മോട്ടോ ജി9 പവർ സ്മാർട്ട്ഫോൺ ഡിസംബർ എട്ടിന് ഇന്ത്യൻ വിപണിയിൽ എത്തും

മോട്ടോ ജി9 പവർ: പ്രതീക്ഷിക്കുന്ന വില

മോട്ടോ ജി9 പവർ സ്മാർട്ട്ഫോൺ ഡിസംബർ 8ന് ഉച്ചയ്ക്ക് 12 മണിക്ക് ഇന്ത്യയിൽ വിപണിയിലെത്തും. ഫ്ലിപ്പ്കാർട്ട് വഴി ഈ ഡിവൈസ് വിൽപ്പനയ്ക്ക് എത്തിക്കും. ഇ-കൊമേഴ്‌സ് വെബ്‌സൈറ്റിൽ ഇതിനായി ഒരു പ്രത്യേക പേജും ആരംഭിച്ചിട്ടുണ്ട്. ഡിവൈസ് വിൽപ്പനയ്ക്ക് എത്തുന്ന തിയ്യതി പേജിൽ വ്യക്തമാക്കിയിട്ടില്ല. 4 ജിബി റാമും 128 ജിബി സ്റ്റോറേജുമുള്ള മോട്ടോ ജി9 പവർ സ്മാർട്ട്ഫോണിന് യൂറോപ്പിൽ 199 യൂറോയാണ് വില(ഏകദേശം 17,400 രൂപ) ഇലക്ട്രിക് വയലറ്റ്, മെറ്റാലിക് സേജ് കളർ ഓപ്ഷനുകളിലാണ് ഡിവൈസ് ലഭ്യമാവുക.

മോട്ടോ ജി9 പവർ: സവിശേഷതകൾ

മോട്ടോ ജി9 പവർ സ്മാർട്ട്ഫോണിൽ 6,000 എംഎഎച്ച് ബാറ്ററിയാണ് ഉള്ളത്. ഈ ബാറ്ററി വേഗത്തിൽ ചാർജ് ചെയ്യാനായി 20W ഫാസ്റ്റ് ചാർജിങ് സപ്പോർട്ടും ഈ ഡിവൈസിൽ മോട്ടറോള നൽകിയിട്ടുണ്ട്. 6.78 ഇഞ്ച് ഐപിഎസ് എച്ച്ഡി+ ഡിസ്‌പ്ലേയാണ് ഡിവൈസിൽ ഉള്ളത്. ഇത് വലിയൊരു ഡിസ്പ്ലെ തന്നെയാണ്. ഈ ഡിസ്പ്ലെയിൽ 1,640x720 പിക്‌സൽ സ്‌ക്രീൻ റെസല്യൂഷനാണ് ഉള്ളത്.

4 ജിബി റാമും 128 ജിബി ഇൻബിൽറ്റ് സ്റ്റോറേജുമുള്ള ഡിവൈസിന് കരുത്ത് നൽകുന്നത് സ്നാപ്ഡ്രാഗൺ 662 SoC ആണ്. മോട്ടോ ജി 9 പവറിൽ മോട്ടോ ജി 5ജി സ്മാർട്ട്ഫോണിൽ ഉള്ളതിന് സമാനമായ ട്രിപ്പിൾ റിയർ ക്യാമറ സെറ്റപ്പാണ് ഉള്ളത്. ഈ ക്യാമറ സെറ്റപ്പിൽ 64 എംപി പ്രൈമറി സെൻസർ നൽകിയിട്ടുണ്ട്. ഇതിനൊപ്പം രണ്ട് 2 എംപി മാക്രോ, ഡെപ്ത് സെൻസറുകളും ഉണ്ട്. മികച്ച ക്യാമറ സെറ്റപ്പ് തന്നെയാണ് ഇത്.

സെൽഫികൾക്കായി 16 എംപി ക്യാമറയും മോട്ടോ ജി9 പവർ സ്മാർട്ട്ഫോണിൽ ഉണ്ട്. സ്മാർട്ട്ഫോൺ 4ജി എൽടിഇ സപ്പോർട്ട്, ഡ്യുവൽ-ബാൻഡ് വൈ-ഫൈ ബ്ലൂടൂത്ത് 5.0, ജിപിഎസ്, എൻ‌എഫ്‌സി എന്നീ കണക്ടിവിറ്റി ഓപ്ഷനുകളോടെയാണ് വരുന്നത്. ഇന്ത്യൻ വിപണിയിൽ എത്തുമ്പോൾ ഈ ഡിവൈസിന്റെ സവിശേഷതകളിൽ എന്തെങ്കിലും മാറ്റങ്ങൾ ഉണ്ടാവുമോ എന്ന കാര്യം വ്യക്തമല്ല. അധികം മാറ്റങ്ങളൊന്നും ഉണ്ടാവില്ലെന്നാണ് റിപ്പോർട്ടടുകൾ.