റിയൽമി നാർസോ 30 സ്മാർട്ട്ഫോണിന് ഇന്ത്യയിൽ വില വർധിപ്പിച്ചു, പുതിയ വിലയും സവിശേഷതകളും

Published: Monday, August 16, 2021, 15:24 [IST]

റിയൽമി നാർസോ 30 സ്മാർട്ട്ഫോൺ ജൂൺ മാസത്തിലാണ് ഇന്ത്യയിൽ അവതരിപ്പിച്ചത്. ഈ ഹാൻഡ്‌സെറ്റ് 4ജി, 5ജി വേരിയന്റുകളിൽ ലഭ്യമാണ്. ഈ മാസം ആദ്യം കമ്പനി 4ജി മോഡലിൽ 6 ജി റാം + 64 ജിബി റോം വേരിയന്റ് അവതരിപ്പിച്ചിരുന്നു. വളരെ ചുരുങ്ങിയ കാലം കൊണ്ട് ജനപ്രീതി നേടിയ ഈ ഡിവൈസിന് ഇപ്പോൾ വില വർധിപ്പിച്ചിരിക്കുകയാണ് കമ്പനി. നാർസോ 30 സ്മാർട്ട്ഫോണിന്റെ മൂന്ന് വേരിയന്റുകൾക്കും 500 രൂപ വീതമാണ് വർധിപ്പിച്ചിരിക്കുന്നത്. പുതുക്കിയ വില ഇതിനകം ഫ്ലിപ്പ്കാർട്ടിലും റിയൽമിയുടെ ഔദ്യോഗിക സൈറ്റിലും അപ്ഡേറ്റ് ചെയ്തിട്ടുണ്ട്.

റിയൽ‌മി നാർസോ 30: പുതുക്കിയ വില

റിയൽ‌മി നാർസോ 30 സ്മാർട്ട്ഫോണിന്റെ ബേസ് വേരിയന്റിൽ 4 ജിബി റാമും 64 ജിബി റോമുമാണ് ഉള്ളത്. ഈ വേരിയന്റിന് നേരത്തെ 12,499 രൂപയായിരുന്നു വില, ഇപ്പോൾ ഈ മോഡലിന്റെ വില 12,999 രൂപയാണ്. 6 ജിബി റാം + 64 ജിബി സ്റ്റോറേജ് മോഡലിന് ഇപ്പോൾ 13,999 രൂപയാണ് വില. നേരത്തെ ഈ മോഡലിന് 13,499 രൂപയായിരുന്നു വില. ഹൈ-എൻഡ് മോഡലായ 6 ജിബി റാം + 128 ജിബി റോം വേരിയന്റിന് നേരത്തെ 14,499 രൂപയായിരുന്നു വില. ഇനി മുതൽ ഈ ഡിവൈസിന് 14,999 രൂപ നൽകണം. റേസിംഗ് സിൽവർ, റേസിംഗ് ബ്ലൂ എന്നീ രണ്ട് കളർ വേരിയന്റുകളിലാണ് ഈ ഡിവൈസ് ലഭ്യമാകുന്നത്.

റിയൽ‌മി നാർ‌സോ 30: സവിശേഷതകൾ

റിയൽ‌മി നാർ‌സോ 30 സ്മാർട്ട്ഫോണിൽ എഫ്എച്ച്ഡി+ റെസല്യൂഷനുള്ള 6.5 ഇഞ്ച് ഐപിഎസ് എൽസിഡി ഡിസ്പ്ലെയാണ് ഉള്ളത്. ഈ ഡിസ്പ്ലെയ്ക്ക് 90Hz റിഫ്രഷ് റേറ്റ്, 90.5 ശതമാനം സ്ക്രീൻ-ടു-ബോഡി റേഷിയോ എന്നിവ ഉണ്ട്. സെൽഫി ക്യാമറ സ്ഥാപിക്കാനായി ഒരു പഞ്ച്-ഹോൾ കട്ട്ഔട്ടും ഈ ഡിസ്പ്ലെയിൽ കമ്പനി നൽകിയിട്ടുണ്ട്. മീഡിയടെക് ഹീലിയോ ജി95 എസ്ഒസിയുടെ കരുത്തിലാണ് ഈ സ്മാർട്ട്ഫോൺ പ്രവർത്തിക്കുന്നത്. 6ജിബി വരെ റാമും 128 ജിബി വരെ സ്റ്റോറേജും ഡിവൈസിൽ ഉണ്ട്.

റിയൽ‌മി നാർ‌സോ 30 64ജിബി, 128ജിബി സ്റ്റോറേജ് ഓപ്ഷനുകളിൽ ലഭിക്കുന്നുവെങ്കിലും മൈക്രോ എസ്ഡി സ്ലോട്ട് വഴി ഈ ഡിവൈസിന്റെ സ്റ്റോറേജ് എക്സ്പാൻഡ് ചെയ്യാൻ കഴിയും. ആൻഡ്രോയ്ഡ് 11 ബേസ്ഡ് റിയൽമിയുഐയിൽ ആണ് ഈ ഡിവൈസ് പ്രവർത്തിക്കുന്നത്. 30W ഫാസ്റ്റ് ചാർജിങ് സപ്പോർട്ടുള്ള 5,000 എംഎഎച്ച് ബാറ്ററിയും സ്മാർട്ട്ഫോണിൽ നൽകിയിട്ടുണ്ട്. കണക്റ്റിവിറ്റി ഓപ്ഷനുകളായി 3.5 എംഎം ഹെഡ്‌ഫോൺ ജാക്ക്, ഡ്യുവൽ 4ജി വോൾട്ടി, 2.4/5 ജിഗാഹെർട്‌സ് വൈഫൈ 802.11 എ/ബി/ജി/എൻ/എസി, ബ്ലൂടൂത്ത് 5.0, എൻഎഫ്‌സി, ജിപിഎസ്/എ-ജിപിഎസ് എന്നിവയും ഡിവൈസിൽ ഉണ്ട്.

മൂന്ന് പിൻക്യാമറകളുമായിട്ടാണ് റിയൽമി നാർസോ 30 പുറത്തിറക്കിയിട്ടുള്ളത്. 48 എംപി പ്രൈമറി സെൻസർ, 2എംപി മാക്രോ സെൻസർ, 2എംപി ബ്ലാക്ക് ആന്റ് വൈറ്റ് സെൻസർ എന്നിവയാണ് ഈ ട്രിപ്പിൾ ക്യാമറ സെറ്റപ്പിലെ സെൻസറുകൾ. സെൽഫികൾക്കും വീഡിയോ കോളുകൾക്കുമായി 16 മെഗാപിക്സൽ ഫ്രണ്ട് ക്യാമറ സെൻസറും ഈ ഡിവൈസിൽ നൽകിയിട്ടുണ്ട്. വില വർധിപ്പിച്ചു എങ്കിലും നിങ്ങൾക്ക് സ്വന്തമാക്കാവുന്ന മികച്ചെരു ഡിവൈസ് തന്നെയാണ് ഇത്. കുറച്ച് കൂടി പണം ചിലവാക്കാൻ താല്പത്യം ഉള്ളവർക്ക് 15,999 രൂപയ്ക്ക് നാർസോ 30 5ജി സ്മാർട്ട്ഫോൺ വാങ്ങുന്നതാവും നല്ലത്.