മൈക്രോമാക്‌സ് ഇൻ 2സി സ്മാർട്ട്ഫോൺ വിപണിയിലെത്തി; വിലയും സവിശേഷതകളും

മൈക്രോമാക്‌സ് ഇൻ 2സി: വില, ലഭ്യത

മൈക്രോമാക്‌സ് ഇൻ 2സി സ്മാർട്ട്ഫോണിന്റെ 3 ജിബി റാമും 32 ജിബി സ്റ്റോറേജുമുള്ള വേരിയന്റിന് ഇന്ത്യയിൽ 8,499 രൂപയാണ് വില. എന്നാൽ ഈ ഡിവൈസ് ഇന്റോഡോക്ടറി ഓഫർ എന്ന നിലവിൽ ആദ്യ വിൽപ്പനയിലൂടെ 7,499 രൂപയ്ക്ക് വാങ്ങാം. ഈ 1000 രൂപ കിഴിവ് എത്ര കാലത്തേക്ക് ലഭിക്കും എന്ന കാര്യം വ്യക്തമല്ല. മെയ് 1 മുതൽ ഫ്ലിപ്പ്കാർട്ടിലൂടെയും മൈക്രോമാക്‌സിന്റെ ഔദ്യോഗിക സൈറ്റിലൂടെയും മൈക്രോമാക്‌സ് ഇൻ 2സി വിൽപ്പനയ്ക്ക് എത്തും. ബ്രൗൺ, സിൽവർ നിറങ്ങളിലാണ് ഈ ഡിവൈസ് ലഭ്യമാകുന്നത്.

കഴിഞ്ഞ വർഷം ജൂലൈയിൽ മൈക്രോമാക്‌സ് ഇൻ 2ബി ഇന്ത്യയിൽ അവതരിപ്പിച്ചത് 4 ജിബി റാമും 64 ജിബി സ്റ്റോറേജുമുള്ള മോഡലിന് 7,999 രൂപ വിലയുമായിട്ടാണ്. ഈ ഡിവൈസിന്റെ 6 ജിബി റാമും 64 ജിബി സ്റ്റോറേജുമുള്ള വേരിയന്റിന് 8,999 രൂപയാണ് വില. കറുപ്പ്, നീല, പച്ച നിറങ്ങളിലാണ് ഈ ഡിവൈസ് അവതരിപ്പിച്ചത്. ഇത് വച്ച് നോക്കുമ്പോൾ പുതിയ മോഡലിന് വില അല്പം കൂടുതലാണ് എന്ന് കാണാം. മൈക്രോമാക്‌സ് ഇൻ 2സിയുടെ സവിശേഷതകൾ കൂടി നോക്കാം.

മൈക്രോമാക്‌സ് ഇൻ 2സി: സവിശേഷതകൾ

മൈക്രോമാക്‌സ് ഇൻ 2സി സ്മാർട്ട്ഫോണിൽ 20:9 അസ്പാക്ട് റേഷിയോവും 263 പിപിഐ പിക്‌സൽ ഡെൻസിറ്റിയുമുള്ള 6.52-ഇഞ്ച് എച്ച്ഡി+ (720x1,600 പിക്‌സൽ) ഡിസ്‌പ്ലേയാണ് കമ്പനി നൽകിയിട്ടുള്ളത്. ഈ ഡിവൈസിന് കരുത്ത് നൽകുന്നത് ഒക്ടാ-കോർ യൂണിസോക്ക് ടി610 എസ്ഒസിയാണ്. ഇത് കഴിഞ്ഞ വർഷം പുറത്തിറങ്ങിയ മൈക്രോമാക്‌സ് ഇൻ 2ബി മോഡലിന് സമാനമാണ്. മൈക്രോമാക്‌സ് ഇൻ 2സി സ്മാർട്ട്ഫോണിൽ 3 ജിബി വരെ റാമും 32 ജിബി സ്റ്റോറേജുമാണ് ഉള്ളത്. ഈ സ്റ്റോറേജ് തികയാത്ത ആളുകൾക്കായി പ്രത്യേകം മൈക്രോഎസ്ഡി കാർഡ് സ്ലോട്ടും നൽകിയിട്ടുണ്ട്.

രണ്ട് പിൻ ക്യാമറകളുമായിട്ടാണ് മൈക്രോമാക്‌സ് ഇൻ 2സി വരുന്നത്. 8 മെഗാപിക്സൽ പ്രൈമറി സെൻസറിനൊപ്പം പ്രത്യേക ഡെപ്ത് സെൻസറുമാണ് ഈ പിൻ ക്യാമറ സെറ്റപ്പിൽ ഉള്ളത്. മൈക്രോമാക്‌സ് ഇൻ 2ബി സ്മാർട്ട്ഫോണിൽ 13 മെഗാപിക്സൽ പ്രൈമറി സെൻസർ ഉണ്ടായിരുന്നു എന്നതാണ് ശ്രദ്ധേയമായ കാര്യം. സെൽഫികൾക്കും വീഡിയോ കോളുകൾക്കുമായി മൈക്രോമാക്‌സ് ഇൻ 2സി സ്മാർട്ട്ഫോണിൽ 5 മെഗാപിക്സൽ സെൽഫി ക്യാമറ സെൻസറാണ് കമ്പനി നൽകിയിട്ടുള്ളത്. ഫേസ് ബ്യൂട്ടി, നൈറ്റ് മോഡ്, പോർട്രെയിറ്റ് മോഡ് എന്നിവയുൾപ്പെടെയുള്ള ഫീച്ചറുകളും ഈ ക്യാമറ സപ്പോർട്ട് ചെയ്യുന്നു.

ഡ്യുവൽ-സിം (നാനോ) സപ്പോർട്ടുള്ള മൈക്രോമാക്‌സ് ഇൻ 2സി സ്മാർട്ട്ഫോൺ ആൻഡ്രോയിഡ് 11 ഒഎസിലാണ് പ്രവർത്തിക്കുന്നത്. 4ജി എൽടിഇ, വൈഫൈ 802.11ac, ബ്ലൂട്ടൂത്ത് v5.0, ജിപിഎസ്/ എ-ജിപിഎസ്, യുഎസ്ബി ടൈപ്പ് സി പോർട്ട്, 3.5mm ഹെഡ്‌ഫോൺ ജാക്ക് എന്നിവയാണ് മൈക്രോമാക്‌സ് ഇൻ 2സിയിലെ കണക്റ്റിവിറ്റി ഓപ്ഷനുകൾ. 10W സ്റ്റാൻഡേർഡ് ചാർജിങ് സപ്പോർട്ടുള്ള 5,000mAh ബാറ്ററിയും ഈ ഡിവൈസിൽ ഉണ്ട്. 198 ഗ്രാം ഭാരമാണ് ഡിവൈസിനുള്ളത്.