മോട്ടറോള മോട്ടോ ജി52 ഇന്ത്യയിൽ അവതരിപ്പിച്ചു, വില 14,499 രൂപ മുതൽ

മോട്ടോ ജി52: വില

മോട്ടറോള മോട്ടോ ജി52 സ്മാർട്ട്ഫോൺ രണ്ട് വേരിയന്റുകളിലാണ് ഇന്ത്യയിൽ അവതരിപ്പിച്ചിരിക്കുന്നത്. ഡിവൈസിന്റെ 4 ജിബി റാമും 64 ജിബി സ്റ്റോറേജുമുള്ള മോഡലിന് 14,499 രൂപയാണ് വില. 6 ജിബി റാമും 128 ജിബി സ്റ്റോറേജുമുള്ള വേരിയന്റിന് 16,499 രൂപ വിലയുണ്ട്. സ്മാർട്ട്ഫോണിന്റെ ആദ്യ വിൽപ്പന മെയ് 3ന് ഫ്ലിപ്പ്കാർട്ട് വഴി നടക്കും. ആകർഷകമായ ഓഫറുകളും ഈ ഡിവൈസിന്റെ ആദ്യ വിൽപ്പനയിൽ ഫോൺ വാങ്ങുന്നവർക്ക് ലഭിക്കും.

മോട്ടോ ജി52 വാങ്ങാനായി പ്രീ ബുക്ക് ചെയ്യുകയോ പേയ്മെന്റിനായി എച്ച്ഡിഎഫ്സി ബാങ്ക് ക്രെഡിറ്റ് കാർഡ് ഉപയോഗിക്കുകയോ ചെയ്താൽ നിങ്ങൾക്ക് 1,000 രൂപ ക്യാഷ്ബാക്ക് ആദ്യ വിൽപ്പനയിലൂടെ ലഭിക്കും. ഇഎംഐ ഓപ്ഷനും ഈ ഓഫർ ലഭിക്കും. പോർസലൈൻ വൈറ്റ്, ചാർക്കോൾ ഗ്രേ നിറങ്ങളിലാണ് മോട്ടോ ജി52 അവതരിപ്പിച്ചിരിക്കുന്നത്. യൂറോപ്യൻ വിപണിയിൽ മോട്ടോ ജി52 അവതരിപ്പിച്ചത് 249 യൂറോ മുതലുള്ള വിലയിലാണ്. ഇത് വച്ച് നോക്കുമ്പോൾ ഇന്ത്യയിലെ വില കുറവാണ്.

മോട്ടോ ജി52: സവിശേഷതകൾ

മോട്ടോ ജി52 സ്മാർട്ട്ഫോണിൽ 6.6 ഇഞ്ച് ഫുൾ-എച്ച്‌ഡി ഒഎൽഇഡി ഡിസ്‌പ്ലേയാണ് നൽകിയിട്ടുള്ളത്. 90 ഹെർട്‌സ് റിഫ്രഷ് റേറ്റുള്ള ഡിസ്പ്ലെയാണ് ഇത്. ഡിസ്പ്ലെയുടെ മുകൾ ഭാഗത്ത് നടുവിലായി ഒരു പഞ്ച്-ഹോൾ നൽകിയിട്ടുണ്ട്. 6 ജിബി വരെ റാമും 128 ജിബി ഇന്റേണൽ സ്റ്റോറേജുമായി വരുന്ന ഡിവൈസിന് കരുത്ത് നൽകുന്നത് ഒക്ടാ കോർ ക്വാൽകോം സ്‌നാപ്ഡ്രാഗൺ 680 എസ്ഒസിയാണ്. ആൻഡ്രോയിഡ് 12 ബേസ്ഡ് മൈയുഎക്സ് ഒഎസിലാണ് മോട്ടോ ജി52 പ്രവർത്തിക്കുന്നത്. കൂടുതൽ സ്റ്റോറേജ് വേണ്ടവർക്കായി 1 ടിബി വരെ എക്സ്പാൻഡ് ചെയ്യാൻ സഹായിക്കുന്ന മൈക്രോ എസ്ഡി കാർഡ് സ്ലോട്ടും ഫോണിൽ നൽകിയിട്ടുണ്ട്.

മൂന്ന് പിൻ ക്യാമറകളുമായിട്ടാണ് മോട്ടോ ജി52 സ്മാർട്ട്ഫോൺ വരുന്നത്. 50 എംപി പ്രൈമറി ക്യാമറയ്ക്കൊപ്പം ഈ ട്രിപ്പിൾ റിയർ ക്യാമറ സെറ്റപ്പിൽ 8 മെഗാപിക്സൽ അൾട്രാവൈഡ് ക്യാമറയും 2 മെഗാപിക്സൽ ഡെപ്ത് സെൻസിങ് ക്യാമറയും നൽകിയിട്ടുണ്ട്. സെൽഫികൾക്കും വീഡിയോ കോളുകൾക്കുമായി ഡിവൈസിൽ 16 മെഗാപിക്സൽ ക്യാമറയാണ് മോട്ടറോള കൊടുത്തിരിക്കുന്നത്. ബജറ്റ് വിഭാഗത്തിൽ ലഭിക്കുന്ന മികച്ച ക്യാമറ സെറ്റപ്പ് തന്നെയാണ് ഈ മോട്ടറോള ഡിവൈസിലും ഉള്ളത്. ഡ്യുവൽ ക്യാപ്‌ചർ, സ്‌മാർട്ട് കോമ്പോസിഷൻ, സ്‌പോട്ട് കളർ, ലൈവ് മോട്ടോ, പ്രോ മോഷൻ, അൾട്രാ-വൈഡ് ഡിസ്റ്റോർഷൻ കറക്ഷൻ എന്നിവയുൾപ്പെടെയുള്ള സവിശേഷതകൾ സപ്പോർട്ട് ചെയ്യുന്ന ക്യാമറയാണ് ഇത്. 30എഫ്പിഎസ് ഫ്രെയിം റേറ്റിൽ ഫുൾ-എച്ച്ഡി വീഡിയോ റെക്കോർഡിങും ഇത് സപ്പോർട്ട് ചെയ്യുന്നു.

ഡോൾബി അറ്റ്മോസ് സപ്പോർട്ടുള്ള ഡ്യൂവൽ സ്പീക്കറുകളാണ് മോട്ടോ ജി52 സ്മാർട്ട്ഫോണിന്റെ മറ്റൊരു സവിശേഷത. 3.5എംഎം ഓഡിയോ ജാക്കും ഫോണിലുണ്ട്. ഫോണിൽ ഐപി52-റേറ്റഡ് ബോഡിയാണ് ഉള്ളത്. വെള്ളം തെറിച്ചാലും മറ്റും ഫോണിന് കേടുപാടുകൾ സംഭവിക്കില്ല. 30W ഫാസ്റ്റ് ചാർജിങ് സപ്പോർട്ടുള്ള 5000mAh ബാറ്ററിയാണ് മോട്ടോ ജി52 ഫോണിലുള്ളത്. സുരക്ഷയ്ക്കായി സൈഡ് മൗണ്ടഡ് ഫിംഗർപ്രിന്റ് സ്കാനറും ഡിവൈസിലുണ്ട്. 169 ഗ്രാം ഭാരവും 7.99mm കനവുമാണ് ഫോണിനുള്ളത്.