കിടിലൻ ഫീച്ചറുകളുമായി വൺപ്ലസ് 9 പ്രോ സ്മാർട്ട്ഫോൺ വൈകാതെ വിപണിയിലെത്തും

വൺപ്ലസ് 9 സ്മാർട്ട്ഫോണിൽ ഉണ്ടായിരിക്കുക 120Hz റിഫ്രഷ് റേറ്റുള്ള ഡിസ്പ്ലെയായിരിക്കുമെന്ന റിപ്പോർട്ടുകൾ നേരത്തെ പുറത്ത് വന്നിരുന്നു. വൺപ്ലസ് 8 ടിയിൽ സമാനമായ ഫുൾ-എച്ച്ഡി + ഡിസ്പ്ലേയായിരിക്കും ഇതെന്നാണ് റിപ്പോർട്ടുകൾ. വൺപ്ലസ് 9 സീരീസ് മാർച്ചിൽ ലോഞ്ച് ചെയ്യുമെന്നാണ് പ്രതീക്ഷിക്കുന്നത്. ഇക്കാര്യത്തിൽ കമ്പനിയുടെ ഔദ്യോഗിക സ്ഥീരികരണങ്ങളൊന്നും ഉണ്ടായിട്ടില്ല. ഈ സീരിസിൽ വൺപ്ലസ് 9. വൺപ്ലസ് 9 പ്രോ എന്നിവ കൂടാതെ മറ്റെതെങ്കിലും ഡിവൈസ് ഉണ്ടാകുമോ എന്ന കാര്യത്തിലും വ്യക്തത ഇല്ല.

ഡേവ് ലീ എന്ന യൂട്യൂബറാണ് വൺപ്ലസ് 9 പ്രോ എന്ന് അവകാശപ്പെടുന്ന ഡിവൈസിന്റെ ചില ചിത്രങ്ങൾ പുറത്ത് വിട്ടത്. ഈ ചിത്രത്തിൽ വൺപ്ലസ് ലോഗോയുള്ള ഒരു ഫോണിന്റെ ബാക്ക് പാനലും വൺപ്ലസ് 9 ൽ പ്രതീക്ഷിക്കുന്ന ക്യാമറയുമായി ചില സാമ്യതകളുള്ള ഒരു ക്യാമറ മൊഡ്യൂളും വ്യക്തമായി കാണുന്നുണ്ട്. ഈ ചിത്രമനുസരിച്ച് വൺപ്ലസ് 9 പ്രോയിൽ നാല് സെൻസറുകളാണ് ഉള്ളത്. ക്യാമറ മൊഡ്യൂളിൽ ഹാസ്സൽബ്ലാഡ് ബ്രാൻഡിങും നൽകിയിട്ടുണ്ട്.

മീഡിയം ഫോർമാറ്റ് ക്യാമറകളും ഫോട്ടോഗ്രാഫി ഡിവൈസുകളും നിർമ്മിക്കുന്ന സ്വീഡിഷ് കമ്പനിയാണ് ഹാസ്സൽബ്ലാഡ്. കമ്പനിയുടെ ഡിവൈസുകളെല്ലാം വളരെ ചെലവേറിയതാണെന്ന് ഡേവ് ലീ പറയുന്നു. ഈ പാർട്ട്ണർഷിപ്പ് കാരണം വൺപ്ലസ് 9 പ്രോയുടെ വില വർദ്ധിക്കാനുള്ള സാധ്യതയും തള്ളിക്കളയാനാകില്ല. രണ്ട് വലിയ സെൻസറുകളും രണ്ട് ചെറിയ സെൻസറുകളും ചതുരാകൃതിയിലുള്ള മൊഡ്യൂളിനുള്ളിൽ നൽകിയിട്ടുണ്ട്. ഇതിൽ ലേസർ ഓട്ടോഫോക്കസും ഒരു ഫ്ലാഷും ഉണ്ട്. 3.3x ഒപ്റ്റിക്കൽ സൂം, ടിൽറ്റ്-ഷിഫ്റ്റ് ഫോട്ടോഗ്രാഫി മോഡ് എന്നിവയും ഡിവൈസിന്റെ ക്യാമറ സെറ്റപ്പിൽ ഉണ്ട്.

വീഡിയോയിലെ ചിത്രങ്ങളിൽ നിന്നും വൺപ്ലസ് 9 പ്രോയിൽ ഒരു കർവ്ഡ് ഡിസ്പ്ലേയായിരിക്കും ഉണ്ടാവുക എന്ന് വ്യക്തമാകുന്നു. ഗ്ലോ ഫിനിഷുമായിട്ടായിരിക്കും ഈ ഡിവൈസ് വരുന്നത്. നോട്ടിഫിക്കേഷൻ സ്ലൈഡറിനും പവർ ബട്ടണിനും ചുറ്റുമുള്ള ഫോണിന്റെ എഡ്ജ് ബാൻഡിങും വളഞ്ഞതാണ്. ഇത് വൺപ്ലസ് ഫോണുകളിൽ ഇതുവരെ കാണാത്ത ഡിസൈനാണ്. 120Hz റിഫ്രഷ് റേറ്റുള്ള 1,440x3,120 പിക്‌സൽ ഡിസ്‌പ്ലേയാണ് ഡിവൈസിൽ ഉണ്ടായിരിക്കുകയെന്ന് ചിത്രങ്ങൾ വ്യക്തമാക്കുന്നു. ഡിവൈസിലെ പ്രോസസറിനെക്കുറിച്ച് ഇതുവരെ വിവരങ്ങളൊന്നം ലഭ്യമല്ല.

ചിത്രങ്ങളിലെ വൺപ്ലസ് 9 പ്രോ വേരിയന്റിൽ 11 ജിബി റാമും 256 ജിബി സ്റ്റോറേജുമാണ് ഉള്ള്. ടിപ്‌സ്റ്റർ ഡിജിറ്റൽ ചാറ്റ് സ്റ്റേഷൻ പുറത്ത് വിട്ട റിപ്പോർട്ട് അനുസരിച്ച് വൺപ്ലസ് 8ടിക്ക് സമാനമായ ഡിസ്‌പ്ലേയുമായിട്ടായിരിക്കും വൺപ്ലസ് 9 പുറത്തിറങ്ങുക. വൺപ്ലസ് 9 ഫോണിന് 120 ഹെർട്സ് റിഫ്രഷ് റേറ്റുള്ള ഒരു ഫുൾ-എച്ച്ഡി + (1,080x2,400 പിക്‌സൽ) ഡിസ്‌പ്ലേ ഉണ്ടായിരിക്കും. ഡിക്സോമാർക്ക് അനുസരിച്ച് വൺപ്ലസ് 8ടിയുടെ ഡിസ്പ്ലേ സാംസങ് നോട്ട് 20 അൾട്രയുടെ ഡിസ്പ്ലെയ്ക്ക് താഴെയാണ്.