റിയൽ‌മി ജിടി 5ജി സ്മാർട്ട്ഫോണിന്റെ ലോഞ്ച് ഇന്ന് വൈകിട്ട്

ഇന്ന് ഇന്ത്യൻ സമയം വൈകുന്നേരം 5.30നാണ് റിയൽമിയുടെ ലോഞ്ച ഇവന്റ് നടക്കുന്നത്. റിയൽമി ജിടി 5ജി സ്മാർട്ട്ഫോൺ നേരത്തെ ചൈനീസ് വിപണിയിൽ അവതരിപ്പിച്ചിരുന്നു. ഈ ഡിവൈസ് തന്നെയാണ് ഇന്ന് നടക്കുന്ന ലോഞ്ച് ഇവന്റിന്റെ മുഖ്യ ആകർഷണ കേന്ദ്രം. ക്വാൽകോം സ്‌നാപ്ഡ്രാഗൺ 888 എസ്ഒസിയുടെ കരുത്തിൽ പ്രവർത്തിക്കുന്ന ഈ ഡിവൈസ് മാർച്ചിലാണ് ചൈനയിൽ ലോഞ്ച് ചെയ്തത്. ഈ ചിപ്പ്സെറ്റിൽ പ്രവർത്തിക്കുന്ന ഷവോമിയുടേത് അടക്കമുള്ള സ്മാർട്ട്ഫോണുകൾക്ക് റിയൽമി ജിടി വെല്ലിവിളി ഉയർത്തും.

യൂറോപ്പിൽ റിയൽ‌മി ജിടി 5ജി സ്മാർട്ട്ഫോണിന്റെ 12 ജിബി റാമുള്ള ടോപ്പ് മോഡലിന് 549 യൂറോ ആയിരിക്കും വില എന്നാണ് സൂചനകൾ. ഇത് വിലകുറഞ്ഞ ഫ്ലാഗ്ഷിപ്പ് ഫോണുകളിൽ ഒന്നായിരിക്കും. ചൈനയിൽ ഈ ഡിവൈസിന്റെ വില ആരംഭിക്കുന്നത് സിഎൻവൈ 2,799 മുതലാണ്. ഇത് ഇന്ത്യൻ കറൻസിയിൽ ഏകദേശം 31,500 രൂപയേളം വരും. മറ്റ് ഫ്ലാഗ്ഷിപ്പുകൾ നൽകുന്ന എല്ലാ സവിശേഷതകളും കുറഞ്ഞ വിലയിൽ ലഭ്യമാക്കുന്ന ഡിവൈസ് ആയിരിക്കും റിയൽമി ജിടി 5ജി.

റിയൽ‌മി ജിടി 5ജി: സവിശേഷതകൾ

മുകളിൽ സൂചിപ്പിച്ചത് പോലെ ക്വാൽകോം സ്‌നാപ്ഡ്രാഗൺ 888 പ്രോസസറിന്റെ കരുത്തിലാണ് റിയൽമി ജിടി 5ജി സ്മാർട്ട്ഫോൺ പ്രവർത്തിക്കുന്നത്. രണ്ട് സിം കാർഡ് സ്ലോട്ടുകളിലും 5ജി സപ്പോർട്ടുള്ള ഡിവൈസാണ് ഇത്. 6.43 ഇഞ്ച് ഫുൾ എച്ച്ഡി + സൂപ്പർ അമോലെഡ് ഡിസ്‌പ്ലേയാണ് സ്മാർട്ട്ഫോണിൽ ഉള്ളത്. ഈ ഡിസ്പ്ലെയ്ക്ക് 120 ഹെർട്സ് വരെ റിഫ്രഷ് റേറ്റും 360 ഹെർട്സ് ടച്ച് സാമ്പിൾ റേറ്റും ഉണ്ട്. ഡിസ്പ്ലേയിൽ തന്നെ ഫിംഗർപ്രിന്റ് സെൻസറും നൽകിയിട്ടുണ്ട്.

മൂന്ന് പിൻ ക്യാമറകളാണ് റിയൽമി ജിടി 5ജി സ്മാർട്ട്ഫോണിൽ നൽകിയിട്ടുള്ളത്. 64 മെഗാപിക്സൽ സെൻസർ, 8 മെഗാപിക്സൽ, 2 മെഗാപിക്സൽ സെൻസർ എന്നിവയാണ് ഈ ട്രിപ്പിൾ ക്യാമറ സെറ്റപ്പിലെ സെൻസറുകൾ. ഡിവൈസിൽ സെൽഫികൾക്കും വീഡിയോ കോളുകൾക്കുമായി മുകളിൽ ഇടത് കോണിലായി പഞ്ച്-ഹോളിനുള്ളിൽ 16 മെഗാപിക്സൽ ക്യാമറയും നൽകിയിട്ടുണ്ട്. 3.5 എംഎം ഹെഡ്‌ഫോൺ ജാക്കുള്ള ഡിവൈസിന് 186 ഗ്രാം ഭാരമാണ് ഉള്ളത്.

മൈക്രോ എസ്ഡി കാർഡ് സപ്പോർട്ടുള്ള റിയൽമി ജിടി 5ജി സ്മാർട്ട്ഫോണിൽ 12 ജിബി വരെ എൽപിഡിഡിആർ 5 റാമും 256 ജിബി യുഎഫ്എസ് 3.1 സ്റ്റോറേജും ഉണ്ട്. യുഎസ്ബി-സി പോർട്ടിലൂടെ 65W ഫാസ്റ്റ് ചാർജിങ് സപ്പോർട്ട് ചെയ്യുന്ന ഡിവൈസിൽ 4500 എംഎഎച്ച് ബാറ്ററിയാണ് നൽകിയിട്ടുള്ളത്. ആൻഡ്രോയിഡ് 11ലാണ് ഈ ഡിവൈസ് പ്രവർത്തിക്കുന്നത്.