എൽ‌ജി കെ42, എൽ‌ജി കെ52 സ്മാർട്ട്ഫോണുകൾ വൈകാതെ ഇന്ത്യൻ വിപണിയിലെത്തും

എൽജി കെ42, കെ52 എന്നിവ ബജറ്റ് സ്മാർട്ട്ഫോണുകളാണ്. ഈ ഡിവൈസുകൾ ഇന്ത്യൻ വിപണിയിൽ അവതരിപ്പിക്കുന്നത് സംബന്ധിച്ച വിവരങ്ങളൊന്നും കമ്പനി ഔദ്യോഗികമായി പുറത്ത് വിട്ടിട്ടില്ലെങ്കിലും ബിഐഎസ് സർട്ടിഫിക്കേഷൻ വെബ്സൈറ്റിൽ ഈ ഡിവൈസുകൾ ലിസ്റ്റ് ചെയ്തിട്ടുള്ളതിനാൽ തന്നെ അധികം വൈകാതെ തന്നെ ഇവ വിപണിയിൽ അവതരിപ്പിക്കുമെന്ന് ഉറപ്പിക്കാം.

ടിപ്പ്സ്റ്റർ മുകുൾ ശർമ പുറത്ത് വിട്ട് വിവരമനുസരിച്ച്, LM-K420YMW, LM-K520YMW എന്നീ മോഡൽ നമ്പരുകളിലുള്ള രണ്ട് പുതിയ എൽജി സ്മാർട്ട്‌ഫോണുകൾ ബിഐഎസ് സർട്ടിഫിക്കേഷൻ ഡാറ്റാബേസിൽ ലിസ്റ്റ് ചെയ്തിട്ടുണ്ട്. എഫ്‌സിസി, ബ്ലൂടൂത്ത് എസ്‌ഐജി സർട്ടിഫിക്കേഷൻ ലിസ്റ്റിങുകളിലും ഈ മോഡൽ നമ്പർ കണ്ടെത്തിയിരുന്നു. ഈ ഫോണുകൾ ഇതിനകം തെക്കേ അമേരിക്ക, യൂറോപ്പ് തുടങ്ങിയ ചില വിപണികളിൽ ലോഞ്ച് ചെയ്തിട്ടുണ്ട്.

എൽജി കെ42: സവിശേഷതകൾ

എൽജി കെ42 സ്മാർട്ട്‌ഫോൺ 6.6 ഇഞ്ച് എച്ച്ഡി + പഞ്ച്-ഹോൾ ഡിസ്‌പ്ലേയുമായിട്ടാണ് വരുന്നത്. 3 ജിബി റാമും 64 ജിബി സ്റ്റോറേജ് സ്‌പെയ്‌സുമുള്ള ഡിവൈസിന് കരുത്ത് നൽകുന്നത് ഒക്ടാകോർ മീഡിയടെക് ഹെലിയോ പി 22 ചിപ്‌സെറ്റായിരിക്കും. ഡിവൈസിൽ 13 എംപി പ്രൈമറി സെൻസർ, 5 എംപി സൂപ്പർ വൈഡ് സെൻസർ, 2 എംപി ഡെപ്ത് സെൻസർ, 2 എംപി മാക്രോ സെൻസർ എന്നീ ക്യാമറകൾ അടങ്ങുന്ന ക്വാഡ് ക്യാമറ സെറ്റപ്പും ഉണ്ടായിരിക്കും.

എൽജി കെ42 സ്മാർട്ട്ഫോണിൽ സെൽഫിക്കും വീഡിയോ കോളിങിനുമായി 8 എംപി ക്യാമറയാണ് നൽകിയിട്ടുള്ളത്. 4000 എംഎഎച്ച് ബാറ്ററി, മിൽ-എസ്ടിഡി -810 ജി സർട്ടിഫിക്കേഷൻ, സൈഡ് മൌണ്ടഡ് ഫിംഗർപ്രിന്റ് സെൻസർ, ആൻഡ്രോയിഡ് 10 ഒഎസ് ബേസ്ഡ് എൽജി യുഎക്സ് എന്നിവയാണ് ഈ ഡിവൈസിന്റെ മറ്റ് സവിശേഷതകൾ

എൽജി കെ52: സവിശേഷതകൾ

6.6 ഇഞ്ച് ഫുൾവിഷൻ ഡിസ്‌പ്ലേയാണ് എൽജി കെ52 സ്മാർട്ട്ഫോണിൽ ഉള്ളത്. ഈ ഡിവൈസ് ഒക്ടാകോറിന്റെ കരുത്തിലാണ് പ്രവർത്തിക്കുക. 4000 എംഎഎച്ച് ബാറ്ററിയും ഡിവൈസിൽ ഉണ്ടായിരിക്കും. 48 എംപി പ്രൈമറി ലെൻസുള്ള ഒരു സ്‌ക്വിക്കിൾ ക്വാഡ് ക്യാമറ ലേഔട്ടാണ് ഡിവൈസിൽ ഉള്ളത്. ഇതിൽ 115 ഡിഗ്രി ഫീൽഡ് വ്യൂ ഉള്ള 5 എംപി അൾട്രാ വൈഡ് ലെൻസ്, രണ്ട് 2 എംപി സെൻസറുകൾ എന്നിവയും നൽകിയിട്ടുണ്ട്. പഞ്ച്-ഹോൾ കട്ട് ഔട്ടിനുള്ളിൽ 13 എംപി സെൽഫി ക്യാമറ സെൻസറും കമ്പനി സ്ഥാപിച്ചിട്ടുണ്ട്. 4 ജിബി റാം, 64 ജിബി സ്റ്റോറേജ് സ്പേസ് എന്നിവയള്ള ഡിവൈസിൽ സൈഡ് മൌണ്ടഡ് ഫിംഗർപ്രിന്റ് സെൻസറും ഉണ്ട്.