എംഐ 11 അൾട്ര സ്മാർട്ട്ഫോണിന്റെ ഓപ്പൺ സെയിൽ ഇന്ന് ആരംഭിക്കും; വില, സവിശേഷതകൾ

എംഐ 11 അൾട്ര സ്മാർട്ട്‌ഫോൺ ജൂലൈ 7ന് നടന്ന പ്രത്യേക വിൽപ്പനയിലൂടെ ഉപയോക്താക്കൾക്ക് ലഭ്യമാക്കിയിരുന്നു. ഈ സെയിലിലൂടെ ഡിവൈസ് വാങ്ങുന്നകിന് ആളുകൾക്ക് ആദ്യം ഒരു അൾട്രാ ഗിഫ്റ്റ് കാർഡ് വാങ്ങേണ്ടിവന്നിരുന്നു. 1,999 രൂപയാണ് ഈ ഗിഫ്റ്റ് കാർഡിന് ഈടാക്കിയിരുന്നത്. 6.81 ഇഞ്ച് ഡിസ്പ്ലെ, 1.1 ഇഞ്ച് സെക്കന്ററി ഡിസ്പ്ലെ, ട്രിപ്പിൾ റിയർ ക്യാമറ സെറ്റപ്പ്, സ്‌നാപ്ഡ്രാഗൺ 888 എസ്ഒസിഎന്നിവയാണ് ഈ സ്മാർട്ട്ഫോണിന്റെ സവിശേഷതകൾ.

എംഐ 11 അൾട്ര: വിലയും വിൽപ്പനയും

ഷവോമിയുടെ ഔദ്യോഗിക വെബ്‌സൈറ്റ്, ആമസോൺ എന്നിവ വഴിയാണ് എംഐ11 അൾട്ര സ്മാർട്ട്ഫോൺ ഇന്ന് വിൽപ്പനയ്ക്ക് എത്തുന്നത്. ഈ ഡിവൈസിന്റെ 12 ജിബി റാമും 256 ജിബി സ്റ്റോറേജുമുള്ള മോഡൽ മാത്രമാണ് നിലവിൽ ഇന്ത്യയിൽ അവതരിപ്പിച്ചിരിക്കുന്നത്. ഈ ഡിവൈസിന് 69,999 രൂപയാണ് വില. സെറാമിക് ബ്ലാക്ക്, സെറാമിക് വൈറ്റ് കളർ ഓപ്ഷനുകളിൽ ഈ സ്മാർട്ട്ഫോൺ ലഭ്യമാകും. എസ്‌ഐ‌ഐ ബാങ്ക് ക്രെഡിറ്റ് കാർഡ് ഉപയോഗിച്ച് എംഐ 11 അൾട്ര സ്മാർട്ട്ഫോൺ വാങ്ങുന്ന ആളുകൾക്ക് 5,000 രൂപ വരെ കിഴിവ് ലഭിക്കുമെന്നാണ് എംഐ വെബ്‌സൈറ്റിലും ആമസോൺ ലിസ്റ്റിങിലും പറയുന്നത്.

എംഐ 11 അൾട്ര: സവിശേഷതകൾ

എംഐ 11 അൾട്ര സ്മാർട്ട്ഫോണിൽ 6.81 ഇഞ്ച് ഡബ്ല്യുക്യുഎച്ച്ഡി+ (1,440x3,200 പിക്‌സൽ) ഇ4 അമോലെഡ് ഡിസ്‌പ്ലേയാണ് നൽകിയിട്ടുള്ളത്. ഈ ഡിസ്പ്ലെയ്ക്ക് 20: 9 അസ്പാക്ട് റേഷിയോ, 120 ഹെർട്സ് റിഫ്രഷ് റേറ്റ് എന്നിവയും ഉണ്ട്. ഡിവൈസിന്റെ പിൻഭാഗത്ത് 1.1 ഇഞ്ച് (126x294 പിക്‌സൽ) സെക്കൻഡറി ഡിസ്‌പ്ലേയും നൽകിയിട്ടുണ്ട്. വളരെ ആകർഷകമായ ഡിവൈസിനാണ് ഇത് നൽകിയിട്ടുള്ളത്. ആൻഡ്രോയിഡ് 11 ബേസ്ഡ് എംഐയുഐ 12ലാണ് ഈ സ്മാർട്ട്ഫോൺ പ്രവർത്തിക്കുന്നത്.

സ്മാർട്ട്ഫോണിന്റെ പിന്നിൽ സെക്കന്ററി ഡിസ്പ്ലേയ്ക്ക് അടുത്തായി 50 മെഗാപിക്സൽ പ്രൈമറി സെൻസർ, 48 മെഗാപിക്സൽ അൾട്രാ വൈഡ് ആംഗിൾ ലെൻസ്, 48 മെഗാപിക്സൽ ടെലിഫോട്ടോ ലെൻസ് എന്നിവയുള്ള ട്രിപ്പിൾ റിയർ ക്യാമറ സെറ്റപ്പും ഷവോമി നൽകിയിട്ടുണ്ട്. സെൽഫികൾക്കായി ഹോൾ-പഞ്ച് കട്ട ഔട്ടിൽ 20 മെഗാപിക്സൽ പ്രൈമറി സെൻസറാണ് നൽകിയിട്ടുള്ളത്.

12 ജിബി റാമും 256 ജിബി ഓൺ‌ബോർഡ് സ്റ്റോറേജുമുള്ള എംഐ 11 അൾട്ര സ്മാർട്ട്ഫോണിന് കരുത്ത് നൽകുന്നത് ക്വാൽകോം സ്‌നാപ്ഡ്രാഗൺ 888 എസ്ഒസിയാണ്. 5ജി, ഡ്യുവൽ-ബാൻഡ് വൈ-ഫൈ 6, ബ്ലൂടൂത്ത് വി 5.2, ജിപിഎസ്, എജിപിഎസ്, നാവിക് സപ്പോർട്ട്, എൻ‌എഫ്‌സി, യുഎസ്ബി ടൈപ്പ്-സി പോർട്ട് എന്നിവയാണ് ഡിവൈസിൽ ഉള്ള കണക്റ്റിവിറ്റി ഓപ്ഷനുകൾ. 67W വയർഡ് ഫാസ്റ്റ് ചാർജിങ്, വയർലെസ് ചാർജിങ്, 10W റിവേഴ്‌സ് വയർലെസ് ചാർജിങ് എന്നിവ സപ്പോർട്ട് ചെയ്യുന്ന 5,000 എംഎഎച്ച് ബാറ്ററിയും ഡിവൈസിൽ ഉണ്ട്.