പോക്കോ എം2 സ്മാർട്ട്ഫോൺ ഇന്ത്യൻ വിപണിയിലെത്തി; വിലയും സവിശേഷതകളും

പോക്കോ എം2: വിലയും ലഭ്യതയും

പോക്കോ എം2 സ്മാർട്ട്ഫോൺ രണ്ട് സ്റ്റോറേജ് കോൺഫിഗറേഷനുകളിലും മൂന്ന് കളർ ഓപ്ഷനുകളിലും ലഭ്യമാണ്. ഡിവൈസിന്റെ ബേസ് വേരിയന്റിൽ 6 ജിബി റാമും 64 ജിബി സ്റ്റോറേജുമാണ് ഉള്ളത്. ഈ വേരിയന്റിന് 10,999 രൂപയാണ് വില. ഡിവൈസിന്റെ രണ്ടാമത്തെ വേരിയന്റിൽ 6 ജിബി റാമും 128 ജിബി സ്റ്റോറേജുമുണ്ട്. ഈ മോഡലിന് 12,499 രൂപയാണ് വില. പിച്ച് ബ്ലാക്ക്, സ്ലേറ്റ് ബ്ലൂ, ബ്രിക്ക് റെഡ് എന്നീ കളർ ഓപ്ഷനുകളിലാണ് ഡിവൈസ് ലഭ്യമാകുന്നത്. സെപ്റ്റംബർ 15ന് ഉച്ചയ്ക്ക് 12 മണിക്ക് ഡിവൈസ് ഫ്ലിപ്പ്കാർട്ടിലൂടെ വിൽപ്പനയ്ക്ക് എത്തും.

പോക്കോ എം2: സവിശേഷതകൾ

ആൻഡ്രോയിഡ് 10 ബേസ്ഡ് എംഐയുഐയിൽ പ്രവർത്തിക്കുന്ന ഈ സ്മാർട്ട്ഫോണിൽ രണ്ട് നാനോ സിം കാർഡ് സ്ലോട്ടുകളാണ് ഉള്ളത്. 6.53 ഇഞ്ച് ഫുൾ എച്ച്ഡി+ (1,080x2,340 പിക്‌സൽ) ഡിസ്‌പ്ലേയാണ് ഡിവൈസിൽ ഉള്ളത്. കോർണിംഗ് ഗോറില്ല ഗ്ലാസ് 3 ഡിസ്‌പ്ലേ പ്രോട്ടക്ഷനും കമ്പനി നൽകിയിട്ടുണ്ട്. മാലി ജി 52 ജിപിയു, 6 ജിബി എൽപിഡിഡിആർ 4 എക്‌സ് റാം എന്നിവയ്ക്കൊപ്പം മീഡിയടെക് ഹെലിയോ ജി 80 സോസിയാണ് പോക്കോ എം2 സ്മാർട്ട്ഫോണിന് കരുത്ത് നൽകുന്നത്.

പോക്കോ എം2 സ്മാർട്ട്ഫോണിൽ 13 മെഗാപിക്സൽ പ്രൈമറി ക്യാമറയടങ്ങുന്ന ക്വാഡ് ക്യാമറ സെറ്റപ്പാണ് കമ്പനി നൽകിയിട്ടുള്ളത്. ഇതിനൊപ്പം അൾട്രാ വൈഡ് ആംഗിൾ ലെൻസുള്ള 8 മെഗാപിക്സൽ സെൻസർ, മാക്രോ ലെൻസുള്ള 5 മെഗാപിക്സൽ സെൻസർ, 2 മെഗാപിക്സൽ ഡെപ്ത് സെൻസർ എന്നിവയും നൽകിയിട്ടുണ്ട്. ഡിവൈസിന്റെ മുൻവശത്ത് സെൽഫികൾക്കും വീഡിയോ കോളിങിനുമായി 8 മെഗാപിക്സൽ ക്യാമറയും കമ്പനി നൽകിയിട്ടുണ്ട്. ഡിസ്പ്ലെയിലുള്ള നോച്ചിലാണ് ഫ്രണ്ട് ക്യാമറ സെൻസർ ഉള്ളത്.

128 ജിബി വരെ ഓൺബോർഡ് സ്റ്റോറേജുമായാണ് പോക്കോ എം2 സ്മാർട്ട്ഫോൺ പുറത്തിറക്കിയിട്ടുള്ളത്. ഉപയോക്താക്കൾക്ക് ഈ സ്റ്റോറേജ് തികയാതെ വന്നാൽ സ്റ്റോറേജ് എക്സ്പാൻഡ് ചെയ്യാനായി ഒരു മൈക്രോ എസ്ഡി കാർഡ് സ്ലോട്ടും കമ്പനി നൽകിയിട്ടുണ്ട്. ഡിവൈസിൽ കണക്റ്റിവിറ്റി ഓപ്ഷനുകളായി ഡ്യുവൽ-ബാൻഡ് വൈ-ഫൈ, ഡ്യുവൽ വോൾട്ടി സപ്പോർട്ട്, 4 ജി, ബ്ലൂടൂത്ത് വി 5.0, ഐആർ ബ്ലാസ്റ്റർ, ജിപിഎസ്, 3.5 എംഎം ഹെഡ്‌ഫോൺ ജാക്ക്, യുഎസ്ബി ടൈപ്പ്-സി പോർട്ട് എന്നിവയാണ് നൽകിയിട്ടുള്ളത്.

പോക്കോ എം2 സ്മാർട്ട്ഫോണിലുള്ള സെൻസറുകളിൽ ആക്‌സിലറോമീറ്റർ, ഗൈറോസ്‌കോപ്പ്, ആംബിയന്റ് ലൈറ്റ് സെൻസർ, പ്രോക്‌സിമിറ്റി സെൻസർ എന്നിവ ഉൾപ്പെടുന്നു. 18W ഫാസ്റ്റ് ചാർജിങ് പിന്തുണയോടെ 5,000 എംഎഎച്ച് ബാറ്ററിയാണ് ഫോണിലുള്ളത്. ഡിവൈസിൽ സ്പ്ലാഷ് റെസിസ്റ്റൻസിനായി പി 2 ഐ കോട്ടിംഗും കമ്പനി നൽകിയിട്ടുണ്ട്. കുറഞ്ഞ വിലയും ആകർഷകമായ സവിശേഷതകളും കൊണ്ട് പോക്കോയുടെ പുതിയ ഡിവൈസ് വിപണിയിൽ ശ്രദ്ധനേടുമെന്ന് ഉറപ്പാണ്.