറുകൾ പബ്ലിക് കീ ക്രിപ്റ്റോഗ്രഫി അടിസ്ഥാനമാക്കിയുള്ളതാണ്, ഇത് അസമമായ ക്രിപ്റ്റോഗ്രഫി എന്നും അറിയപ്പെടുന്നു. ആർ‌എസ്‌എ പോലുള്ള ഒരു പൊതു കീ അൽ‌ഗോരിതം ഉപയോഗിച്ച്, ഒരാൾക്ക് ഗണിതശാസ്ത്രപരമായി ബന്ധിപ്പിച്ചിരിക്കുന്ന രണ്ട് കീകൾ സൃഷ്ടിക്കാൻ കഴിയും: ഒന്ന് പ്രൈവറ്റ് മറ്റൊന്ന് പബ്ലിക്. സാങ്കേതിക വളര്‍ച്ച വേഗത്തിൽ നീങ്ങുമ്പോൾ വരും കാലങ്ങളില്‍ ഡിജിറ്റല്‍ സിഗ്നേച്ചറിന്റെ പ്രാധാന്യം വർധിക്കുന്നു എന്ന വസ്തുത നമ്മൾ മനസിലാക്കേണ്ടത് അനിവാര്യമാണ്.

എന്താണ് ഡിജിറ്റല്‍ സിഗ്നേച്ചര്‍ കൊണ്ട് അർത്ഥമാക്കുന്നത് ?

സാധാരണ കൈയൊപ്പ് പോലെ തന്നെ നിയമപ്രാധാന്യമുള്ള ഒന്നാണ് ഡിജിറ്റല്‍ സിഗ്നേച്ചര്‍. ഇലക്ട്രോണിക് രേഖകള്‍ കൈമാറുമ്പോള്‍ കൈയൊപ്പിന് പകരം നല്‍കേണ്ടതാണ് ഡിജിറ്റല്‍ സിഗ്നേച്ചര്‍. 2000 ലെ ഇന്‍ഫര്‍മേഷന്‍ ടെക്‌നോളജി ആക്ട് പ്രകാരമാണ് ഡിജിറ്റല്‍ സിഗ്നേച്ചര്‍ നിയമ പ്രാധാന്യമുള്ളതാക്കിയത്. ഡിജിറ്റല്‍ സിഗ്നേച്ചര്‍ കൂട്ടിച്ചേര്‍ത്ത് ഒരു ഇലക്ട്രോണിക് ഡോക്യുമെന്റ് കൈമാറിയാല്‍ പിന്നീട് അതില്‍ നിന്ന് പിന്മാറാനാവില്ല എന്നതാണ് മറ്റൊരു വസ്‌തുത. ഡിജിറ്റല്‍ സിഗ്നേച്ചര്‍ ഉപയോഗിക്കാനുള്ള അവകാശം സര്‍ക്കാര്‍ അംഗീകൃത ഏജന്‍സികളില്‍ നിന്ന് നേടിയാല്‍ മാത്രമേ ഡിജിറ്റല്‍ സിഗ്നേച്ചര്‍ നിയമപ്രധാന്യത്തോടുകൂടി ഉപയോഗിക്കാൻ കഴിയുകയുള്ളു.

ഡിജിറ്റല്‍ സിഗ്നേച്ചര്‍ കൊണ്ടുള്ള ഗുണവിശേഷങ്ങൾ

ഒരു രേഖയില്‍ രണ്ടു പേര്‍ ഒപ്പിടണമെങ്കില്‍ രണ്ടു പേര്‍ക്കും വിദൂര സ്ഥലങ്ങളില്‍ ഇരുന്നു പോലും നിയമവിധേയമായ കരാറുകളില്‍ ഒപ്പു പതിക്കാനാകും. നേരത്തേ പ്രിന്റെടുത്ത് കൈയൊപ്പ് ഇട്ട ശേഷം സ്‌കാന്‍ ചെയ്ത് ഇ-മെയിൽ വഴി അയച്ചു കൊടുക്കണം. എന്നാല്‍ ഇപ്പോള്‍ പിഡിഎഫ് ഫയലുകളില്‍ ഡിജിറ്റലായി ഒപ്പിടാൻ കഴിയുന്നതാണ്. ഡിജിറ്റല്‍ സിഗ്നേച്ചര്‍ ഉള്‍പ്പെടുത്തിയ ഡാറ്റയില്‍ പിന്നീട് മറ്റൊരാള്‍ക്ക് മാറ്റങ്ങള്‍ വരുത്താനാകില്ല. ഫയലുകള്‍ക്ക് അത്തരത്തിലുള്ള സംരക്ഷണം ലഭിക്കുന്നുണ്ട്. സര്‍ക്കാര്‍ ഏജന്‍സികള്‍ ഇടയ്ക്കിടെ സര്‍ട്ടിഫിക്കറ്റ് പരിശോധിക്കുകയും സുരക്ഷിതത്വം ഉറപ്പാക്കുകയും ചെയ്യുന്നു.

ഡിജിറ്റല്‍ സിഗ്നേച്ചര്‍ എങ്ങനെ ലഭിക്കും?

ഡിജിറ്റല്‍ സിഗ്നേച്ചര്‍ വിതരണം ചെയ്യുന്നതിനായി വിവിധ ഏജന്‍സികള്‍ ഇപ്പോൾ നിലവിലുണ്ട്. ഉദാഹരണത്തിന് "കോഡ്സൊല്യൂഷൻസ്" എന്ന സ്ഥാപനവുമായി ബന്ധപ്പെട്ടാണ് കേരള സര്‍ക്കാര്‍ ജീവനക്കാര്‍ക്ക് ഡിജിറ്റല്‍ സിഗ്നേച്ചര്‍ ലഭ്യമാക്കുന്നത്. നിരവധി സ്വകാര്യ സ്ഥാപനങ്ങള്‍ വ്യത്യസ്തങ്ങളായ സേവനങ്ങളുമായി ഈ രംഗത്ത് പ്രവര്‍ത്തിക്കുന്നുണ്ട്. അപേക്ഷാ ഫോമിനൊപ്പം ഫോട്ടോ പതിച്ച തിരിച്ചറിയല്‍ കാര്‍ഡ്, വിലാസം തെളിയിക്കുന്നതിനുള്ള രേഖ എന്നിവയും സമര്‍പ്പിക്കണം. ഒരു വര്‍ഷം, രണ്ടു വര്‍ഷം കാലാവധിയുള്ള സര്‍ട്ടിഫിക്കറ്റ് ലഭിക്കും. കാലാവധി കഴിഞ്ഞാല്‍ വീണ്ടും പുതുക്കണം. വ്യക്തിപരമായ ആവശ്യങ്ങള്‍ക്കും കമ്പനിയുടെ ആവശ്യങ്ങള്‍ക്കും ഒരേ സമയം വിവിധ ഡിജിറ്റല്‍ സിഗ്നേച്ചര്‍ സര്‍ട്ടിഫിക്കറ്റുകള്‍ ഒരാള്‍ക്ക് നേടാനാകും.

ഡിജിറ്റല്‍ സിഗ്നേച്ചര്‍ മൂന്ന് തരത്തില്‍ തിരിച്ചിരിക്കുന്നു

മൂന്നു തരത്തിലുള്ള ഡിജിറ്റല്‍ സിഗ്നേച്ചര്‍ സര്‍ട്ടിഫിക്കറ്റുകള്‍ ലഭ്യമാണ്. വ്യത്യസ്ത ആവശ്യങ്ങള്‍ക്ക് അനുസരിച്ചാണിത് ഡിജിറ്റല്‍ സിഗ്നേച്ചര്‍ തരംതിരിച്ചിരിക്കുന്നത്.

ക്ലാസ് 1 സര്‍ട്ടിഫിക്കറ്റ്: സ്വകാര്യ വ്യക്തികളുടെ ഉപയോഗത്തിനായാണ് ക്ലാസ് 1 സര്‍ട്ടിഫിക്കറ്റ് കൊണ്ടുവന്നിരിക്കുന്നത്. ഡിജിറ്റല്‍ ഇടപാടുകളില്‍ ഒരാളുടെ വിശ്വാസ്യത തെളിയിക്കാന്‍ യൂസേഴ്‌സ് നെയ്മും ഇ-മെയിൽ കോണ്‍ടാക്റ്റ് ഡീറ്റെയ്ല്‍സും അടങ്ങിയ ഈ സര്‍ട്ടിഫിക്കറ്റിലൂടെ സാധിക്കുന്നതാണ്.

ക്ലാസ് 2 സര്‍ട്ടിഫിക്കറ്റ്: സാധാരണ ബില്ലുകള്‍ സമര്‍പ്പിക്കുന്നതിനും ഇന്‍കംടാക്‌സ് ഇ-ഫയലിംഗിനും ഫോം-16 ഇഷ്യു ചെയ്യുന്നതിനുമെല്ലാം ഇതാണ് ആവശ്യമായി വരുന്നത്.

ക്ലാസ് 3 സര്‍ട്ടിഫിക്കറ്റ്: ഇ-ടെണ്ടര്‍ സംബന്ധിച്ച ആവശ്യങ്ങള്‍ക്കായാണ് ഇത് ഉപയോഗിക്കുന്നത്. ഓണ്‍ലൈന്‍ ടെണ്ടറുകളില്‍ പങ്കെടുക്കാന്‍ ഇത് നിര്‍ബന്ധമാണ്.