14,999 രൂപയ്ക്ക് റിയൽ‌മി നാർ‌സോ 20 പ്രോ സ്മാർട്ട്ഫോൺ സ്വന്തമാക്കാം, വിൽപ്പന ഇന്ന് ഉച്ചയ്ക്ക്

Published: Thursday, October 1, 2020, 20:58 [IST]

റിയൽമി നാർസോ 20 പ്രോ സ്മാർട്ട്ഫോണിന്റെ രണ്ടാമത്തെ വിൽപ്പന ഇന്ന് ഉച്ചയ്ക്ക് 12 മണിക്ക് നടക്കും. സെപ്റ്റംബർ 25നാണ് ഡിവൈസിന്റെ ആദ്യ വിൽപ്പന നടന്നത്. റിയൽ‌മി നാർ‌സോ 20എ, റിയൽ‌മി നാർ‌സോ 20 എന്നീ സ്മാർട്ട്ഫോണുകൾക്കൊപ്പമാണ് ഈ സ്മാർട്ട്ഫോൺ ഇന്ത്യൻ വിപണിയിൽ അവതരിപ്പിച്ചത്. ഒക്ടാ കോർ മീഡിയടെക് ഹെലിയോ ജി 95 എസ്ഒസി, ക്വാഡ് റിയർ ക്യാമറ സെറ്റപ്പ് എന്നീ സവിശേഷതകളുള്ള ഈ സ്മാർട്ട്ഫോൺ രണ്ട് സ്റ്റോറേജ് കോൺഫിഗറേഷനുകളിലും രണ്ട് കളർ ഓപ്ഷനുകളിലും ലഭ്യമാകും.

റിയൽമി നാർസോ 20 പ്രോ: വിലയും ലഭ്യതയും

റിയൽ‌മി നാർ‌സോ 20 പ്രോ സ്മാർട്ട്ഫോൺ മുകളിൽ സൂചിപ്പിച്ചതുപോലെ രണ്ട് സ്റ്റോറേജ് വേരിയന്റുകളിൽ ലഭ്യമാണ്. ബേസ് വേരിയന്റിൽ 6 ജിബി റാമും 64 ജിബി സ്റ്റോറേജുമാണ് ഉള്ളത്. ഈ വേരിയന്റിന് 14,999 രൂപയാണ് വില. നാർസോ 20 പ്രോ സ്മാർട്ട്ഫോണിന്റെ 8 ജിബി റാമും 128 ജിബി സ്റ്റോറേജുമുള്ള വേരിയന്റിന് 16,999 രൂപയാണ് വില. ഈ ഡിവൈസ് ബ്ലാക്ക് നിൻജ, വൈറ്റ് നൈറ്റ് എന്നീ നിറങ്ങളിൽ ലഭ്യമാകും. ഇന്ന് ഉച്ചയ്ക്ക് 12 മണി മുതലാണ് ഈ സ്മാർട്ട്ഫോണിന്റെ ഫ്ലാഷ് സെയിൽ നടക്കുന്നത്.

റിയൽ‌മി നാർ‌സോ 20 പ്രോ: സവിശേഷതകൾ‌

രണ്ട് നാനോ സിം കാർഡ് സ്ലോട്ടുകളുമായിട്ടാണ് റിയൽ‌മി നാർസോ 20 പ്രോ പുറത്തിറക്കിയിട്ടുള്ളത്. ആൻഡ്രോയിഡ് 10 ബേസ്ഡ് റിയൽമി യുഐയിലാണ് സ്മാർട്ട്ഫോൺ പ്രവർത്തിക്കുന്നത്. 6.5 ഇഞ്ച് ഫുൾ എച്ച്ഡി + (1,080x2,400 പിക്‌സൽ) അൾട്രാ സ്മൂത്ത് ഡിസ്‌പ്ലേയാണ് ഈ സ്മാർട്ട്ഫോണിൽ ഉള്ളത്. 90 ഹെർട്സ് റിഫ്രഷ് റേറ്റും 20: 9 അസ്പാക്ട് റേഷിയോവുമുള്ള ഈ ഡിസ്പ്ലെയ്ക്ക് കോർണിംഗ് ഗോറില്ല ഗ്ലാസ് പ്രോട്ടക്ഷനും ഉണ്ട്. ഡിസ്പ്ലേയിൽ 120 ഹെർട്സ് ടച്ച് സാമ്പിൾ റേറ്റും 480 നിറ്റ് പീക്ക് ബ്രൈറ്റ്നസും ഉണ്ട്.

8 ജിബി വരെ എൽപിഡിഡിആർ 4 എക്സ് റാമുമായി ജോടിയാക്കിയ മീഡിയടെക് ഹീലിയോ ജി95 എസ്ഒസിയുടെ കരുത്തിലാണ് റിയൽമി നാർസോ 20 പ്രോ സ്മാർട്ട്ഫോൺ പ്രവർത്തിക്കുന്നത്. മൈക്രോ എസ്ഡി കാർഡ് വഴി സ്ലോട്ട് വഴി 256 ജിബി വരെ സ്റ്റോറേജ് എക്സ്പാൻഡ് ചെയ്യാനുള്ള സംവിധാനവും ഈ ഡിവൈസിലുണ്ട്. 128 ജിബി വരെ യു‌എഫ്‌എസ് 2.1 ഓൺ‌ബോർഡ് സ്റ്റോറേജാണ് സ്മാർട്ട്ഫോണിൽ ഉള്ളത്.

റിയൽമി നാർസോ 20 പ്രോ സ്മാർട്ട്ഫോണിൽ ക്വാഡ് റിയർ ക്യാമറ സെറ്റപ്പാണ് നൽകിയിട്ടുള്ളത്. ഇതിൽ എഫ് / 1.8 ലെൻസുള്ള 48 മെഗാപിക്സൽ പ്രൈമറി സെൻസർ, 119 -ഡീഗ്രി ഫീൽഡ് വ്യൂ ഉള്ള എഫ് / 2.3 അൾട്രാ വൈഡ് ആംഗിൾ ലെൻസോട് കൂടിയ 8 മെഗാപിക്സൽ സെക്കൻഡറി സെൻസർ, എഫ് / 2.4 ലെൻസുള്ള 2 മെഗാപിക്സൽ മോണോക്രോം സെൻസർ, എഫ് / 2.4 മാക്രോ ലെൻസുള്ള 2 മെഗാപിക്സൽ സെൻസർ എന്നിവയാണ് ഉള്ളത്. എഫ് / 2.1 ലെൻസുള്ള 16 മെഗാപിക്സൽ സോണി ഐഎംഎക്സ് 471 സെൻസറാണ് സെൽഫി ക്യാമറയായി നൽകിയിട്ടുള്ളത്.

റിയൽമി നാർസോ 20 പ്രോ സ്മാർട്ട്ഫോണിൽ കണക്റ്റിവിറ്റി ഓപ്ഷനുകളായി 4 ജി വോൾട്ടി, Wi-Fi 802.11ac, ബ്ലൂടൂത്ത് 5.0, ജിപിഎസ് / എ-ജിപിഎസ്, യുഎസ്ബി ടൈപ്പ്-സി പോർട്ട് എന്നിവ നൽകിയിട്ടുണ്ട്. വലത് വശത്ത് ഫിംഗർപ്രിന്റ് സ്കാനറും റിയൽമി നൽകിയിട്ടുണ്ട്. 65W സൂപ്പർഡാർട്ട് ചാർജ് ഫാസ്റ്റ് ചാർജിങ് സപ്പോർട്ട് ചെയ്യുന്ന 4,500 എംഎഎച്ച് ബാറ്ററിയാണ് ഈ സ്മാർട്ട്ഫോണിൽ ഉള്ളത്.