റിയൽ‌മി 7ഐ സ്മാർട്ട്ഫോൺ ഒക്ടോബർ 7ന് ഇന്ത്യൻ വിപണിയിൽ അവതരിപ്പിക്കും

റിയൽ‌മി 7ഐ: ഇന്ത്യയിലെ ലോഞ്ച്

റിയൽമി 7ഐ സ്മാർട്ട്ഫോൺ ഒക്ടോബർ 7ന് ഇന്ത്യൻ വിപണിയിൽ അവതരിപ്പിക്കുമെന്ന് കമ്പനി ഔദ്യോഗികമായി സ്ഥിരീകരിച്ചു. കമ്പനിയുടെ ഔദ്യോഗിക വെബ്സൈറ്റിലൂടെയാണ് ലോഞ്ച് തിയ്യതി സ്ഥിരീകരിച്ചത്. ഈ ഡിവൈസിന് പുറമേ 55 ഇഞ്ച് സ്ലെഡ് 4കെ സ്മാർട്ട് ടിവി, റിയൽമി 7 പ്രോ സൺ കിസ്ഡ് ലെതർ സ്‌പെഷ്യൽ എഡിഷൻ വേരിയന്റ് എന്നിവയും കമ്പനി പുറത്തിറക്കും. ഒക്ടോബർ 7ന് ഉച്ചയ്ക്ക് 12.30നാണ് ലോഞ്ച് ഇവന്റ് ആരംഭിക്കുന്നത്.

റിയൽ‌മി 7ഐ: പ്രധാന സവിശേഷതകൾ

ക്വാൽകോം സ്‌നാപ്ഡ്രാഗൺ 662 പ്രോസസറിന്റെ കരുത്തിൽ പ്രവർത്തിക്കാവുന്ന വിലകുറഞ്ഞ സ്മാർട്ട്‌ഫോണാണ് റിയൽമി 7ഐ. 8 ജിബി റാമും 128 ജിബി സ്റ്റോറേജ് കോൺഫിഗറേഷനുമായാണ് ഈ ഡിവൈസ് പുറത്തിറക്കുന്നത്. മൈക്രോ എസ്ഡി കാർഡ് സ്ലോട്ടിലൂടെ സ്റ്റോറേജ് എക്സ്പാൻഡ് ചെയ്യാനുള്ള സംവിധാനവും ഈ ഡിവൈസിൽ കമ്പനി നൽകുന്നുണ്ട്. ആൻഡ്രോയിഡ് 10 ബേസ്ഡ് റിയൽ‌മി യുഐലാണ് ഈ സ്മാർട്ട്ഫോൺ പ്രവർത്തിക്കുന്നത്.

64 എംപി പ്രൈമറി സെൻസറുള്ള ക്വാഡ് റിയർ ക്യാമറ സെറ്റപ്പാണ് റിയൽമി 7ഐ സ്മാർട്ട്ഫോണിൽ ഉള്ളത്. 8 എംപി സെക്കൻഡറി അൾട്രാ-വൈഡ് ആംഗിൾ സെൻസർ, 2 എംപി ബ്ലാക്ക് ആൻഡ് വൈറ്റ് സെൻസർ, 2 എംപി മാക്രോ സെൻസർ എന്നിവയാണ് ഈ ക്വാഡ് ക്യാമറ സെറ്റപ്പിലെ മറ്റ് ക്യാമറകൾ. 16 എം‌പി ക്യാമറയാണ് സെൽഫികൾക്കും വീഡിയോ കോളുകൾക്കുമായി നൽകിയിട്ടുള്ളത്. ഈ ക്യാമറ ഒരു പഞ്ച്-ഹോളിനുള്ളിലാണ് നൽകിയിട്ടുള്ളത്.

720 x 1600 പിക്‌സൽ റെസല്യൂഷനുള്ള 6.5 ഇഞ്ച് എച്ച്ഡി+ ഡിസ്‌പ്ലേയാണ് റിയൽമി 7ഐ സ്മാർട്ട്ഫോണിൽ കമ്പനി നൽകിയിട്ടുള്ളത്. ഈ ഡിസ്പ്ലേയ്ക്ക് ഒരു സാധാരണ എച്ച്ഡി + റെസലൂഷനാണ് ഉള്ളതെങ്കിലും ഇതിന്റെ റിഫ്രഷ് റേറ്റ് ഉയർന്നതാണ്. 90Hz റിഫ്രഷ് റേറ്റാണ് ഡിസ്പ്ലെയ്ക്ക് കമ്പനി നൽകിയിരിക്കുന്നത്. സുരക്ഷയ്ക്കായി ഡിവൈസിൽ സ്റ്റാൻഡേർഡ് പിൻ, പാസ്‌വേഡ്, ഫെയ്‌സ് അൺലോക്ക് എന്നിവയും ഇതിനൊപ്പം പിൻ പാനലിൽ ഫിംഗർപ്രിന്റ് സ്‌കാനറും നൽകിയിട്ടുണ്ട്.

4 ജി എൽടിഇ, വൈ-ഫൈ, ബ്ലൂടൂത്ത്, 3.5 മീറ്റർ ഹെഡ്‌ഫോൺ ജാക്ക് എന്നിവയുമായാണ് റിയൽമി 7ഐ സ്മാർട്ട്ഫോൺ പുറത്തിറക്കിയിരിക്കുന്നത്. യുഎസ്ബി ടൈപ്പ്-സി പോർട്ടിലൂടെ ചാർജ് ചെയ്യാവുന്ന ഈ ഡിവൈസിൽ 5,000 എംഎഎച്ച് ബാറ്ററിയും റിയൽമി നൽകിയിട്ടുണ്ട്. ഇന്ത്യൻ വിപണിയിൽ വിജയിക്കുന്ന രീതിയൽ കുറഞ്ഞ വിലയിൽ ആകർഷകമായ സവിശേഷതകളോടെയായിരിക്കും ഈ ഡിവൈസ് പുറത്തിറങ്ങുക.