Apple iPhone: ആപ്പിൾ ഐഫോൺ 12 പ്രോ പുറത്തിറങ്ങുക 64 എംപി ക്യാമറയുമായി

ക്യാമറയെ കുറിച്ചുള്ള വിവരത്തിനൊപ്പം തന്നെ ആപ്പിൾ ഐഫോൺ 12ന്റെ ബാറ്ററിയെ കുറിച്ചും റിപ്പോർട്ടുകളുണ്ട്. ആപ്പിൾ ഐഫോൺ 12 പ്രോ പുറത്തിറങ്ങുന്നത് 4,400 എംഎഎച്ച് ബാറ്ററിയുമായിട്ടായിരിക്കും എന്നാണ് റിപ്പോർട്ട്. 5 ജി നെറ്റ്‌വർക്ക് സപ്പോർട്ടുള്ള അടുത്ത തലമുറ എ 14 ബയോണിക് ചിപ്‌സെറ്റാണ് ഫോണിന് കരുത്ത് നൽകുന്നതെന്ന റിപ്പോർട്ട് മുമ്പ് പുറത്ത് വന്നിരുന്നു.

ഈ വർഷം പുറത്തിറങ്ങാനിരിക്കുന്ന പുതിയ ഐഫോൺ മോഡലിനായി ആപ്പിൾ എന്തൊക്കെയാണ് ആസൂത്രണം ചെയ്തിരിക്കുന്നത് എന്ന് വിശദീകരിക്കുന്ന ഒരു വീഡിയോ യൂട്യൂബ് ചാനലായ എവരിതിംഗ് ആപ്പിൾപ്രോ പുറത്തിറക്കി. പ്രശസ്ത ടിപ്സ്റ്റർ മാക്സ് വെയ്ൻ‌ബാക്കിനെ ഉദ്ദരിച്ചുകൊണ്ടാണ് വീഡിയോ ചെയ്തിരിക്കുന്നത്. ഈ വീഡിയോയിലാണ് ആപ്പിൾ ഐഫോൺ 12 പ്രോയുടെ സവിശേഷതകൾ വിശദീകരിച്ചത്.

സാംസങ് ഗാലക്‌സി എസ് 20 സീരീസ് പോലുള്ള മറ്റ് ബ്രാൻഡുകൾ പുറത്തിറക്കിയിരിക്കുന്ന പുതിയ സവിശേഷതകളുമായി പൊരുത്തപ്പെടുന്നതിനായിട്ടാണ് അടുത്ത തലമുറ ഐഫോൺ 12 പ്രോയുടെ ക്യാമറ അപ്‌ഗ്രേഡുചെയ്യുന്നതെന്നാണ് വീഡിയോയിൽ പറയുന്നത്. ട്രിപ്പിൾ റിയർ ക്യാമറ മൊഡ്യൂളിലേക്ക് ആപ്പിൾ 64 എംപി സോണി സെൻസർ ചേർക്കാൻ സാധ്യതയുണ്ടെന്നും വീഡിയോയിൽ പറയുന്നു. എന്നിരുന്നാലും, ഡ്യുവൽ 12 എംപി ക്യാമറ സെൻസർ കമ്പനി നിലനിർത്തുമോ ഇല്ലയോ എന്നകാര്യം പരാമർശിച്ചിട്ടില്ല.

വരാനിരിക്കുന്ന ഐഫോൺ 12 പ്രോയുടെ ക്യാമറ സെറ്റപ്പിലേക്ക് കമ്പനി നൈറ്റ് മോഡ് ടെലിഫോട്ടോ ക്യാമറ കൂടി വികസിപ്പിക്കുമെന്ന് പ്രതീക്ഷിക്കുന്നതായും യൂട്യൂബർ പങ്കിട്ട വീഡിയോ സൂചിപ്പിക്കുന്നു. ടെലിഫോട്ടോ ക്യാമറയിൽ നൈറ്റ് മോഡ് പ്രവർത്തിക്കുന്നുണ്ടെന്ന് ഉറപ്പുവരുത്താൻ ആപ്പിൾ അതിന്റെ അൾട്രാ വൈഡ് ആംഗിൾ ലെൻസിന്റെ അപ്പർച്ചർ 35 ശതമാനം വർദ്ധിപ്പിക്കുമെന്നും സൂചനയുണ്ട്.

ഐഫോൺ 12 പ്രോയിൽ പുതിയ ടൈം-ഓഫ്-ഫ്ലൈറ്റ് 3 ഡി സെൻസറും കൊണ്ടുവരും. അത് പോർട്രെയ്റ്റ് ഫോട്ടോകളുടെ ക്വാളിറ്റി മെച്ചപ്പെടുത്താൻ സഹായിക്കും. നേരത്തെ ഐഫോൺ 12 പ്രോ 5 ജി കണക്റ്റിവിറ്റിയെയും 120 ഹെർട്സ് റിഫ്രെഷ് റേറ്റുള്ള ഡിസ്പ്ലേയെയും സപ്പോർട്ട് ചെയ്യുമെന്ന് റിപ്പോർട്ടുകൾ ഉണ്ടായിരുന്നു. 5 ജി കണക്റ്റിവിറ്റിയും ഉയർന്ന റിഫ്രഷ് റേറ്റും സപ്പോർട്ട് ചെയ്യന്നതിന് ഒരു വലിയ ബാറ്ററി ആവശ്യമാണ്.

മുൻ മോഡലുകളെ അപേക്ഷിച്ച് 4,400 എംഎഎച്ച് ബാറ്ററിയാണ് ഐഫോൺ 12 പ്രോയ്ക്ക് കരുത്ത് നൽകുകയെന്ന് എവരിതിംഗ് ആപ്പിൾപ്രോ ചാനലിലെ വീഡിയോയിൽ പറയുന്നു. വെയ്ൻബാക്കിനെ ഉദ്ധരിച്ചുകൊണ്ടാണ് ഈ നിഗമനം. അതേസമയം, വരാനിരിക്കുന്ന ഐപാഡിലും ക്യാമറ നവീകരിക്കാൻ സാധ്യതയുണ്ടെന്ന് അദ്ദേഹം സൂചിപ്പിച്ചു.