പോക്കോ M2 പ്രോ സ്മാർട്ട്ഫോണിന്റെ ഫ്ലാഷ് സെയിൽ ഇന്ന് ഉച്ചയ്ക്ക് ഫ്ലിപ്പ്കാർട്ട് വഴി

Updated: Tuesday, August 25, 2020, 9:18 [IST]

പ്രമുഖ സ്മാർട്ട്ഫോൺ നിർമ്മാതാക്കളായ പോക്കോ സ്വതന്ത്ര ബ്രാന്റായതിന് ശേഷം ഇന്ത്യൻ വിപണിയിൽ അവതരിപ്പിച്ച രണ്ടാമത്തെ ഡിവൈസാണ് പോക്കോ M2 പ്രോ. ഈ സ്മാർട്ട്ഫോണിന്റെ വിൽപ്പന ഇന്ന് ഉച്ചയ്ക്ക് 12 മണിക്ക് നടക്കും. ഫ്ലിപ്പ്കാർട്ടിലൂടെയാണ് സ്മാർട്ട്ഫോൺ വിൽപ്പനയ്ക്കെത്തുന്നത്. നേരത്തെ നടന്ന ഫ്ലാഷ് സെയിലുകളിലെല്ലാം വളരെ വേഗത്തിൽ വിറ്റഴിഞ്ഞ ഈ ഡിവൈസ് ഇതിനകം ജനപ്രീതി നേടിയിട്ടുണ്ട്. 6.7 ഇഞ്ച് ഡിസ്പ്ലെ, ക്വാഡ് ക്യാമറ സെറ്റപ്പ്, ഒക്ടാ കോർ ക്വാൽകോം സ്‌നാപ്ഡ്രാഗൺ 720 ജി പ്രോസസർ എന്നിവയാണ് ഡിവൈസിന്റെ സവിശേഷതകൾ.

പോക്കോ M2 പ്രോ: വിലയും ലഭ്യതയും

പോക്കോ M2 പ്രോ സ്മാർട്ട്ഫോൺ മൂന്ന് വ്യത്യസ്ത സ്റ്റോറേജ് വേരിയന്റുകളിൽ ലഭ്യമാണ്. 4 ജിബി റാമും 64 ജിബി സ്റ്റോറേജുമുള്ള ബേസ് വേരിയന്റിന് 13,999 രൂപയാണ് വില. 6 ജിബി റാമും 64 ജിബി സ്റ്റോറേജുമുള്ള മോഡലിന് 14,999 രൂപയും 6 ജിബി റാമും 128 ജിബി സ്റ്റോറേജുമുള്ള മോഡലിന് 16,999 രൂപയും വിലയുണ്ട്. ഈ സ്മാർട്ട്ഫോൺ റ്റു ഷേഡ്സ് ബ്ലാക്ക്, ഔട്ട് ഓഫ് ബ്ലൂ, ഗ്രീൻ, ഗ്രീനർ എന്നീ നിറങ്ങളിൽ ലഭ്യമാകും. ഇന്ന് ഉച്ചയ്ക്ക് 12 മണിക്കാണ് ഡിവൈസിന്റെ വിൽപ്പന ആരംഭിക്കുന്നത്.

പോക്കോ M2 പ്രോ: സവിശേഷതകൾ

1080 x 2400 പിക്സൽ എഫ്എച്ച്ഡി + റെസല്യൂഷനും 20: 9 സിനിമാറ്റിക് ആസ്പാക്ട് റേഷിയേവും ഉള്ള 6.7 ഇഞ്ച് ഐപിഎസ് എൽസിഡി ഡിസ്പ്ലേയുാണ് പോക്കോ എം2 പ്രോ സ്മാർട്ട്ഫോണിൽ ഉള്ളത്. ഈ ഡിസ്പ്ലെ വീഡിയോ സ്ട്രീമിങിനും ഗെയിമിങിനുമെല്ലാം മികച്ച അനുഭവം നൽകുന്നതാണ്. പഞ്ച്-ഹോൾ ഡിസൈനിലാണ് ഡിവൈസ് പുറത്തിറക്കിയിരിക്കുന്നത്. റെഡ്മി നോട്ട് 9 പ്രോ സ്മാർട്ട്ഫോണുമായി ഏറെ സാമ്യം തോന്നുന്ന ഡിസൈനാണ് ഡിവൈസിന്റേത്.

പോക്കോ M2 പ്രോ സ്മാർട്ട്ഫോണിന്റെ പിന്നിൽ നാല് ക്യാമറകളാണ് ഉള്ളത്. ഈ ക്വാഡ് ക്യാമറ സെറ്റപ്പിൽ 48 എംപി പ്രൈമറി ലെൻസും വൈഡ് ആംഗിൾ ഷോട്ടുകൾക്കായി 8 എംപി സെൻസറും 5 എംപി മാക്രോ സെൻസറും ഡെപ്ത് ഇഫക്റ്റുകൾക്കായി 2 എംപി ലെൻസുമാണ് പോക്കോ നൽകിയിട്ടുള്ളത്. സെൽഫികൾക്കും വീഡിയോ കോളിങിനുമായി പഞ്ച്-ഹോളിനുള്ളിൽ 16 എംപി ഫ്രണ്ട് ക്യാമറയും കമ്പനി നൽകിയിട്ടുണ്ട്. ഈ ക്യാമറയിലൂടെ കുറഞ്ഞ ലൈറ്റിലും മികച്ച സെൽഫികൾ എടുക്കാൻ 'നൈറ്റ് മോഡ്' ഫീച്ചറും ഉൾപ്പെടുത്തിയിരിക്കുന്നു.

അഡ്രിനോ 618 ജിപിയു ഉള്ള പോക്കോ എം2 പ്രോ സ്മാർട്ട്ഫോൺ മിഡ് റേഞ്ച് ഗെയിമിങ് പ്രോസസറായ ഒക്ടാ കോർ ക്വാൽകോം സ്‌നാപ്ഡ്രാഗൺ 720 ജിയുടെ കരുത്തിലാണ് പ്രവർത്തിക്കുന്നത്. ഈ ശക്തനായ പ്രോസസറിനൊപ്പം 6 ജിബി റാമും 64 ജിബി സ്റ്റോറേജ് കോൺഫിഗറേഷനും പോക്കോ നൽകിയിട്ടുണ്ട്. ആൻഡ്രോയിഡ് 10 ഒ.എസ് അടിസ്ഥാനമാക്കിയുള്ള MIUI 11ലാണ് എം2 പ്രോ സ്മാർട്ട്ഫോൺ പ്രവർത്തിക്കുന്നത്.

പോക്കോ എം2 പ്രോ സ്മാർട്ട്ഫോണിൽ ചാർജിങിനായി യുഎസ്ബി ടൈപ്പ്-സി പോർട്ടാണ് ഉള്ളത്. ഈ പോർട്ടിന്റെ അടുത്തായി 3.5 എംഎം ഹെഡ്‌ഫോൺ ജാക്കും സ്പീക്കർ ഗ്രില്ലും നൽകിയിട്ടുണ്ട്. ഡിവൈസിന്റെ വലത് വശത്ത് സൈഡ് പാനലിൽ സുരക്ഷയ്ക്കായുള്ള ഫിംഗർപ്രിന്റ് സ്കാനറും നൽകിയിട്ടുണ്ട്. 5,000 എംഎഎച്ച് ബാറ്ററിയാണ് ഫോണിലുള്ളത്. 33W ഫാസ്റ്റ് ചാർജിങ് സപ്പോർട്ടും ഡിവൈസിൽ കമ്പനി നൽകിയിട്ടുണ്ട്.