കുറഞ്ഞ വിലയിൽ മികച്ച ഫീച്ചറുകളുമായി മോട്ടറോളയുടെ പുതിയ സ്മാർട്ട്ഫോൺ ഇന്ത്യയിൽ

മോട്ടോ ജി82 5ജി: വിലയും ഓഫറുകളും

രണ്ട് സ്റ്റോറേജ് ഓപ്ഷനുകളിലാണ് മോട്ടോ ജി82 5ജി ഇന്ത്യയിൽ അവതരിപ്പിച്ചിരിക്കുന്നത്. 6 ജിബി റാമും 128 ജിബി ഇന്റേണൽ സ്റ്റോറേജുമുള്ള ബേസ് വേരിയന്റിന് 21,499 രൂപയാണ് വില. 8 ജിബി റാമും 128 ജിബി സ്റ്റോറേജുമുള്ള വേരിയന്റിന് ഇന്ത്യയിൽ 22,999 രൂപയാണ് വില. എസ്ബിഐ ക്രെഡിറ്റ് കാർഡുള്ള ഉപഭോക്താക്കൾക്ക് മോട്ടോ ജി82 5ജി സ്മാർട്ട്ഫോൺ വാങ്ങുമ്പോൾ 1,500 രൂപ കിഴിവ് ലഭിക്കും. ഈ ഓഫറിലൂടെ 6 ജിബി റാം മോഡലിന്റെ വില 19,999 രൂപയായി കുറയുന്നു. ഇതോടൊപ്പം 5,049 രൂപയുടെ ജിയോ ആനുകൂല്യങ്ങളും ഉണ്ട്. ഫ്ലിപ്പ്കാർട്ട്, റിലയൻസ് ഡിജിറ്റൽ, പ്രമുഖ റീട്ടെയിൽ സ്റ്റോറുകൾ എന്നിവയിലൂടെ മോട്ടോ ജി82 5ജി വാങ്ങാം.

മോട്ടോ ജി82 5ജി: സവിശേഷതകൾ

മോട്ടോ ജി82 5ജി സ്മാർട്ട്ഫോണിൽ 6.6 ഇഞ്ച് ഫുൾ എച്ച്‌ഡി+ പിഒലെഡ് ഡിസ്‌പ്ലേയാണുള്ളത്. ഈ ഡിസ്പ്ലെയ്ക്ക് 120Hz റിഫ്രഷ് റേറ്റുണ്ട്. സ്‌ക്രീൻ 10-ബിറ്റ് കളർ സപ്പോർട്ടുമായിട്ടാണ് വരുന്നത്. അതായത് ഒരു ബില്യൺ കളറുകൾ വരെ ഈ ഡിസ്പ്ലെ സപ്പോർട്ട് ചെയ്യുന്നു. ഡിസ്പ്ലെയിൽ സെൽഫി ക്യാമറ സ്ഥാപിക്കാനായി മധ്യഭാഗത്ത് ഒരു ഹോൾ-പഞ്ച് കട്ട്ഔട്ട് ഉണ്ട്. 8 ജിബി വരെ റാമുമായി വരുന്ന മോട്ടോ ജി82 5ജി സ്മാർട്ട്ഫോണിന് കരുത്ത് നൽകുന്നത് ക്വാൽകോം സ്നാപ്ഡ്രാഗൺ 695 എസ്ഒസിയാണ്. 128 ജിബി വരെ സ്റ്റോറേജും ഡിവൈസിൽ മോട്ടറോള നൽകിയിട്ടുണ്ട്.

മൂന്ന് പിൻ ക്യാമറകളുമായിട്ടാണ് മോട്ടോ ജി82 5ജി സ്മാർട്ട്ഫോൺ വരുന്നത്. ഈ ട്രിപ്പിൾ ക്യാമറ സെറ്റപ്പിൽ 50 എംപി പ്രൈമറി ക്യാമറ സെൻസറാണ് നൽകിയിട്ടുള്ളത്. ഈ ക്യാമറയിൽ ഫോട്ടോകൾക്കും വീഡിയോകൾക്കുമായി ഒപ്റ്റിക്കൽ ഇമേജ് സ്റ്റെബിലൈസേഷൻ (ഒഐഎസ്) സപ്പോർട്ടും നൽകിയിട്ടുണ്ട്. പ്രൈമറി ക്യാമറയ്ക്കൊപ്പം 8 എംപി അൾട്രാവൈഡ് ക്യാമറയും 2 എംപി മാക്രോ ക്യാമറയും മോട്ടറോള നൽകിയിരിക്കുന്നു. സെൽഫികൾക്കും വീഡിയോ കോളുകൾക്കുമായി 16 എംപി ഫ്രണ്ട് ക്യാമറയാണ് ഉള്ളത്.

13 5ജി ബാൻഡുകളുടെ സപ്പോർട്ടോടെയാണ് മോട്ടോ ജി82 5ജിവരുന്നത്. ഈ സ്മാർട്ട്ഫോണിൽ 5000 mAh ബാറ്ററിയും കമ്പനി നൽകിയിട്ടുണ്ട്. ഈ വലിയ ബാറ്ററി വേഗത്തിൽ ചാർജ് ചെയ്യാനായി 30W ഫാസ്റ്റ് ചാർജിങ് സപ്പോർട്ടാണ് ഡിവൈസിൽ കൊടുത്തിരിക്കുന്നത്. ഈ ഡിവൈസിന് 173 ഗ്രാം ഭാരവും 7.99 എംഎം കനവുമുണ്ട്. സുരക്ഷയ്ക്കായി സൈഡ് മൗണ്ടഡ് ഫിംഗർപ്രിന്റ് സ്കാനറും എഐ ഫേസ് അൺലോക്കും മോട്ടോ ജി82 5ജി സ്മാർട്ട്ഫോണിലുണ്ട്.

ആൻഡ്രോയിഡ് 12ൽ ബേസ്ഡ് മൈയുഎക്സിലാണ് ഈ ഡിവൈസ് പ്രവർത്തിക്കുന്നത്. താഴത്തെ ഭാഗത്തായി യുഎസ്ബി ടൈപ്പ്-സി പോർട്ടും അടുത്ത് 3.5 എംഎം ഹെഡ്‌ഫോൺ ജാക്കും നൽകിയിട്ടുണ്ട്. ഫോൺ ബ്ലൂട്ടൂത്ത് 5.1, വൈഫൈ 802.11 a/b/g/n/ac എന്നിവ സപ്പോർട്ട് ചെയ്യുന്നു. വിലയും സവിശേഷതകളും കണക്കിലെടുക്കുമ്പോൾ മികച്ച ഡിവൈസ് തന്നെയാണ് മോട്ടോ ജി82 5ജി. ഇത് 25000 രൂപയിൽ താഴെ വിലയുള്ള സ്മാർട്ട്ഫോണുകളുടെ വിഭാഗത്തിൽ വലിയ തരംഗം സൃഷ്ടിക്കുമെന്ന് ഉറപ്പാണ്.