നവംബറിൽ വിപണിയിലെത്താൻ പോകുന്ന കിടിലൻ സ്മാർട്ട്ഫോണുകൾ ഇവയാണ്

നവംബറിൽ പ്രതീക്ഷിച്ചിരുന്ന സ്മാർട്ട്ഫോൺ ലോഞ്ചുകളിൽ ഏറ്റവും പ്രധാനം ജിയോഫോൺ നെക്സ്റ്റ് തന്നൊയായിരുന്നു. ഈ ഫോൺ കഴിഞ്ഞ ദിവസം അവതരിപ്പിച്ചു. ഇനി ഈ മാസം പുറത്തിറങ്ങുമെന്ന് പ്രതീക്ഷിക്കുന്ന ഫോണുകളിൽ വൺപ്ലസ്, റെഡ്മി, ഐക്യുഒഒ, പോക്കോ എന്നിവയുടെ ഫോണുകളാണ് ഉള്ളത്. ഇതിൽ പലതിന്റെയും ലോഞ്ച് ഔദ്യോഗികമായി സ്ഥിരീകരിച്ചിട്ടില്ല എന്ന കാര്യം ശ്രദ്ധിക്കുക. എങ്കിലും റിപ്പോർട്ടുകൾ നൽകുന്ന സൂചനകൾ അനുസരിച്ച് ഈ ഫോണുകൾ നവംബറിൽ തന്നെ ലോഞ്ച് ചെയ്യും.

വൺപ്ലസ് 9ആർടി

വൺപ്ലസ് തങ്ങളുടെ ഏറ്റവും പുതിയ 9 സീരിസിലേക്ക് പുതിയ വൺപ്ലസ് 9ആർടി അവതരിപ്പിക്കുമെന്നാണ് റിപ്പോർട്ടുകൾ. 120 Hz റിഫ്രഷ് റേറ്റുള്ള 6.62 ഇഞ്ച് അമോലെഡ് ഡിസ്പ്ലെയാണ് ഈ ഡിവൈസിന്റെ ഏറ്റവും വലിയ സവിശേഷത. ക്വാൽകോം സ്നാപ്ഡ്രാഗൺ 888 ചിപ്‌സെറ്റിന്റെ കരുത്തിൽ ആയിരിക്കും ഈ സ്മാർട്ട്ഫോൺ പ്രവർത്തിക്കുന്നത്. വൺപ്ലസ് 9ആർടി മൂന്ന് വേരിയന്റുകളിൽ വരുമെന്നാണ് സൂചനകൾ. 8 ജിബി റാം 128 ജിബി സ്റ്റോറേജ്, 8 ജിബി റാം 256 ജിബി സ്റ്റോറേജ്, 12 ജിബി റാം 256 ജിബി ഓൺബോർഡ് സ്റ്റോറേജ് എന്നിവയായിരിക്കും ഈ വേരിയന്റുകൾ. 50എംപി, 16എംപി, 2എംപി എന്നീ മൂന്ന് പിൻക്യാമറകളും 16 എംപി ഫ്രണ്ട് ക്യാമറയും ഫോണിലുണ്ടായിരിക്കും. 4,500എംഎഎച്ച് ബാറ്ററിയും ഡിവൈസിൽ ഉണ്ടാകാൻ സാധ്യതയുണ്ട്.

റെഡ്മി നോട്ട് 11 സീരിസ്

ചൈനയിൽ ഇതിനകം ലോഞ്ച് ചെയ്ത സ്മാർട്ട്‌ഫോൺ സീരീസാണ് ഷവോമി റെഡ്മി നോട്ട് 11 സീരിസ്. ഈ സീരിസിൽ നോട്ട് 11, നോട്ട് 11 പ്രോ, നോട്ട് 11 പ്രോ+ എന്നീ ഡിവൈസുകൾ ഉണ്ടായിരിക്കും. ഈ ഫോണുകൾ നവംബറിൽ ആഗോള വിപിണിയിലെത്തുമെന്ന് പ്രതീക്ഷിക്കുന്നു. ഫാസ്റ്റ് ചാർജിങ്, അമോലെഡ് ഡിസ്പ്ലേ എന്നിവയാണ് ഡിവൈസുകളുടെ പ്രധാന സവിശേഷതകൾ. റെഡ്മി നോട്ട് 11 ന് 6.67 ഇഞ്ച് ഡിസ്‌പ്ലേയുണ്ട്. ഈ സ്മാർട്ട്ഫോണുകളെല്ലാം മീഡിയടെക് ഡൈമെൻസിറ്റി ചിപ്സെറ്റുകളിലാണ് പ്രവർത്തിക്കുന്നത്. റെഡ്മി നോട്ട് 11 പ്രോ+ൽ 108 എംപിയുടെ ട്രിപ്പിൾ ക്യാമറ സെറ്റപ്പും ഉണ്ട്. 5,000 എംഎഎച്ച് ബാറ്ററിയാണ് ഡിവൈസുകളുടെ മറ്റൊരു സവിശേഷത.

ഐക്യുഒഒ 8 പ്രോ

ഐക്യുഒഒ 8 പ്രോ ഓഗസ്റ്റിൽ അവതരിപ്പിക്കുമെന്ന് പ്രഖ്യാപിച്ചെങ്കിലും ഇതുവരെ ലോഞ്ച് നടന്നിട്ടില്ല. ഈ ഡിവൈസ് നവംബറിൽ വിപണിയിലെത്തിയേക്കും. 120Hz റിഫ്രഷ് റേറ്റുള്ള 6.78 ഇഞ്ച് അമോലെഡ് ഡിസ്‌പ്ലേയാണ് ഫോണിലുണ്ടാവുക. ക്വാൽകോം സ്‌നാപ്ഡ്രാഗൺ 888 സീരീസ് ചിപ്‌സെറ്റും ഫോണിൽ നൽകും. ഐക്യുഒഒ 8 പ്രോ കുറഞ്ഞത് 8 ജിബി റാമും 128 ജിബി ഇന്റേണൽ സ്പേസും നൽകും. 50എംപി പ്രൈമറി ക്യാമറയുള്ള ട്രിപ്പിൾ ക്യാമറ സെറ്റപ്പും ഈ ഡിവൈസിൽ ഉണ്ടായിരിക്കും. 16 എംപി സെൽഫി ലെൻസും ഈ ഡിവൈസിൽ ഉണ്ടായിരിക്കും. ഐക്യുഒഒ 8 പ്രോ 4,500 എംഎഎച്ച് ബാറ്ററിയും ഫാസ്റ്റ് ചാർജിങ് സപ്പോർട്ടമായിട്ടായിരിക്കും വരുന്നത്.

പോക്കോ എം4 പ്രോ

പോക്കോ ഈ മാസം ലോഞ്ച് ചെയ്യുമെന്ന് പ്രതീക്ഷിക്കുന്നൊരു സ്മാർട്ട്ഫോണാണ് പോക്കോ എം4 പ്രോ. 6.6 ഇഞ്ച് ഡിസ്‌പ്ലേയും 90Hz റിഫ്രഷ് റേറ്റുമായിട്ടായിരിക്കും ഈ ഡിവൈസ് വരുന്നത്. 50എംപി പ്രൈമറി ക്യാമറയടങ്ങുന്ന ട്രിപ്പിൾ ക്യാമറ സെറ്റപ്പും 16എംപി ഫ്രണ്ട് ഷൂട്ടറും ഈ ഫോണിൽ ഉണ്ടായിരിക്കും. 8 ജിബി റാമും 128 ജിബി ഇന്റേണൽ സ്റ്റോറേജും ഫോണിൽ ഉണ്ടായിരിക്കുമെന്നും മീഡിയടെക്കിന്റെ ഡൈമൻസിറ്റി എസ്ഒസിയായിരികകും പോക്കോ എം4 പ്രോയ്ക്ക് കരുത്ത് നൽകുന്നതെന്നും സൂചനകൾ ഉണ്ട്. 5,000mAh ബാറ്ററിയും ഈ സ്മാർട്ട്ഫോണിൽ കമ്പനി നൽകിയേക്കും.