മികച്ച സവിശേഷതകളുമായി ഓപ്പോ എഫ്19 ഇന്ത്യയിലെത്തി, വില 18,990 രൂപ

Published: Tuesday, April 6, 2021, 13:09 [IST]

ഓപ്പോ എഫ് 19 സ്മാർട്ട്‌ഫോൺ ഇന്ത്യൻ വിപണിയിൽ അവതരിപ്പിച്ചു. അമോലെഡ് സ്‌ക്രീൻ, ഫാസ്റ്റ് ചാർജിങ് എന്നിവ പോലുള്ള ചില മികച്ച സവിശേഷതകളുമായിട്ടാണ് ഈ ഡിവൈസ് ലോഞ്ച് ചെയ്തത്. ഈ ഫോൺ അടുത്തിടെ ലോഞ്ച് ചെയ്ത എഫ്19 പ്രോ, എഫ്19 പ്രോ+ 5ജി എന്നീ ഡിവൈസുകളുടെ ടോൺഡൌൺ മോഡലാണ്. അതുകൊണ്ട് തന്നെ ഈ ഫോണിലെ സവിശേഷതകൾ സീരിസിലെ മറ്റ് രണ്ട് ഫോണുകളുടെ അത്ര മികച്ചത് അല്ലെങ്കിലം വിലയ്ക്ക് ചേർന്ന മികച്ച ഫീച്ചറുകൾ തന്നെ ഓപ്പോ എഫ്19 സ്മാർട്ട്ഫോൺ നൽകുന്നുണ്ട്.

ഇന്ത്യയിൽ ഓപ്പോ എഫ്19: വില

ഒറ്റ സ്റ്റോറേജ്, റാം മോഡലിൽ മാത്രമേ ഓപ്പോ എഫ്19 സ്മാർട്ട്ഫോൺ ലഭ്യമാവുകയുള്ളു. ഈ ഡിവൈസിന് 18,990 രൂപയാണ് വില. പ്രിസം ബ്ലാക്ക്, മിഡ്‌നൈറ്റ് ബ്ലൂ കളർ‌ വേരിയന്റുകളിൽ ഈ ഡിവൈസ് ലഭ്യമാകും. ഏപ്രിൽ 9ന് നടക്കുന്ന ആദ്യ വിൽപ്പനയിൽ ഈ ഡിവൈസ് സ്വന്തമാക്കുന്നവർക്ക് മികച്ച ഓഫറുകൾ ലഭ്യമാകും. ഈ ഡിവൈസ് വാങ്ങുന്ന ഉപയോക്താക്കൾക്ക് 3,999 രൂപ വിലയുള്ള എൻകോ ഡബ്ല്യു11 വയർലെസ് ഇയർബഡ്സ് 1,299 രൂപ്യ്ക്ക് സ്വന്തമാക്കാൻ സാധിക്കും.

ഓപ്പോ എൻകോ ഡബ്ല്യു31ന് 5,900 രൂപയാണ് യഥാർത്ഥ വില. ഈ ഡിവൈസ് ഓപ്പോ എഫ്19 വാങ്ങുന്നവർക്ക് 2,499 രൂപയ്ക്ക് സ്വന്തമാക്കാം. എച്ച്ഡിഎഫ്സി ബാങ്ക്, ഐസിഐസിഐ ബാങ്ക്, കൊട്ടക് ബാങ്ക്, സ്റ്റാൻഡേർഡ് ചാർട്ടേഡ് എന്നിവയുടെ കാർഡുകൾ ഉപയോഗിച്ച് ഓപ്പോ എഫ്19 വാങ്ങുമ്പോൾ 7.5 ശതമാനം ക്യാഷ്ബാക്ക് ലഭിക്കും. ചില ബാങ്കുകളിൽ നോ-കോസ്റ്റ് ഇഎംഐയും ലഭ്യമാണ്. വിലയുടെ 70 ശതമാനം മാത്രം നൽകി ഓപ്പോ അപ്‌ഗ്രേഡ് പ്രോഗ്രാമിലൂടെ ഈ ഫോൺ സ്വന്തമാക്കാൻ സാധിക്കും.

ഓപ്പോ എഫ്19: വിശേഷതകൾ

6.43 ഇഞ്ച് അമോലെഡ് ഡിസ്പ്ലേയുമായിട്ടാണ് ഓപ്പോ എഫ്19 സ്മാർട്ട്ഫോൺ പുറത്തിറങ്ങിയത്. ഫുൾ എച്ച്ഡി+ റെസല്യൂഷനുള്ള ഈ ഡിസ്പ്ലെയുടെ മുകളിൽ പഞ്ച്-ഹോൾ സിസ്റ്റവും നൽകിയിട്ടുണ്ട്. ഈ ഡിസ്പ്ലെയ്ക്ക് ഉയർന്ന റിഫ്രഷ് റേറ്റ് ഇല്ല. 60Hz മാത്രമാണ് റിഫ്രഷ് റേറ്റ്. ഇതൊരു പോരായ്മയാണ്. 90Hz, 120Hz റിഫ്രഷ് റേറ്റുള്ള ഡിസ്പ്ലെകളുള്ള സ്മാർട്ട്ഫോണുകൾ ഈ വില വിഭാഗത്തിൽ ലഭ്യമാണ്. പഞ്ച്-ഹോളിനുള്ളിൽ 16 മെഗാപിക്സൽ സെൽഫി ക്യാമറയാണ് ഉള്ളത്.

മൂന്ന് പിൻ ക്യാമറകളുമായിട്ടാണ് ഓപ്പോ എഫ്19 പുറത്തിറക്കിയിരിക്കുന്നത്. 48 മെഗാപിക്സൽ പ്രൈമറി ഷൂട്ടർ, 2 മെഗാപിക്സൽ മാക്രോ സ്നാപ്പർ, 2 മെഗാപിക്സൽ ഡെപ്ത് സെൻസർ എന്നിവയാണ് ഈ ക്യാമറകൾ. ഓപ്പോ എഫ്19 സ്മാർട്ട്ഫോണിന് കരുത്ത് നൽകുന്നത് ക്വാൽകോം സ്‌നാപ്ഡ്രാഗൺ 662 പ്രോസസറാണ്. ബജറ്റ് വിഭാഗത്തിലുള്ള പ്രോസസസറാണ് ഇത്. മൈക്രോ എസ്ഡി കാർഡിനുള്ള സപ്പോർട്ടുള്ള ഡിവൈസിൽ 6 ജിബി റാമും 128 ജിബി ഇന്റേണൽ സ്റ്റോറേജും ഉണ്ട്.

ഓപ്പോ എഫ്19യുടെ മറ്റൊരു സവിശേഷത ബാറ്ററിയാണ്. 5000mAh ബാറ്ററിയാണ് ഈ ഡിവൈസിൽ ഉള്ളത്. എഫ്19ന്റെ ഏറ്റവും വലിയ സവിശേഷതയായി കമ്പനി ഉയർത്തി കാണിക്കുന്നതും ഈ ബാറ്ററുയും ഫാസ്റ്റ് ചാർജിങുമാണ്. 33W ഫാസ്റ്റ് ചാർജിങാണ് ഈ ഡിവൈസിന് ഉള്ളത്. ഇത് ഏകദേശം 72 മിനിറ്റിനുള്ളിൽ ബാറ്ററി ചാർജ് ചെയ്യുന്നുവെന്നാണ് കമ്പനി അവകാശപ്പെടുന്നത്. ആൻഡ്രോയിഡ് 11 ബേസ്ഡ് കളർ ഒഎസ് 11 ഒഎസിലാണ് ഈ ഡിവൈസ് പ്രവർത്തിക്കുന്നത്.