മൈക്രോമാക്സ് ഇൻ നോട്ട് 1, 1ബി സ്മാർട്ട്‌ഫോണുകൾ വിപണിയിലെത്തി; വില 6,999 രൂപ മുതൽ

ഇന്ത്യൻ നിർമ്മിത സ്മാർട്ട്ഫോണുകൾ

ചൈനീസ് കമ്പനികളായ റെഡ്മി, റിയൽ‌മി എന്നിവയുടെ ഫോണുകൾ ആധിപത്യം ഉറപ്പിച്ചിരിക്കുന്ന മിഡ് റേഞ്ച് ഫീച്ചറുകൾ നൽകുന്ന ഡിവൈസുകളുടെ വിഭാഗത്തിലേക്കാണ് ഇൻ നോട്ട് 1 പുറത്തിറക്കിയിരിക്കുന്നത്. എൻട്രി ലെവൽ ഉപയോക്താക്കൾക്ക് കൂടുതൽ അനുയോജ്യമായ ഡിവൈസാണ് ഇൻ 1ബി. മീഡിയാടെക്കുമായി ചേർന്ന് പ്രവർത്തിക്കുന്നത് കൊണ്ട് ഈ രണ്ട് ഡിവൈസുകളിലും മികച്ച മീഡിയടെക്ക് പ്രോസസ്സറുകളാണ് മൈക്രോമാക്സ് നൽകിയിട്ടുള്ളത്.

മൈക്രോമാക്സ് ഇൻ നോട്ട് 1: വില

മൈക്രോമാക്സ് ഇൻ നോട്ട് 1 സ്മാർട്ട്ഫോൺ രണ്ട് വേരിയന്റുകളിൽ ലഭ്യമാകും ഡിവൈസി്നറെ 4 ജിബി റാമും 64 ജിബി സ്റ്റോറേജുമുള്ള വേരിയന്റിന് 10,999 രൂപയാണ് വില. 4 ജിബി റാമും 128 ജിബി സ്റ്റോറേജുമുള്ള വേരിയന്റിന് 12,999 രൂപ വിലയുണ്ട്. വൈറ്റ്, ഗ്രീൻ കളർ ഓപ്ഷനുകളിൽ ഈ ഡിവൈസ് ലഭ്യമാകും. വേരിയന്റിനും പിന്നിൽ വ്യത്യസ്ത പാറ്റേണാണ് കമ്പനി നൽകിയിട്ടുള്ളത്. ഗ്രീൻ കളർ വേരിയന്റിന് പിന്നിൽ എക്സ് ഡിസൈൻ ഉണ്ട്. വൈറ്റ് വേരിയന്റിൽ മാറ്റ് ഫിനിഷാണ് ഉള്ളത്.

മൈക്രോമാക്സ് ഇൻ 1ബി: വില

മൈക്രോമാക്സ് ഇൻ സ്മാർട്ട്ഫോണുകളിലെ ആദ്യത്തെ എൻട്രിലെവൽ വേരിയന്റായ ഇൻ 1ബി എന്ന ഡിവൈസും രണ്ട് സ്റ്റോറേജ് വേരിയന്റുകളിൽ ലഭ്യമാണ്. ഡിവൈസിന്റെ 2 ജിബി റാമും 32 ജിബി സ്റ്റോറേജ് ഓപ്ഷനുമുള്ള വേരിയന്റിന് 6,999 രൂപയാണ് വില. ഡിവൈസിന്റെ 4 ജിബി റാമും 64 ജിബി സ്റ്റോറേജുമുള്ള വേരിയന്റിന് 7,999 രൂപ വിലയുണ്ട്. ഈ സ്മാർട്ട്ഫോൺ മൂന്ന് കളർ ഓപ്ഷനുകളിൽ ലഭ്യമാകും. മൈക്രോമാക്സ് ഇൻ നോട്ട് 1, ഇൻ 1ബി എന്നിവ ഫ്ലിപ്കാർട്ടിലൂടെയും മൈക്രോമാക്സിന്റെ ഓൺലൈൻ സ്റ്റോറിലൂടെയും വിൽപ്പനയ്ക്ക് എത്തും.

മൈക്രോമാക്സ് ഇൻ നോട്ട് 1: സവിശേഷതകൾ

ഡ്യുവൽ സിം (നാനോ) സ്ലോട്ടുകളുള്ള മൈക്രോമാക്സ് ഇൻ നോട്ട് 1 സ്മാർട്ട്ഫോൺ ആൻഡ്രോയിഡ് 10ലാണ് പ്രവർത്തിക്കുന്നത്. 6.67 ഇഞ്ച് ഫുൾ എച്ച്ഡി + ഡിസ്പ്ലേയും ഹോൾ-പഞ്ച് ഡിസൈനും ഡിവൈസിൽ ഉണ്ട്. ഒക്ടാകോർ മീഡിയടെക് ഹെലിയോ ജി 85 എസ്ഒസിയാണ് ഡിവൈസിന് കരുത്ത് നൽകുന്നത്. ഇതിനൊപ്പം 4 ജിബി റാമും ഉണ്ട്. 48 മെഗാപിക്സൽ പ്രൈമറി സെൻസറും വൈഡ് ആംഗിൾ ലെൻസുള്ള 5 മെഗാപിക്സൽ സെക്കൻഡറി സെൻസറും മാക്രോ ഷോട്ടുകൾക്കും ഡെപ്ത് സെൻസിംഗിനുമായി രണ്ട് 2 മെഗാപിക്സൽ സെൻസറുകളുമടങ്ങുന്ന ക്വാഡ് റിയർ ക്യാമറ സെറ്റപ്പാണ് ഡിവൈസിൽ ഉള്ളത്.

പിന്നിലെ ക്യാമറ സെറ്റപ്പിൽ ഒരു എൽഇഡി ഫ്ലാഷും മൈക്രോമാക്സ് നൽകിയിട്ടുണ്ട്. നൈറ്റ് വിഷൻ സപ്പോർട്ട് ഉൾപ്പെടെയുള്ള ആർട്ടിഫിഷ്യൽ ഇന്റലിജൻസ് (എഐ) സപ്പോർട്ട് ഫീച്ചറുകളും ഈ ക്യാമറ സെറ്റപ്പിൽ ഉണ്ട്. സെൽഫികൾക്കും വീഡിയോ കോളുകൾക്കുമായി മൈക്രോമാക്സ് ഇൻ നോട്ട് 1 സ്മാർട്ട്ഫോണിൽ 16 മെഗാപിക്സൽ ക്യാമറ സെൻസറാണ് ഉള്ളത്. ഇതിൽ 78 ഡിഗ്രി വൈഡ് ആംഗിൾ ലെൻസും ഉണ്ട്. സാധാരണ ഫോട്ടോകൾക്കും വീഡിയോകൾക്കുമൊപ്പം സെൽഫി ക്യാമറ സെൻസറിന് GIF ഷൂട്ട് ചെയ്യാൻ കഴിയും.

128 ജിബി വരെ സ്റ്റോറേജുള്ള മൈക്രോമാക്സ് ഇൻ നോട്ട് 1 സ്മാർട്ട്ഫോണിൽ സ്റ്റോറേജ് എക്സ്പാൻഡ് ചെയ്യാനായി മൈക്രോ എസ്ഡി കാർഡ് സ്ലോട്ടും നൽകിയിട്ടുണ്ട്. 4ജി വോൾട്ടി, വൈ-ഫൈ, ബ്ലൂടൂത്ത്, ജിപിഎസ് / എ-ജിപിഎസ്, യുഎസ്ബി ടൈപ്പ്-സി, 3.5 എംഎം ഹെഡ്‌ഫോൺ ജാക്ക് എന്നിവയാണ് ഫോണിലെ കണക്റ്റിവിറ്റി ഓപ്ഷനുകൾ. ഡിവൈസിന്റെ പിൻവശത്ത് ഫിംഗർപ്രിന്റ് സെൻസറും നൽകിയിട്ടുണ്ട്. റിവേഴ്സ് ചാർജിങ് സപ്പോർട്ടും 18W ഫാസ്റ്റ് ചാർജിങ് സപ്പോർട്ടുമുള്ള 5,000 എംഎഎച്ച് ബാറ്ററിയും ഈ സ്മാർട്ട്ഫോണിൽ ഉണ്ട്.

മൈക്രോമാക്സ് ഇൻ 1ബി: സവിശേഷതകൾ

മൈക്രോമാക്‌സ് ഇൻ 1 ബി ആൻഡ്രോയിഡ് 10ലാണ് പ്രവർത്തിക്കുന്നത്. വാട്ടർ ഡ്രോപ്പ്-സ്റ്റൈൽ നോച്ച് ഉള്ള 6.52 ഇഞ്ച് എച്ച്ഡി + ഡിസ്‌പ്ലേ ഡിവൈസിൽ നൽകിയിട്ടുണ്ട്. 2 ജിബി, 4 ജിബി റാം ഓപ്ഷനുകളുള്ള ഡിവൈസിന് കരുത്ത് നൽകുന്നത് ഒക്ടാകോർ മീഡിയടെക് ഹെലിയോ ജി35 SoCയാണ്. എഫ് / 1.8 ലെൻസുള്ള 13 മെഗാപിക്സൽ പ്രൈമറി ക്യാമറ സെൻസറും 2 മെഗാപിക്സൽ ഡെപ്ത് സെൻസറുമുള്ള ഡ്യൂവൽ റിയർ ക്യാമറ സെറ്റപ്പാണ് ഡിവൈസിൽ ഉള്ളത്. ഈ ക്യാമറ സെറ്റപ്പിൽ എൽഇഡി ഫ്ലാഷും നൽകിയിട്ടുണ്ട്. ഡിവൈസിന്റെ മുൻവശത്ത് 8 മെഗാപിക്സൽ സെൽഫി ക്യാമറയും ഉണ്ട്.

64 ജിബി വരെ ഓൺബോർഡ് സ്റ്റോറേജുമായിട്ടാണ് ഇൻ 1ബി സ്മാർട്ട്ഫോൺ വരുന്നത്. ഈ സ്റ്റോറേജ് എക്സ്പാൻഡ് ചെയ്യാൻ മൈക്രോ എസ്ഡി കാർഡ് സ്ലോട്ടും ഡിവൈസിൽ ഉണ്ട്. കണക്റ്റിവിറ്റി ഓപ്ഷനുകളായി 4ജി വോൾട്ടി, വൈ-ഫൈ, ബ്ലൂടൂത്ത്, ജിപിഎസ് / എ-ജിപിഎസ്, യുഎസ്ബി ടൈപ്പ്-സി, 3.5 എംഎം ഹെഡ്‌ഫോൺ ജാക്ക് എന്നിവയും ഡിവൈസിൽ കമ്പനി നൽകിയിട്ടുണ്ട്. ഡിവൈസിന് പിന്നിൽ ഫിംഗർപ്രിന്റ് സെൻസറും ഉണ്ട്. റിവേഴ്സ് ചാർജിങ് സപ്പോർട്ടുള്ള ഡിവൈസിൽ 10W ഫാസ്റ്റ് ചാർജിങ് സപ്പോർട്ടും ഉണ്ട്. 5,000 എംഎഎച്ച് ബാറ്ററിയാണ് ഫോണിലുള്ളത്.