പോക്കോ എഫ്3, പോക്കോ എക്സ്3 പ്രോ സ്മാർട്ട്ഫോണുകൾ അവതരിപ്പിച്ചു; വിലയും സവിശേഷതകളും

പോക്കോ എഫ്3 സവിശേഷതകൾ

3.2GHz ക്ലോക്ക് സ്പീഡുള്ള ക്വാൽകോം സ്‌നാപ്ഡ്രാഗൺ 870 പ്രോസസറിന്റെ കരുത്തിലാണ് പോക്കോ എഫ്3 സ്മാർട്ട്ഫോൺ പ്രവർത്തിക്കുന്നത്. 5ജി നെറ്റ്‌വർക്ക് സപ്പോർട്ടുള്ള ഡിവൈസാണ് ഇത്. 8 ജിബി റാമും 256 ജിബി സ്റ്റോറേജുമുള്ള സ്മാർട്ട്ഫോണിൽ സ്റ്റോറേജ് എക്സ്പാൻഡ് ചെയ്യാനായി മൈക്രോ എസ്ഡി കാർഡ് സ്ലോട്ടും പോക്കോ നൽകിയിട്ടുണ്ട്.

പോക്കോ എഫ്3 സ്മാർട്ട്ഫോണിൽ 6.7 ഇഞ്ച് അമോലെഡ് ഡിസ്പ്ലേയാണ് ഉള്ളത്. ഈ പാനലിൽ പഞ്ച്-ഹോൾ ഡിസൈനും എഫ്എച്ച്ഡി + റെസല്യൂഷനും ഉണ്ട്. 120 ഹെർട്സ് റിഫ്രഷ് റേറ്റാണ് ഡിവൈസിലുള്ളത്. ക്യാമറ കട്ടൌട്ടിൽ 20 എംപി സെൽഫി ക്യാമറയും നൽകിയിട്ടുണ്ട്. ട്രിപ്പിൾ ലെൻസ് പിൻ ക്യാമറ സെറ്റപ്പാണ് സ്മാർട്ട്ഫോണിൽ ഉള്ളത്. ഈ ക്യാമറ സെറ്റപ്പിൽ 48 എംപി പ്രൈമറി സെൻസർ, 8 എംപി അൾട്രാ-വൈഡ് ആംഗിൾ സെൻസർ, 5 എംപി മാക്രോ സെൻസർ എന്നിവയാണ് ഉള്ളത്.

സൈഡ് മൌണ്ട് ചെയ്ത ഫിംഗർപ്രിന്റ് സ്കാനറുമായിട്ടാണ് പോക്കോ എഫ്3 സ്മാർട്ട്ഫോൺ പുറത്തിറക്കിയിരിക്കുന്നത്. 4ജി വോൾട്ടി, യുഎസ്ബി ടൈപ്പ്-സി പോർട്ട്, വൈ-ഫൈ 6, ബ്ലൂടൂത്ത് 5.2 എന്നീ കണക്റ്റിവിറ്റി ഓപ്ഷനുകളും ഈ സ്മാർട്ട്ഫോണിൽ നൽകിയിട്ടുണ്ട്. 4,520 mAh ബാറ്ററിയാണ് ഈ ഡിവൈസിൽ ഉള്ളത്. ബാറ്ററി വേഗത്തിൽ ചാർജ് ചെയ്യുന്നതിനായി 33W ക്വിക്ക് ചാർജിങ് സപ്പോർട്ടും ഈ ഡിവൈസിൽ ഉണ്ട്.

പോക്കോ എക്സ്3 പ്രോ: സവിശേഷതകൾ

സ്നാപ്ഡ്രാഗൺ 860 പ്രോസസറിന്റെ കരുത്തിലാണ് പോക്കോ എക്സ്3 പ്രോ സ്മാർട്ട്ഫോൺ പ്രവർത്തിക്കുന്നത്. ഇതൊരു പ്രീമിയം ഡിവൈസാണ്. ഒക്ടാ കോർ ക്വാൽകോം ചിപ്‌സെറ്റിന് 2.96GHz ക്ലോക്ക് സ്പീഡും അഡ്രിനോ 640 ജിപിയു സപ്പോർട്ടും ഉണ്ട്. പോക്കോ എഫ്3 ൽ നിന്ന് വ്യത്യസ്തമായി സ്റ്റാൻഡേർഡ് 4ജി നെറ്റ്‌വർക്ക് കണക്റ്റിവിറ്റിയുമായാണ് ഈ ഡിവൈസ് അവതരിപ്പിച്ചിരിക്കുന്നത്. 8 ജിബി റാമും 256 ജിബി സ്റ്റോറേജുമുള്ള ഈ ഡിവൈസിൽ സ്റ്റോറേജ് എക്സ്പാൻഡ് ചെയ്യാൻ മൈക്രോ എസ്ഡികാർഡ് സപ്പോർട്ടും ഉണ്ട്.

നാല് പിൻക്യാമറകളാണ് പോക്കോ എക്സ്3 പ്രോ സ്മാർട്ട്ഫോണിൽ ഉള്ളത്. ഇതിൽ ആദ്യത്തെ ക്യാമറ 48 എംപി പ്രൈമറി ക്യാമറയാണ്. ഇതിനൊപ്പം വൈഡ് ആംഗിൾ ഷോട്ടുകൾക്കായി 8 എംപി സെക്കൻഡറി സെൻസർ, 2എംപി ഡെപ്ത് സെൻസർ, 2എംപി മാക്രോ സെൻസർ എന്നിവയും പോക്കോ നൽകിയിട്ടുണ്ട്. സെൽഫികൾക്കും വീഡിയോ കോളുകൾക്കുമായി ഈ ഡിവൈസിൽ 20 എംപി ലെൻസാണ് പോക്കോ നൽകിയിട്ടുള്ളത്.

പോക്കോ എഫ്3 സ്മാർട്ട്ഫോണിലെ അമോലെഡ് പാനലിൽ നിന്ന് വ്യത്യസ്തമായി എൽസിഡി ഡിസ്പ്ലേയാണ് പോക്കോ എക്സ് 3 പ്രോയിൽ ഉള്ളത്. 6.67 ഇഞ്ച് ഡിസ്‌പ്ലേയിൽ എഫ്‌എച്ച്‌ഡി + സ്‌ക്രീൻ റെസല്യൂഷനും 120 ഹെർട്സ് റിഫ്രഷ് റേറ്റും ഉണ്ട്. സുരക്ഷയ്‌ക്കായി പിൻ ഭാഗത്താണ് ഫിസിക്കൽ ഫിംഗർപ്രിന്റ് സ്‌കാനർ നൽകിയിട്ടുള്ളത്. ഡിവൈസിന് 5,160 mAh ബാറ്ററിയും ഉണ്ട്. 33W ഫാസ്റ്റ് ചാർജിംഗ് സപ്പോർട്ടുള്ള ബാറ്ററിയാണ് ഇത്.

പോക്കോ എഫ്3: വിലയും വിൽപ്പനയും

പോക്കോ എഫ്3 സ്മാർട്ട്ഫോണിന്റെ 6 ജിബി റാമും 128 ജിബി സ്റ്റോറേജുമുള്ള അടിസ്ഥാന മോഡലിന് 349 യൂറോ (ഏകദേശം 30,129 രൂപ) വിലയുണ്ട്, ഡിവൈസിന്റെ 8 ജിബി റാമും 128 ജിബി സ്റ്റോറേജുമുള്ള മോഡലിന് 399 യൂറോ (ഏകദേശം 34,448 രൂപ) വിലയുണ്ട്. ആർട്ടിക് വൈറ്റ്, ഡീപ് ഓഷ്യൻ ബ്ലൂ, നൈറ്റ് ബ്ലാക്ക് എന്നീ നിറങ്ങളിലാണ് ഈ ഡിവൈസ് വിപണിയിൽ എത്തിയിരിക്കുന്നത്.

പോക്കോ എക്സ് 3 പ്രോ: വിലയും വിൽപ്പനയും

പോക്കോ എക്സ്3 പ്രോ സ്മാർട്ട്ഫോണിനറെ 6 ജിബി റാമും 128 ജിബി സ്റ്റോറേജുമുള്ള മോഡലിന് 249 യൂറോ (ഏകദേശം 21,498 രൂപ) വിലയുണ്ട്. ഡിവൈസിന്റെ 8 ജിബി റാമും 256 ജിബി സ്റ്റോറേജ് കോൺഫിഗറേഷനുമുള്ള ടോപ്പ് മോഡലിന് 299 യൂറോ (ഏകദേശം 25,500 രൂപ) ആണ് വില. ഫ്രോസ്റ്റ് ബ്ലൂ, ഫാന്റം ബ്ലാക്ക്, മെറ്റൽ ബ്രൌൺസ് എന്നീ നിറങ്ങളിൽ ഈ ഡിവൈസ് ലഭ്യമാകും.