റിയൽ‌മി എക്സ്7 മാക്സ് 5ജി, റിയൽ‌മി സ്മാർട്ട് ടിവി 4കെ എന്നിവ ഇന്ന് ഇന്ത്യൻ വിപണിയിലെത്തും

റിയൽ‌മി എക്സ്7 മാക്സ് 5ജി ലോഞ്ച് ഇന്ന് ഉച്ചയ്ക്കാണ് നടക്കുന്നത്. കൊവിഡ്-19 പാൻഡെമിക്കിന്റെ രണ്ടാം തരംഗം കാരണം ഓൺലൈനായിട്ടാണ് ഈ ലോഞ്ച് നടക്കുന്നത്. കമ്പനിയുടെ ഔദ്യോഗിക യൂട്യൂബ് ചാനൽ, ഫേസ്ബുക്ക് പേജ് എന്നിവ വഴി ഇത് ലൈവായി സംപ്രേഷണം ചെയ്യും. റിയൽമിയുടെ രണ്ട് സ്മാർട്ട് ടിവികളാണ് ഈ ലോഞ്ച് ഇവന്റിന്റെ മറ്റൊരു ശ്രദ്ധാകേന്ദ്രം. സ്മാർട്ട്ഫോൺ വിപണിയിൽ ശക്തമായ സാന്നിധ്യമാകാൻ ഇന്നത്തെ ലോഞ്ച് ഇവന്റിലൂടെ റിയൽമിക്ക് സാധിക്കും.

റിയൽ‌മി എക്സ്7 മാക്സ് 5ജി: സവിശേഷതകൾ

റിയൽ‌മിയുടെ പുതിയ 5ജി സ്മാർട്ട്ഫോണിന്റെ നിരവധി പ്രധാന സവിശേഷതകൾ ഇതിനകം തന്നെ വ്യക്തമാണ്. 1,000 എൻ‌ടി പീക്ക് ബ്രൈറ്റ്നസും 100 ശതമാനം ഡിസിഐ-പി 3 വൈഡ് കളർ ഗാമറ്റും ഉള്ള ഫുൾ എച്ച്ഡി + സൂപ്പർ അമോലെഡ് ഡിസ്‌പ്ലേയാണ് ഈ ഡിവൈസിൽ ഉണ്ടായിരിക്കുക എന്ന് കമ്പനി വെളിപ്പെടുത്തിയിരുന്നു. 120 ഹെർട്സ് റിഫ്രഷ് റേറ്റും 360 ഹെർട്സ് ടച്ച് സാമ്പിൾ റേറ്റും ഈ ഡിവൈസിൽ ഉണ്ടായിരിക്കും. മീഡിയടെക് ഡൈമെൻസിറ്റി 1200 എസ്ഒസിയാണ് ഈ ഡിവൈസിന് കരുത്ത് നൽകുകയെന്നും കമ്പനി വെളിപ്പെടുത്തി.

മൂന്ന് കളർ ഓപ്ഷനുകളിലായിരിക്കും റിയൽമി എക്സ്7 മാക്സ് 5ജി സ്മാർട്ട്ഫോൺ പുറത്തിറങ്ങുന്നത്. 179 ഗ്രാം ഭാരമുള്ള ഈ ഡിവൈസിൽ 64 മെഗാപിക്സൽ സോണി ഐഎംഎക്സ് 682 പ്രൈമറി സെൻസർ, 8 മെഗാപിക്സൽ അൾട്രാ വൈഡ് ആംഗിൾ സെൻസർ, 2 മെഗാപിക്സൽ മാക്രോ ലെൻസ് എന്നിവ ഉൾപ്പെടുന്ന ട്രിപ്പിൾ റിയർ ക്യാമറ സെറ്റപ്പും ഉണ്ടായിരിക്കും. 50W സൂപ്പർഡാർട്ട് ഫാസ്റ്റ് ചാർജിങ് സപ്പോർട്ടുള്ള റിയൽ‌മി എക്സ്7 മാക്സ് 5ജി സ്മാർട്ട്ഫോൺ വെറും 16 മിനിറ്റിനുള്ളിൽ 0 മുതൽ 50 വരെ ചാർജ് ചെയ്യാൻ കഴിയുമെന്ന് കമ്പനി അവകാശപ്പെടുന്നു.

റിയൽ‌മി എക്സ്7 മാക്സ് 5ജി: വില

അടുത്തിടെ ഒരു ടിപ്‌സ്റ്റർ പുറത്ത് വിട്ട റീട്ടെയിൽ ബോക്‌സ് വിവരങ്ങളിൽ റിയൽമി എക്സ്7 മാക്സ് സ്മാർട്ട്ഫോണിന്റെ വില സംബന്ധിച്ച വിവരങ്ങൾ ഉണ്ടായിരുന്നു. ഈ ഡിവൈസിന്റെ ഹൈ-എൻഡ് 12 ജിബി + 256 ജിബി മോഡലിന് 31,999 രൂപയോ 32,999 രൂപയോ ആയിരിക്കും വില. അടിസ്ഥാന മോഡലായ 8 ജിബി + 128 ജി മോഡലിന് 28,999 രൂപയോ 29,999 രൂപയോ ആയിരിക്കും വില. അതേസമയം മറ്റൊരു റിപ്പോർട്ടിൽ റിയൽ‌മി എക്സ് 7 മാക്സ് 27,999 രൂപ മുതലുള്ള വിലയിൽ ലഭ്യമാകുമെന്നും ഡിവൈസിന്റെ ഹൈ എൻഡ് വേരിയന്റിന് 30,999 രൂപയായിരിക്കും വില എന്നുമാണ് വ്യക്തമാക്കിയിരിക്കുന്നത്. ഇക്കാര്യത്തിൽ ഇന്ന് വ്യക്തത വരും.