ഹോണർ 9X പ്രോ ഇന്ത്യയിൽ അവതരിപ്പിച്ചു: വില, ഓഫറുകൾ, സവിശേഷതകൾ

ഹോണർ 9 എക്സ് പ്രോ കഴിഞ്ഞ വർഷം ജൂലൈയിലാണ് കമ്പനി ചൈനയിൽ പുറത്തിറക്കിയത്. ആഗോളതലത്തിൽ ഈ സ്മാർട്ട്‌ഫോൺ 2020 ഫെബ്രുവരിയിൽ വിപണിയിലെത്തി. ഫോണിന്റെ ഏറ്റവും വലിയ പ്രത്യേകത അതിലുള്ള 7nm കിരിൻ 810 ചിപ്‌സെറ്റാണ്. ഹോണർ 9 എക്സ് പോലെ പോപ്പ്-അപ്പ് സെൽഫി ക്യാമറയും 4,000 എംഎഎച്ച് ബാറ്ററിയുമായിട്ടാണ് ഈ സ്മാർട്ട്ഫോണും വിപണിയിൽ എത്തുന്നത്.

കമ്പനിയുടെ ഔദ്യോഗിക ആപ്പ് ഗാലറി ഇന്ത്യൻ വിപണിയിൽ അവതരിപ്പിക്കുന്നതിൽ തങ്ങൾക്ക് സന്തോഷമുണ്ടെന്നും അത് ബ്രാൻഡിന്റെ ഏറ്റവും പ്രശസ്തമായ എക്സ് സീരീസ് സ്മാർട്ട്‌ഫോണുകളുടെ നിരയിലെ പുതിയ സ്മാർട്ട്ഫോണായ ഹോണർ 9 എക്സ് പ്രോയിലൂടെയായതിൽ അഭിമാനിക്കുന്നുവെന്നും ഹോണർ ഇന്ത്യയുടെ പ്രസിഡന്റ് ചാൾസ് പെംഗ് പറഞ്ഞു. ഉപയോക്താക്കൾക്ക് മികച്ച സവിശേഷതകൾ നൽകുന്ന ഫോണിൽ ആപ്പ് ഗാലറി മികച്ച അനുഭവം നൽകുമെന്നും അദ്ദേഹം കൂട്ടിച്ചേർത്തു.

ഹോണർ 9X പ്രോ: വിലയും ഓഫറുകളും

ഹോണർ 9 എക്സ് പ്രോ ഇന്ത്യയിൽ 17,999 രൂപയ്ക്ക് ഫ്ലിപ്കാർട്ടിലൂടെ ലഭ്യമാക്കും. ഫ്ലിപ്കാർട്ടിൽ രജിസ്റ്റർ ചെയ്തിട്ടുള്ള ഉപഭോക്താക്കൾക്കായി ഹോണർ മെയ് 21 (12:00 PM) മുതൽ മെയ് 22 (12:00 PM) വരെ 24 മണിക്കൂർ ‘സ്പെഷ്യൽ ഏർലി ആക്സസ് സെയിൽ' നടത്തും. ഈ സെയിലിലൂടെ ഉപയോക്താക്കൾക്ക് 3,000 രൂപ കിഴിവ് ലഭിക്കും. അധികച്ചെലവുമില്ലാതെ 6 മാസം വരെ ഇഎംഐ ഓപ്ഷനും ലഭ്യമാക്കുന്നുണ്ട്.

വാങ്ങിയ തീയതി മുതൽ 3 മാസം 7 ദിവസം വരെ റിട്ടേൺ പോളിസിക്കും ആക്സിഡന്റലായി ഫോണിന് എന്തെങ്കിലും പറ്റിയാൽ ഒരു തവണ സൌജന്യമായ സ്ക്രീൻ റീപ്ലെയിസ്മെന്റും കമ്പനി ഓഫറായി നൽകുന്നുണ്ട്. മിഡ്‌നൈറ്റ് ബ്ലാക്ക്, ഫാന്റം പർപ്പിൾ കളർ ഓപ്ഷനുകളിൽ ഫോൺ ലഭ്യമാകും. ഈ പ്രത്യേക ഓഫർ ലഭിക്കുന്നതിന് ഉപയോക്താക്കൾ ഫ്ലിപ്കാർട്ടിൽ രജിസ്റ്റർ ചെയ്യണം. അത് ഇന്നലെ ഉച്ചയ്ക്ക് 1 മണി മുതൽ ആരംഭിച്ച രജിസ്ട്രേഷൻ മെയ് 19 അർദ്ധരാത്രി വരെ തുടരും.

ഹോണർ 9X പ്രോ: സവിശേഷതകൾ

ഫുൾ എച്ച്ഡി+ റെസല്യൂഷനും 19.5: 9 ആസ്പാക്ട് റേഷിയോവുമുള്ള 6.59 ഇഞ്ച് എൽടിപിഎസ് ഐപിഎസ് എൽസിഡി സ്‌ക്രീനാണ് ഹോണർ 9 എക്‌സ് പ്രോ ഫോണിലുള്ളത്. 6 ജിബി റാമും 256 ജിബി ഇന്റേണൽ സ്റ്റോറേജുമായി ജോടിയാക്കിയ ഒക്ടാകോർ 7 എൻഎം കിരിൻ 810 സോസിയുടെ കരുത്തിലാണ് ഫോൺ പ്രവർത്തിക്കുന്നത്. കൂടാതെ, യുഎസ്ബി ടൈപ്പ്-സി ചാർജിംഗ് പോർട്ടും 4,000 എംഎഎച്ച് ബാറ്ററിയും ഫോണിൽ നൽകിയിട്ടുണ്ട്.

ഫോട്ടോഗ്രാഫിക്കായി ഹോണർ 9 എക്സ് പ്രോയിൽ ഹോണർ 9 എക്‌സിന്റെ അതേ ട്രിപ്പിൾ ക്യാമറ സെറ്റപ്പാണ് നൽകിയിട്ടുള്ളത്. ഇതിൽ 48 മെഗാപിക്സൽ പ്രൈമറി സെൻസർ (സോണി IMX582), 8 മെഗാപിക്സൽ അൾട്രാ വൈഡ് ലെൻസ്, 2 മെഗാപിക്സൽ ഡെപ്ത് സെൻസർ എന്നിവ ഉൾപ്പെടുന്നു. 16 മെഗാപിക്സൽ ഫ്രണ്ട് സ്‌നാപ്പറുള്ള മോട്ടറൈസ്ഡ് പോപ്പ്-അപ്പ് സെൽഫി ക്യാമറയും ഫോണിലുണ്ട്. ആൻഡ്രോയിഡ് 9 പൈ ഒഎസ് ബേസ്ഡ്ഡ് കസ്റ്റം EMUI 9.1ലാണ് സ്മാർട്ട്‌ഫോൺ പ്രവർത്തിക്കുന്നത്.