കരുത്തൻ ചിപ്പ്സെറ്റും 125W ഫാസ്റ്റ് ചാർജിങുമായി റിയൽമി ജിടി 2 പ്രോ നാളെ വിപണിയിലെത്തും

റിയൽമി ജിടി 2 പ്രോയുടെ ലോഞ്ച് തീയതി കമ്പനി ഔദ്യോഗികമായി തന്നെ പ്രഖ്യാപിച്ചിട്ടുണ്ട്. ഇതേ ചിപ്പ്സെറ്റുമായി മോട്ടറോളയുടെ ഒരു സ്മാർട്ട്ഫോണും നാളെ വിപണിയിലെത്തുമെന്ന് സൂചനകൾ ഉണ്ട്. സ്‌നാപ്ഡ്രാഗൺ 8 ജെൻ 1 ചിപ്പ്സെറ്റുള്ള ആദ്യത്തെ സ്മാർട്ട്ഫോൺ ഇതിൽ ഏതായിരിക്കും എന്ന് നാളെ മാത്രമേ അറിയാൻ സാധിക്കുകയുള്ളു. ആദ്യം പുറത്തിറങ്ങുന്ന ഫോണിന് ഈ പദവി ലഭിക്കും. റിയൽമി പുറത്ത് വിട്ട ഒരു ടീസർ പോസ്റ്ററിൽ റിൽമി ജിടി 2 പ്രോയുടെ ലോഞ്ച് തീയതി മാത്രമേ വെളിപ്പെടുത്തുന്നുള്ളൂ. സമയം ഇതിൽ വ്യക്തമാക്കുന്നില്ല.

റിയൽമി ജിടി 2 പ്രോ: പ്രതീക്ഷിക്കുന്ന സവിശേഷതകൾ

നാളെ പുറത്തിറങ്ങാൻ പോകുന്ന റിയൽമി ജിടി 2 പ്രോ സ്മാർട്ട്‌ഫോണിൽ 6.51 ഇഞ്ച് അമോലെഡ് ഡിസ്‌പ്ലേ ആയിരിക്കും ഉണ്ടാവുക എന്നാണ് റിപ്പോർട്ടുകൾ. ഈ ഡിസ്‌പ്ലേ പാനൽ 120Hz റിഫ്രഷ് റേറ്റ് നൽകും. ഇൻ-സ്‌ക്രീൻ ഫിംഗർപ്രിന്റ് സെൻസറും ഇതിൽ ഉണ്ടായിരിക്കും. 12 ജിബി വരെ LPDDR5 റാമും 256 ജിബി വരെ UFS 3.1 സ്റ്റോറേജും ജോടിയാക്കിയ സ്‌നാപ്ഡ്രാഗൺ 8 ജെൻ 1 ചിപ്‌സെറ്റിന്റെ കരുത്തിലായിരിക്കും ഈ ഡിവൈസ് പ്രവർത്തിക്കുന്നത്. 125W ഫാസ്റ്റ് ചാർജിങ് സപ്പോർട്ടുള്ള 5,000 mAh ബാറ്ററിയും ഈ ഡിവൈസിൽ ഉണ്ടായിരിക്കും.

ആൻഡ്രോയിഡ് 12 ഒഎസുമായി വിപണിയിലെത്തുന്ന ആദ്യ സ്മാർട്ട്ഫോണുകളിൽ ഒന്നാണ് റിയൽമി ജിടി 2 പ്രോ. ആൻഡ്രോയിഡ് 12 ബേസ്ഡ് റിയൽമി യുഐ 3.0 ആയിരിക്കും ഈ ഡിവൈസിൽ ഉണ്ടായിരിക്കുക. 50 എംപി പ്രൈമറി ക്യാമറ അടങ്ങുന്ന ട്രിപ്പിൾ റിയർ ക്യാമറ സെറ്റപ്പും 32 എംപി സെൽഫി ക്യാമറയും ഈ സ്മാർട്ട്ഫോണിൽ ഉണ്ടായിരിക്കുമെന്ന് റിപ്പോർട്ടുകൾ സൂചിപ്പിക്കുന്നു. റിയൽമി ജിടി 2 പ്രോ പുതിയ റെക്കോർഡുകളാണ് എൻടുടു ബെഞ്ച്മാർക്ക് പ്ലാറ്റ്‌ഫോമിൽ ഉണ്ടാക്കിയിരിക്കുന്നത്.

എൻടുടു ബെഞ്ച്മാർക്ക് വെബ്സൈറ്റിൽ ഒരു ദശലക്ഷത്തിലധികം പോയിന്റുകൾ നേടിയാണ് റിയൽമി ജിടി 2 പ്രോ ചരിത്രം സൃഷ്ടിച്ചിരിക്കുന്നത്. പുറത്ത് വന്ന വിവരങ്ങൾ അനുസരിച്ച് ഈ സ്മാർട്ട്ഫോണിന് ബെഞ്ച്മാർക്ക് വെബ്സൈറ്റിൽ 1025215 പോയിന്റുകളാണ് ലഭിച്ചത്. സ്‌നാപ്ഡ്രാഗൺ 888 എസ്ഒസിയുടെ കരുത്തിൽ പ്രവർത്തിക്കുന്ന സ്മാർട്ട്‌ഫോണുകളുമായി താരതമ്യപ്പെടുത്തുമ്പോൾ റിയൽമി ജിടി 2 പ്രോ കുറഞ്ഞത് 15 ശതമാനമെങ്കിലും വേഗതയുള്ളതായിരിക്കുമെന്നാണ് സൂചനകൾ.

സ്നാപ്ഡ്രാഗൺ 8 ജെൻ 1 മാത്രമല്ല, മീഡിയടെക് ഡൈമൻസിറ്റി 9000 എസ്ഒസിയുടെ കരുത്തിൽ പ്രവർത്തിക്കുന്ന പേര് വെളിപ്പെടുത്താത്ത ഒരു സ്മാർട്ട്‌ഫോണും എൻടുടു ബെഞ്ച്മാർക്കിൽ ഒരു ദശലക്ഷത്തിലധികം പോയിന്റുകൾ നേടിയിട്ടുണ്ട്. മീഡിയടെക് ഡൈമൻസിറ്റി 9000 എസ്ഒസിയുമായി താരതമ്യപ്പെടുത്തുമ്പോൾ സ്നാപ്ഡ്രാഗൺ 8 ജനറേഷൻ 1 അൽപ്പം മുന്നിലാണെന്നാണ് റിപ്പോർട്ടുകൾ നൽകുന്ന സൂചനകൾ. എന്നിരുന്നാലും ഈ രണ്ട് ചിപ്പ്സെറ്റുകളും തമ്മിൽ പെർഫോമൻസിൽ ഉണ്ടായിരിക്കാൻ ഇടയുള്ള വ്യത്യാസം വളരെ കുറവായിരിക്കും.

റിയൽമി ജിടി 2 പ്രോ Vs മോട്ടോ എഡ്ജ് എക്സ്30

സ്‌നാപ്ഡ്രാഗൺ 8 ജെൻ 1 ചിപ്പ് ഉള്ള ആദ്യ സ്‌മാർട്ട്‌ഫോൺ പുറത്തിറക്കാൻ റിയൽമിയും മോട്ടറോളയും തമ്മിൽ നടക്കുന്ന മത്സരം അവസാന ഘട്ടത്തിലാണ്. മോട്ടോറോള നാളെ ചൈനീസ് സമയം 7:30ന് ആയിരിക്കും മോട്ടോ എഡ്ജ് എക്സ്30 അവതരിപ്പിക്കുന്നത്. ഈ പുതിയ മോട്ടറോള ഫോണിന്റെ വിൽപ്പന ഡിസംബർ 15 മുതൽ ആരംഭിക്കും. റിയൽമി ജിടി 2 പ്രോയുടെ ലോഞ്ച് സമയം ഇതുവരെ വെളിപ്പെടുത്തിയിട്ടില്ല. എങ്കിലും ഷിപ്പിങ് വൈകില്ലെന്നാണ് സൂചനകൾ.