മോട്ടറോളയുടെ ഏറ്റവും വില കുറഞ്ഞ 5ജി സ്മാർട്ട്ഫോണായ മോട്ടോ ജി51 5ജി ഇന്ത്യയിലെത്തി

മോട്ടോ ജി51 5ജി സ്മാർട്ട്ഫോണിന്റെ ഇന്ത്യയിലെ വില ആരംഭിക്കുന്നത് 14,999 രൂപ മുതലാണ്. 4 ജിബി റാമും 64 ജിബി സ്റ്റോറേജുമുള്ള മോഡലിനാണ് ഈ വില. നിലവിൽ ഈ വേരിയന്റ് മാത്രമാണ് രാജ്യത്ത് അവതരിപ്പിച്ചിട്ടുള്ളത്. അക്വാ ബ്ലൂ, ഇൻഡിഗോ ബ്ലൂ നിറങ്ങളിൽ ഈ സ്മാർട്ട്ഫോൺ ലഭ്യമാകും. മോട്ടോ ജി51 5ജിയുടെ വിൽപ്പന ഡിസംബർ 16ന് ഉച്ചയ്ക്ക് 12 മണി മുതൽ ഫ്ലിപ്പ്കാർട്ട് വഴി നടക്കും. കഴിഞ്ഞ മാസം യൂറോപ്പിൽ അവതരിപ്പിച്ച ഈ ഡിവൈസിന് 229.99 യൂറോ മുതൽ ആയിരുന്നു വില. ഇത് ഇന്ത്യൻ കറൻസിയിൽ ഏകദേശം 19,700 രൂപയോളം വരും. ഇത് വച്ച് നോക്കുമ്പോൾ ഇന്ത്യയിലെ വില വളരെ കുറവ് തന്നെയാണ്.

മോട്ടോ ജി51 5ജി: സവിശേഷതകൾ

മോട്ടോ ജി51 5ജി സ്മാർട്ട്ഫോണിൽ 6.8 ഇഞ്ച് ഫുൾ-എച്ച്‌ഡി+ (1,080 x 2,400 പിക്സൽസ്) മാക്സ് വിഷൻ ഡിസ്‌പ്ലേയാണ് കമ്പനി നൽകിയിട്ടുള്ളത്. 20:9 അസ്പാക്ട് റേഷിയോവും 120Hz റിഫ്രഷ് റേറ്റുമുള്ള മികച്ച ഡിസ്പ്ലെയാണ് ഇത്. മോട്ടറോളയുടെ ഈ പുതിയ സ്മാർട്ട്ഫോണിന് കരുത്ത് നൽകുന്നത് ഒക്ടാ കോർ ക്വാൽകോം സ്‌നാപ്ഡ്രാഗൺ 480 പ്ലസ് എസ്ഒസിയാണ്. 4 ജിബി റാമും 64 ജിബി സ്റ്റോറേജും ഈ ഡിവൈസിൽ നൽകിയിട്ടുണ്ട്. ആൻഡ്രോയിഡ് 11 ബേസ്ഡ് മൈ യുഎക്സിൽ ആണ് ഈ ഡിവൈസ് പ്രവർത്തിക്കുന്നത്.

മൂന്ന് പിൻക്യാമറകളാണ് മോട്ടോ ജി51 5ജി സ്മാർട്ട്ഫോണിൽ മോട്ടറോള നൽകിയിട്ടുള്ളത്. 8 മെഗാപിക്സൽ അൾട്രാ വൈഡും ഡെപ്ത് ഷൂട്ടറും 2 മെഗാപിക്സൽ മാക്രോ ഷൂട്ടറുമുള്ള ഈ ട്രിപ്പിൾ ക്യാമറ സെറ്റപ്പിലെ പ്രൈമറി ക്യാമറ എഫ്/1.8 ലെൻസുള്ള 50 മെഗാപിക്സൽ സെൻസറാണ്. സെൽഫികൾക്കും വീഡിയോ കോളുകൾക്കുമായി ഈ സ്മാർട്ട്ഫോണിന്റെ മുൻവശത്ത് 13-മെഗാപിക്സൽ സെൽഫി ക്യാമറ സെൻസറാണ് നൽകിയിട്ടുള്ളത്. ഈ ക്യാമറ സെൻസറിനൊപ്പം എഫ്/2.2 ലെൻസും ഈ ഡിവൈസിൽ ഉണ്ട്.

മോട്ടോ ജി51 5ജി സ്മാർട്ട്ഫോൺ ഡ്യൂവൽ നാനോ സിം സപ്പോർട്ടുമായിട്ടാണ് വരുന്നത്. ഡിവൈസിൽ കണക്റ്റിവിറ്റിയായി 5ജി, 4ജി എൽടിഇ, വൈ-ഫൈ 802.11ac, ബ്ലൂടൂത്ത് v5.1, ജിപിഎസ്/ എ-ജിപിഎസ്, എൻഎഫ്സി, എഫ്എം റേഡിയോ, യുഎസ്ബി ടൈപ്പ്-സി പോർട്ട്, 3.5mm ഹെഡ്‌ഫോൺ ജാക്ക് എന്നിവ നൽകിയിട്ടുണ്ട്. ആക്സിലറോമീറ്റർ, ആംബിയന്റ് ലൈറ്റ്, ഗൈറോസ്കോപ്പ്, മാഗ്നെറ്റോമീറ്റർ, പ്രോക്സിമിറ്റി സെൻസർ എന്നിവയാണ് ഓൺബോർഡ് സെൻസറുകൾ.

5,000mAh ബാറ്ററിയാണ് മോട്ടോറോള മോട്ടോ ജി51 5ജി സ്മാർട്ട്ഫോണിൽ നൽകിയിട്ടുള്ളത്. ഈ ബാറ്ററി വേഗത്തിൽ ചാർജ് ചെയ്യാനായി 20W റാപ്പിഡ് ചാർജിങ് സപ്പോർട്ടും മോട്ടോറോള ഡിവൈസിൽ നൽകിയിട്ടുണ്ട്. 208 ഗ്രാം ഭാരമാണ് ഈ ഡിവൈസിനുള്ളത്. ഇത്രയും കുറഞ്ഞല വിലയ്ക്ക് 12 ബാൻഡ് 5ജിയും 120 ഹെർട്സ് റിഫ്രഷ് റേറ്റുള്ള ഡിസ്പ്ലെയുമെല്ലാം ലഭിക്കുന്നുവെന്നത് ഏറെ ആകർഷകമാണ്. 50 എംപി പ്രൈമറി ക്യാമറയുള്ള ക്യാമറ സെറ്റപ്പും മികച്ചത് തന്നെ. സ്റ്റോക്ക് ആൻഡ്രോയിഡ് പ്രതീക്ഷിച്ചവരെ നിരാശരാക്കുന്നു എന്നല്ലാതെ ഈ ഡിവൈസ് വിപണിയിൽ വൻ വിജയം നേടാൻ വേണ്ടതെല്ലാം മോട്ടറോള ഇതിൽ നൽകിയിട്ടുണ്ട്.