മോട്ടറോളയുടെ ഫ്ലാഗ്ഷിപ്പ് സ്മാർട്ട്ഫോണായ നിയോ പുറത്തിറങ്ങുക സ്നാപ്ഡ്രാഗൺ 865 SoCയുമായി

മോട്ടറോളയുടെ പുതിയ ഫ്ലാഗ്ഷിപ്പ് സ്മാർട്ട്ഫോണിന്റെ വിലയും സവിശേഷതകളും വിലയിരുത്തിയതിൽ നിന്നും മാർക്കറ്റിലെ മറ്റ് ബ്രാന്റുകളുടെ ഡിവൈസുകളോട് പിടിച്ചുനിൽക്കാൻ ഈ സ്മാർട്ട്ഫോണിന് സാധിച്ചിരുന്നില്ല. ഈ പോരായ്മ മോട്ടറോള മറ്റൊരു ഫ്ലാഗ്ഷിപ്പ് സ്മാർട്ട്ഫോണിലൂടെ പരിഹരിക്കാൻ ഒരുങ്ങുകയാണെന്നാണ് റിപ്പോർട്ടുകൾ. അധികം വിലയില്ലാത്തതും എന്നാൽ പ്രീമിയം ഫ്ലാഗ്ഷിപ്പ് ഡിവൈസുമായിരിക്കും പുതുതായി പുറത്തിറക്കുന്നത്. ഈ പുതിയ ഡിവൈസ് 2021ന്റെ തുടക്കത്തിൽ തന്നെ ലോഞ്ച് ചെയ്യുമെന്ന് റിപ്പോർട്ടുകൾ ഉണ്ട്.

കൂടുതൽ വായിക്കുക: ഓപ്പോ എ33 സ്മാർട്ട്‌ഫോണിന്റെ വില കുറച്ചു: പുതിയ വിലയും ഓഫറുകളും

മോട്ടറോള 'നിയോ'

ടെക്നിക് ന്യൂസ് റിപ്പോർട്ട് അനുസരിച്ച് എക്സ്ടി 2125 എന്ന മോഡൽ നമ്പരുള്ള പുതിയ ഹൈ എൻഡ് സ്മാർട്ട്‌ഫോൺ മോട്ടറോള തയ്യാറാക്കുന്നുണ്ട്. ഈ സ്മാർട്ട്‌ഫോണിന് നിയോ എന്നായിരിക്കും പേരെന്നും റിപ്പോർട്ടുകൾ ഉണ്ട്. നേരത്തെ പുറത്തിറങ്ങിയ മോട്ടറോളയുടെ ഫ്ലാഗ്ഷിപ്പായ മോട്ടറോള എഡ്ജ് +ന് സമാനമായി ഒക്ടാ കോർ ക്വാൽകോം സ്‌നാപ്ഡ്രാഗൺ 865 ചിപ്‌സെറ്റിന്റെ കരുത്തിലായിരിക്കും ഈ ഡിവൈസും പ്രവർത്തിക്കുക എന്നാണ് റിപ്പോർട്ടുകൾ. ഡിവൈസിന്റെ പേര് ഇത് തന്നെ ആയിരിക്കുമോ എന്ന കാര്യത്തിലും സ്ഥിരീകരണം ഉണ്ടായിട്ടില്ല.

മോട്ടറോള എഡ്ജ്+ സ്മാർട്ട്ഫോണിന് ശേഷം പുറത്തിറക്കുന്ന പുതിയ ഫ്ലാഗ്ഷിപ്പ് സ്മാർട്ട്ഫോൺ 8 ജിബി റാമും 128 ജിബി സ്റ്റോറേജ് സ്‌പെയ്‌സുമുള്ള ഒരൊറ്റ സ്റ്റോറേജ് ​​കോൺഫിഗറേഷനിലായിരിക്കും പുറത്തിറങ്ങുകയെന്ന സൂചനയും ചില റിപ്പോർട്ടുകൾ നൽകുന്നുണ്ട്. ഇതിനൊപ്പം 12 ജിബി റാമും 256 ജിബി സ്റ്റോറേജ് സ്‌പെയ്‌സും ഉള്ള മറ്റൊരു ഹൈ എൻഡ് വേരിയന്റിലും ഡിവൈസ് പുറത്തിറക്കാനുള്ള സാധ്യത തള്ളിക്കളയാനാകില്ല. എന്നാൽ ഇത് സംബന്ധിച്ച് റിപ്പോർട്ടുകളൊന്നും ഇല്ല.

കൂടുതൽ വായിക്കുക: അതിശയിപ്പിക്കുന്ന സവിശേഷതകളുമായി റിയൽമി എക്സ് 7 സീരിസ് സ്മാർട്ട്ഫോണുകൾ അടുത്ത വർഷം ഇന്ത്യയിലെത്തും

മോട്ടറോള നിയോ 560 x 1080 പിക്സൽ റെസല്യൂഷനുള്ള ഡിസ്പ്ലെയുമായിട്ടായിരിക്കും അവതരിപ്പിക്കുക. ഈ ഡിസ്പ്ലെയുടെ വലിപ്പം ഇതുവരെ വ്യക്തമായിട്ടില്ല. ഇതൊരു എഫ്എച്ച്ഡി+ ഡിസ്പ്ലേയായിരിക്കും എന്നാണ് റിപ്പോർട്ടുകൾ. ഈ ഡിസ്പ്ലേയ്ക്ക് 90Hz റിഫ്രഷ് റേറ്റ് ഉണ്ടെന്നും സൂചനകൾ ഉണ്ട്. ഡിവൈസിന്റെ മുൻവശത്ത് 16 എംപി ഓമ്‌നിവിഷൻ ഒവി16എ1ക്യു വൈഡ് ആംഗിൾ പ്രൈമറി സെൻസറു 8 എംപി അൾട്രാ-വൈഡ് ആംഗിൾ സാംസങ് എസ്5കെ4എച്ച്7 സെൻസറുമുള്ള ഡ്യൂവൽ ക്യാമറ സെറ്റപ്പായിരിക്കും നൽകുക എന്നും റിപ്പോർട്ടുകളുണ്ട്.

പുതിയ മോട്ടറോള നിയോ ഫ്ലാഗ്ഷിപ്പ് സ്മാർട്ട്‌ഫോണിൽ ഡ്യുവൽ സിം സപ്പോർട്ട് ഉണ്ടായിരിക്കുമെന്നാണ് റിപ്പോർട്ടുകൾ. ആൻഡ്രോയിഡ് 11 ഔട്ട്-ഓഫ്-ബോക്‌സിലായിരിക്കും ഈ ഡിവൈസ് പ്രവർത്തിക്കുക. ഡിവൈസ് 2021ന്റെ ആദ്യ പാദത്തിൽ തന്നെ പുറത്തിറക്കും. മോട്ടറോള എഡ്ജ് + ന്റെ പിൻഗാമിയായി എത്തുന്ന ഡിവൈസുമായി ബന്ധപ്പെട്ട കൂടുതൽ വിവരങ്ങൾ വരും ദിവസങ്ങളിൽ ലഭ്യമാകും. ഫ്ലാഗ്ഷിപ്പ് വിപണിയിൽ തിരിച്ചുവരാനായി മികച്ചൊരു ഡിവൈസ് തന്നെയായിരിക്കും മോട്ടറോള പുറത്തിറക്കുക എന്ന കാര്യം ഉറപ്പാണ്.

കൂടുതൽ വായിക്കുക: സാംസങ് ഗാലക്സി ഇസെഡ് ഫോൾഡ് 3 അടുത്ത ജൂണിൽ വിപണിയിലെത്തും, നോട്ട് സീരീസ് നിർത്തലാക്കുന്നു