റിയൽമി എക്സ്7 സീരിസ് അടുത്ത വർഷം ആദ്യം ഇന്ത്യൻ വിപണിയിലെത്തും

കുറച്ച് ആഴ്ച്ചകളായി റിയൽമി എക്സ്7 സ്മാർട്ട്ഫോൺ ലോഞ്ചുമായി ബന്ധപ്പെട്ട നിരവധി റിപ്പോർട്ടുകൾ പുറത്ത് വന്നിരുന്നു. ഈ സ്മാർട്ട്ഫോൺ സീരിസിൽ രണ്ട് ഡിവൈസുകളാണ് ഉണ്ടാവുക. റിയൽ‌മി എക്സ്7, റിയൽ‌മി എക്സ്7 പ്രോ എന്നീ സ്മാർട്ട്ഫോണുകളാണ് സീരിസിലുള്ളത്. രണ്ട് ഫോണുകളും വില കുറഞ്ഞ 5ജി സ്മാർട്ട്‌ഫോണുകളായി ഈ വർഷം ആദ്യം ചൈനീസ് വിപണിയിൽ അവതരിപ്പിച്ചിരുന്നു. ഈ രണ്ട് ഫോണുകളിലൂടെ 2021ൽ 5ജി സാങ്കേതികവിദ്യ കൂടുതൽ ജനാധിപത്യവത്കരിക്കാനാണ് കമ്പനി ശ്രമിക്കുന്നതെന്ന് ഷെത്ത് ട്വീറ്റിൽ കുറിച്ചു.

റിയൽമി എക്സ്7 സീരീസിലെ രണ്ട് ഫോണുകളാണ് ചൈനയിൽ അവതരിപ്പിച്ചത് എങ്കിലും ഇന്ത്യയിൽ ഈ സീരിസിൽ മൂന്ന് ഡിവൈസുകളെങ്കിലും പുറത്തിറങ്ങുമെന്നാണ് റിപ്പോർട്ടുകൾ. സെപ്റ്റംബറിൽ, RMX2173 മോഡൽ നമ്പറുള്ള ഡിവൈസ് ടെന്ന ലിസ്റ്റിങിൽ കണ്ടെത്തിയിരുന്നു. ഈ ഡിവൈസ് റിയൽ‌മി എക്സ് 7 ലൈറ്റ് ആയിരിക്കുമെന്നാണ് റിപ്പോർട്ടുകൾ. റിയൽ‌മി എക്സ്7 ന്റെ ടോൺ-ഡൌൺ വേർഷനായിരിക്കും ഇതെന്ന് ലിസ്റ്റിങിൽ നിന്നും വ്യക്തമാകുന്നു.

റിയൽ‌മി എക്സ്7 പ്രോ

റിയൽ‌മി എക്സ്7, എക്സ് 7 പ്രോ എന്നിവ കരുത്തുള്ള ഡിവൈസുകളാണ്. ഇതിൽ എക്സ്7 പ്രോ കൂടുതൽ ശക്തമാണ്. 6.55 ഇഞ്ച് സൂപ്പർ-അമോലെഡ് 1080p ഡിസ്പ്ലേയാണ് ഡിവൈസിൽ ഉള്ളത്. 120 ഹെർട്സ് റിഫ്രഷ് റേറ്റ്, 240 ഹെർട്സ് ടച്ച് സാമ്പിൾ റേറ്റ്, 20: 9 അസ്പാക്ട് റേഷിയോ എന്നീ സവിശേഷതകളും ഈ ഡിസ്പ്ലെയിൽ ഉണ്ട്. ഡൈമെൻസിറ്റി 1000+ പ്രോസസറാണ് ഡിവൈസിന് കരുത്ത് നൽകുന്നത്. മൈക്രോ എസ്ഡി കാർഡ് സ്ലോട്ടുവഴി സ്റ്റോറേജ് എക്സ്പാൻഡ് ചെയ്യാനുള്ള സംവിധാനവും ഈ സ്മാർട്ട്ഫോണിൽ ഉണ്ട്. 8 ജിബി റാമും 256 ജിബി സ്റ്റോറേജും ഡിവൈസിൽ ഉണ്ട്.

64 മെഗാപിക്സൽ സോണി ഐഎംഎക്സ് 686 പ്രൈമറി സെൻസർ, 119 ഡിഗ്രി അൾട്രാവൈഡ് 8 മെഗാപിക്സൽ സെൻസർ, 2 മെഗാപിക്സൽ പോർട്രെയിറ്റ് സെൻസർ, 2 മെഗാപിക്സൽ മാക്രോ സെൻസർ എന്നിവയാണ് റിയൽമി എക്സ് 7 പ്രോയിലെ ക്യാമറകൾ. ഈ സ്മാർട്ട്ഫോണിൽ സെൽഫികൾക്കും വീഡിയോ കോളുകൾക്കുമായി 32 മെഗാപിക്സൽ ക്യാമറയും കമ്പനി നൽകിയിട്ടുണ്ട്. 4500 എംഎഎച്ച് ബാറ്ററിയാണ് ഡിവൈസിൽ ഉള്ളത്.

റിയൽമി എക്സ്7 സ്മാർട്ട്‌ഫോണിന് കരുത്ത് നൽകന്നത് മീഡിയടെക് ഡൈമെൻസിറ്റി 800 യു പ്രോസസറാണ്. 8 ജിബി വരെ റാമും 128 ജിബി യുഎഫ്എസ് 2.1 സ്റ്റോറേജുമുള്ള ഡിവൈസിൽ 4300 എംഎഎച്ച് ബാറ്ററിയാണ് ഉള്ളത്. 6.4 ഇഞ്ച് അമോലെഡ് 1080p ഡിസ്‌പ്ലേയും എക്സ്7ൽ ഉണ്ട്. ഈ ഡിസ്പ്ലെയ്ക്ക് 120 ഹെർട്സ് വരെ റിഫ്രഷ് റേറ്റും 180 ഹെർട്സ് ടച്ച് സാമ്പിൾ റേറ്റും ഉണ്ട്. 64 മെഗാപിക്സൽ പ്രൈമറി ക്യാമറ, 119 ഡിഗ്രി എഫ്ഒവി ഉള്ള 8 മെഗാപിക്സൽ അൾട്രാവൈഡ് ക്യാമറ, 2 മെഗാപിക്സൽ ബ്ലാക്ക് ആൻഡ് വൈറ്റ് ക്യാമറ, 2 മെഗാപിക്സൽ മാക്രോ ക്യാമറ എന്നീ ക്യാമറകളാണ് ഡിവൈസിൽ ഉള്ളത്. സെൽഫികൾക്കായി 32 എംപി ക്യാമറയാണ് ഉള്ളത്.