ട്രിപ്പിൾ റിയർ ക്യാമറ സെറ്റപ്പുമായി ഹുവാവേ പി സ്മാർട്ട് എസ് അവതരിപ്പിച്ചു; വിലയും സവിശേഷതകളും

ഹുവാവേ പി സ്മാർട്ട് എസ്: വില

കിരിൻ 710 എഫ് പ്രോസസറിന്റെ കരുത്തിൽ പ്രവർത്തിക്കുന്ന ഹുവാവേ പി സ്മാർട്ട് എസ് സ്മാർട്ട്ഫോണിന് ഇറ്റലിയിൽ 259.90 യൂറോ (ഏകദേശം 22,100 രൂപ)യാണ് വില. 48 എംപി പ്രധാന ക്യാമറയോട് കൂടിയ ട്രിപ്പിൾ റിയർ ക്യാമറ സെറ്റപ്പുമായി വരുന്ന ഈ സ്മാർട്ട്ഫോൺ ബ്രീത്തിംഗ് ക്രിസ്റ്റൽ, മിഡ്‌നൈറ്റ് ബ്ലാക്ക് എന്നീ രണ്ട് കളർ ഓപ്ഷനുകളിലാണ് ലഭ്യമാവുക. ലഭ്യമാണ്.

ഹുവാവേ പി സ്മാർട്ട് എസ്: സവിശേഷതകൾ

ഫുൾ എച്ച്ഡി + (1,080x2,440 പിക്‌സൽ) റെസല്യൂഷനോടുകൂടിയ 6.3 ഇഞ്ച് അമോലെഡ് ഡിസ്‌പ്ലേയാണ് ഹുവാവേ പി സ്മാർട്ട് എസ് സ്മാർട്ട്ഫോണിലുള്ളത്. ഈ അമോലെഡ് ഡിസ്പ്ലേയിൽ ഇൻ-ഡിസ്പ്ലേ ഫിംഗർപ്രിന്റ് സ്കാനറും നൽകിയിട്ടുണ്ട്. 2.2 ജിഗാഹെർട്‌സ് ക്ലോക്ക്ഡ് നാല് കോർടെക്‌സ്-എ 73 കോറുകളും 1.7 ജിഗാഹെർട്‌സ് കോക്ക്ഡ് നാല് കോർടെക്‌സ്-എ 53 കോറുകളുമുള്ള കിരിൻ 710എഫ് ഒക്ട കോർ പ്രോസസറാണ് ഈ സ്മാർട്ട്ഫോണിന്റെ കരുത്ത്.

4 ജിബി റാമും 128 ജിബി സ്റ്റോറേജുമായിട്ടാണ് ഹുവാവേ പി സ്മാർട്ട് എസ് പുറത്തിറക്കിയിരിക്കുന്നത്. 6 ജിബി റാമും 64 ജിബി ഇൻബിൽറ്റ് സ്റ്റോറേജുമായി പുറത്തിറങ്ങുന്ന ഹവാവേ എൻജോയ് 10 എസിൽ നിന്നും ഈ സ്മാർട്ട്ഫോണിനെ വ്യത്യസ്തമാക്കുന്ന പ്രധാന ഘടകം സ്റ്റോറേജാണ്. ഈ ഡിവൈസിൽ 4,000 എംഎഎച്ച് ബാറ്ററിയാണ് കമ്പനി നൽകിയിരിക്കുന്നത്. ഫോണിന്റെ ബോക്സിൽ 10W ചാർജറും ഹുവാവേ നൽകുന്നുണ്ട്.

എഫ് / 1.8 അപ്പേർച്ചറുള്ള 48 മെഗാപിക്സൽ പ്രൈമറി ക്യാമറ, എഫ് / 2.4 അപ്പേർച്ചറുള്ള 8 മെഗാപിക്സൽ അൾട്രാ വൈഡ് ആംഗിൾ ക്യാമറ, 2 മെഗാപിക്സൽ ഡെപ്ത് സെൻസർ എന്നിവ ഉൾപ്പെടുന്ന ട്രിപ്പിൾ ക്യാമറ സെറ്റപ്പാണ് ഈ സ്മാർട്ട്ഫോണിന്റെ പ്രധാന സവിശേഷത. സെൽഫികൾക്കും വീഡിയോകോളുകൾക്കുമായി ഈ ഡിവൈസിൽ 16 മെഗാപിക്സൽ സെൽഫി ഷൂട്ടറും ഹുവാവേ നൽകിയിട്ടുണ്ട്.

4 ജി എൽടിഇ, വൈ-ഫൈ 802.11ac, ബ്ലൂടൂത്ത് വി 5.0, ജിപിഎസ് / എ-ജിപിഎസ്, യുഎസ്ബി ടൈപ്പ്-സി, 3.5 എംഎം ഹെഡ്‌ഫോൺ ജാക്ക് എന്നീ കണക്ടിവിറ്റി സവിശേഷതകളും ഹുവാവേ പി സ്മാർട്ട് എസ് സ്മാർട്ട്ഫോണിലുണ്ട്. ഇതൊരു ഡ്യുവൽ സിം ഡിവൈസാണ്.