ഇന്ത്യൻ നിർമ്മിത സ്മാർട്ട്ഫോണായ മൈക്രോമാക്സ് ഇൻ 1 പുറത്തിറങ്ങുക ട്രിപ്പിൾ ക്യാമറ സെറ്റപ്പുമായി

മൈക്രോമാക്സ് ഇൻ1 സ്മാർട്ട്ഫോൺ പുറത്തിറങ്ങുക ട്രിപ്പിൾ റിയർ ക്യാമറകളും എൽഇഡി ഫ്ലാഷുമായിട്ടായിരിക്കുമെന്ന് ഫ്ലിപ്പ്കാർട്ട് ടീസറിൽ നിന്നും വ്യക്തമാകുന്നു. ചതുരാകൃതിയിലുള്ള ക്യാമറ മൊഡ്യൂളായിരിക്കും ഈ ഡിവൈസിൽ ഉണ്ടാവുക. ഈ സ്മാർട്ട്ഫോണിൽ സുരക്ഷയ്ക്കായി ഫിസിക്കൽ ഫിംഗർപ്രിന്റ് സെൻസറും മൈക്രോമാക്സ് നൽകും. പർപ്പിൾ, ബ്ലൂ കളർ ഓപ്ഷനുകളിലായിരിക്കും ഡിവൈസ് ലഭ്യമാകുന്നത്. എക്സ്ഡിഎ-ഡവലപ്പ്ഴിസ് പുറത്ത് വിട്ട റിപ്പോർട്ടിൽ മൈക്രോമാക്സ് ഇൻ 1 സ്മാർട്ട്ഫോണിന്റെ സവിശേഷതകൾ വെളിപ്പെടുത്തിയിട്ടുണ്ട്.

മൈക്രോമാക്സ് ഇൻ1: പ്രതീക്ഷിക്കുന്ന സവിശേഷതകൾ

റിപ്പോർട്ടുകൾ ശരിയാണെങ്കിൽ മൈക്രോമാക്സ് ഇൻ1 സ്മാർട്ട്ഫോണിൽ 6.67 ഇഞ്ച് എഫ്എച്ച്ഡി + എൽസിഡി ഡിസ്പ്ലേയായിരിക്കും ഉണ്ടാവുക. ഈ ഡിസ്പ്ലെയ്ക്ക് പഞ്ച്-ഹോൾ കട്ടൌട്ടും ഉണ്ടായിരിക്കും. 5ജി കണക്റ്റിവിറ്റി സപ്പോർട്ട് ഇല്ലാത്ത മീഡിയടെക് ഹീലിയോ ജി80 എസ്ഒസിയുടെ കരുത്തിലായിരിക്കും ഈ ഡിവൈസ് പ്രവർത്തിക്കുന്നത്. കഴിഞ്ഞ മാസം മൈക്രോമാക്സ് സഹസ്ഥാപകൻ ഒരു 5ജി ഡിവൈസ് പുറത്തിറക്കുമെന്ന് വെളിപ്പെടുത്തിയിരുന്നു. അത് ഈ ഡിവൈസ് ആയിരിക്കുമോ എന്ന് വ്യക്തമല്ല.

6 ജിബി റാമും 128 ജിബി സ്റ്റോറേജ് ഓപ്ഷനുമായിട്ടായിരിക്കും മൈക്രോമാക്സ് ഇൻ1 പുറത്തിറങ്ങുക. സ്റ്റോറേജ് എക്സ്പാൻഡ് ചെയ്യാനായി മൈക്രോ എസ്ഡി കാർഡ് സ്ലോട്ടും ഈ ഡിവൈസിൽ ഉണ്ടായിരിക്കും. 18W ഫാസ്റ്റ് ചാർജിങ് സപ്പോർട്ടുള്ള 5,000 mAh ബാറ്ററിയും മൈക്രോമാക്സ് ഇൻ1ൽ പായ്ക്ക് ചെയ്യുമെന്നാണ് പ്രതീക്ഷിക്കുന്നത്. ഫോട്ടോഗ്രഫിക്കായി ട്രിപ്പിൾ ലെൻസ് സെറ്റപ്പാണ് ഈ ഡിവൈസിൽ ഉള്ളത്. 48 എംപി പ്രൈമറി സെൻസറും 2 എംപി സെൻസറുകളും ഉൾപ്പെടുന്ന ക്യാമറ സെറ്റപ്പായിരിക്കും ഇതെന്നാണ് സൂചനകൾ. സെൽഫികൾക്കും വീഡിയോ കോളുകൾക്കുമായി 8 എംപി ക്യാമറയും ഈ ഡിവൈസിൽ ഉണ്ട്.

ഫ്ലിപ്പ്കാർട്ട് ടീസർ ഇമേജ് അനുസരിച്ച് മൈക്രോമാക്സ് ഇൻ1 സ്മാർട്ട്ഫോൺ അതിന്റെ മുൻഗാമിയായ ഇൻ നോട്ട് 1 ന്റെ അതേ എക്സ് ആകൃതിയിലുള്ള പാറ്റേണുമായിട്ടായിരിക്കും പുറത്തിറങ്ങുക. അതുകൊണ്ട് തന്നെ പുതിയ ഡിവൈസ് ഇൻ നോട്ട് 1 സ്മാർട്ട്ഫോണിന്റെ ഡൌൺഗ്രേഡ് പതിപ്പായിരിക്കുമെന്ന സൂചന നൽകുന്നുണ്ട്. മൈക്രോമാക്സ് ഇൻ നോട്ട് 1 രാജ്യത്ത് 11,499 രൂപ മുതലുള്ള വിലയ്ക്കാണ് ഇന്ത്യയിൽ വിൽപ്പനയ്ക്ക് എത്തിയത്. 48 എംപി ക്വാഡ് റിയർ ക്യാമറ സെറ്റപ്പ്, 6.67 ഇഞ്ച് ഐപിഎസ് എൽസിഡി പാനൽ, 5,000 എംഎഎച്ച് ബാറ്ററി എന്നിവയാണ് മൈക്രോമാക്സ് ഇൻ നോട്ട് 1ന്റെ സവിശേഷതകൾ.