9,999 രൂപ വിലയുമായി മൈക്രോമാക്സ് ഇൻ 1 സ്മാർട്ട്ഫോൺ വിപണിയിലെത്തി; സവിശേഷതകൾ

മൈക്രോമാക്സ് ഇൻ 1 സ്മാർട്ട്ഫോൺ അതിന്റെ വിലയ്ക്ക് ചേർന്ന മികച്ച സവിശേഷതകൾ നൽകുന്നുണ്ട്. ഫുൾ-എച്ച്ഡി+ റെസല്യൂഷനുള്ള വലിയ ഡിസ്‌പ്ലേ, ശക്തമായ ബാറ്ററി, ട്രിപ്പിൾ ക്യാമറ സെറ്റപ്പ് എന്നീ സവിശേഷതകളെല്ലാം 15,000 രൂപ വില വിഭാഗത്തിൽ നൽകുന്ന ഡിവൈസാണ് ഇത്. ഈ ഡിവൈസിന്റെ ഏറ്റവും വലിയ സവിശേഷത ഇത് സ്റ്റോക്ക് ആൻഡ്രോയിഡ് ഒഎസിലാണ് പ്രവർത്തിക്കുന്നത് എന്നതാണ്. കസ്റ്റം സ്കിൻ ഇല്ലാതെയുള്ള സ്റ്റോക്ക് ആൻഡ്രോയിഡ് മികച്ച അനുഭവം തന്നെയാണ് നൽകുന്നത്.

മൈക്രോമാക്സ് ഇൻ 1: വില

മൈക്രോമാക്സ് ഇൻ 1 സ്മാർട്ട്ഫോൺ രണ്ട് മെമ്മറി കോൺഫിഗറേഷനുകളിൽ ലഭ്യമാണ്. 4 ജിബി റാമും 64 ജിബിയും സ്റ്റോറേജുമുള്ള മോഡലിന് 10,499 രൂപയാണ് വില. ഡിവൈസിന്റെ 6 ജിബി റാമും 128 ജിബി സ്റ്റോറേജുമുള്ള മോഡലിന് 11,999 രൂപ വിലയുണ്ട്. ഈ സ്മാർട്ട്ഫോണിന്റെ ആദ്യ വിൽപ്പന മാർച്ച് 26ന് നടക്കും. ഫ്ലിപ്പ്കാർട്ട്, മൈക്രോമാക്സ് ഓൺലൈൻ സ്റ്റോർ എന്നിവയിലൂടെയാണ് ഡിവൈസിന്റെ വിൽപ്പന നടക്കുന്നത്. ആദ്യ വിൽപ്പനയിൽ ഈ ഡിവൈസ് 9,999 രൂപ, 11,499 രൂപ എന്നീ വിലകളിൽ ലഭിക്കും. 500 രൂപയുടെ കിഴിവാണ് ഡിവൈസിന് ലഭിക്കുന്നത്. പർപ്പിൾ, ബ്ലൂ നിറങ്ങളിൽ സ്മാർട്ട്ഫോൺ ലഭ്യമാകും.

മൈക്രോമാക്സ് ഇൻ 1: സവിശേഷതകൾ

മൈക്രോമാക്സ് ഇൻ 1 സ്മാർട്ട്ഫോണിൽ 1080p ഡിസ്‌പ്ലേയാണ് ഉള്ളത്. ഈ വില വിഭാഗത്തിൽ ചുരുക്കം ചില സ്മാർട്ട്ഫോണുകളിൽ മാത്രമേ ഇത്തരമൊരു മികച്ച ഡിസ്പ്ലെ ഉള്ളു. 6.67 ഇഞ്ച് വലുപ്പമുള്ളതും പഞ്ച്-ഹോൾ ഡിസൈനോട് കൂടിയതുമായ ഈ ഡിസ്പ്ലെയ്ക്ക് 440 നൈറ്റ്സ് ബ്രൈറ്റ്നസ് ഉണ്ട്. വൈഡ്വിൻ എൽ 1 സർട്ടിഫിക്കേഷനും ഡിസ്പ്ലെയ്ക്ക് ഉണ്ട്. ഇതിലൂടെ നെറ്റ്ഫ്ലിക്സ്, യൂട്യൂബ്, ആമസോൺ പ്രൈം വീഡിയോകൾ മികച്ച എച്ച്ഡി ക്വാളിറ്റിയിൽ പ്ലേ ചെയ്യാൻ സാധിക്കും.

മൈക്രോമാക്സ് ഇൻ 1 സ്മാർട്ട്ഫോണിന്റെ പിന്നിൽ ഫിംഗർപ്രിന്റ് സെൻസർ നൽകിയിട്ടുണ്ട്. ഇത് മികച്ചൊരു സുരക്ഷാ സംവിധാനമാണ്. 6 ജിബി റാമും 128 ജിബി സ്റ്റോറേജുമായി ജോടിയാക്കിയ ഒക്ടാകോർ മീഡിയടെക് ഹെലിയോ ജി 80 പ്രോസസറാണ് മൈക്രോമാക്സ് ഇൻ 1 സ്മാർട്ട്ഫോണിന് കരുത്ത് നൽകുന്നത്. ഈ സ്മാർട്ട്‌ഫോൺ ആൻഡ്രോയിഡ് 10ലാണ് പ്രവർത്തിക്കുന്നത്. മെയ് മാസത്തോടെ മൈക്രോമാക്‌സ് ഈ ഡിവൈസിനുള്ള ആൻഡ്രോയിഡ് 11 ലഭ്യമാക്കും. 18W ഫാസ്റ്റ് ചാർജിങ് സപ്പോർട്ടുള്ള5000 എംഎഎച്ച് ബാറ്ററിയാണ് ഡിവൈസിൽ ഉള്ളത്.

മൈക്രോമാക്‌സ് ഇൻ 1 സ്മാർട്ട്ഫോണിന് പിന്നിൽ മൂന്ന് ക്യാമറകളാണ് ഉള്ളത്. എച്ച്ഡിആർ, നൈറ്റ് മോഡ് പോലുള്ള സവിശേഷതകൾ സപ്പോർട്ട് ചെയ്യുന്ന 48 എംപി സാംസങ് സെൻസറാണ് പ്രൈമറി ക്യാമറ. ഈ ക്യാമറയ്‌ക്കൊപ്പം 2 എംപി ഡെപ്ത് സെൻസറും 2 എംപി മാക്രോ സെൻസറും നൽകിയിട്ടുണ്ട്. സെൽഫികൾക്കായി പഞ്ച്-ഹോളിനുള്ളിൽ 8 എംപി ക്യാമറയാണ് നൽകിയിട്ടുള്ളത്. ഫോണിൽ വൈഫൈ, ബ്ലൂടൂത്ത്, ജിപിഎസ്, 4 ജി വോൾട്ട്, 3.5 എംഎം ഹെഡ്‌ഫോൺ ജാക്ക് എന്നിവയാണ് കണക്ടിവിറ്റി ഓപ്ഷനുകളായി ഉള്ളത്. ചാർജിങ്ങിനായി യുഎസ്ബി-സി പോർട്ടും ഉണ്ട്.