റെഡ്മി 9 സ്മാർട്ട്ഫോൺ ഇന്ത്യൻ വിപണിയിലെത്തി; വിലയും സവിശേഷതകളും

മലേഷ്യൻ വിപണിയിൽ ഷവോമി നേരത്തെ പുറത്തിറക്കിയ റെഡ്മി 9സി എന്ന ഡിവൈസിൽ ചെറിയ മാറ്റങ്ങൾ വരുത്തിയാണ് ഇന്ത്യൻ വിപണിയിൽ റെഡ്മി 9 ആയി അവതരിപ്പിച്ചിട്ടുള്ളത്. നേരത്തെ പല വിപണികളിലും റെഡ്മി 9 സ്മാർട്ട്ഫോൺ പുറത്തിറങ്ങിയിരുന്നുവെങ്കിലും ഇതിൽ നിന്നും വ്യത്യസ്തമായ ഡിവൈസാണ് ഇന്ത്യയിലേത്. മറ്റ് പല വിപണികളിലും പുറത്തിറങ്ങിയ റെഡ്മി 9 സ്മാർട്ട്ഫോൺ ഇന്ത്യയിൽ റെഡ്മി 9 പ്രൈം എന്ന പേരിൽ നേരത്തെ അവതരിപ്പിച്ചിരുന്നു.

റെഡ്മി 9; വിലയും ലഭ്യതയും

രണ്ട് വേരിയന്റുകളിലാണ് റെഡ്മി 9 സ്മാർട്ട്ഫോൺ ലഭ്യമാവുക. ഡിവൈസിന്റെ ബേസ് വേരിയന്റിൽ 4 ജിബി റാമും 64 ജിബി സ്റ്റോറേജുമാണ് ഉള്ളത്. ഈ ഡിവൈസിന് 8,999 രൂപയാണ് വില. രണ്ടാമത്തെ വേരിയന്റിൽ 4 ജിബി റാമും 128 ജിബി സ്റ്റോറേജുമാണ് ഉള്ളത്. ഇതിന് 9,999 രൂപയാണ് വില. ഈ രണ്ട് വേരിയന്റുകളും കാർബൺ ബ്ലാക്ക്, സ്കൈ ബ്ലൂ, സ്പോർട്ടി ഓറഞ്ച് എന്നിങ്ങനെ മൂന്ന് കളർ ഓപ്ഷനുകളിൽ ലഭ്യമാണ്. ഓഗസ്റ്റ് 31 മുതൽ എംഐ.കോം, മറ്റ് പാർട്ട്ണർ വെബ്‌സൈറ്റുകൾ എന്നിവ വഴി ഈ ഡിവൈസുകൾ വിൽപ്പനയ്ക്ക് എത്തും.

റെഡ്മി 9: സവിശേഷതകൾ

6.53 ഇഞ്ച് എച്ച്ഡി + റെസല്യൂഷനുള്ള ഡിസ്‌പ്ലേയാണ് റെഡ്മി 9 സ്മാർട്ട്ഫോണിൽ ഉള്ളത്. ഈ ഡിവൈസിൽ 4 ജിബി റാമും 128 ജിബി വരെ സ്റ്റോറേജും ഉണ്ട്. ബജറ്റ് സെഗ്‌മെന്റിലെ ഏറ്റവും ശക്തമായ ചിപ്‌സെറ്റായ ഹീലിയോ ജി 35 SoCയുടെ കരുത്തിലാണ് റെഡ്മി 9 സ്മാർട്ട്ഫോൺ പ്രവർത്തിക്കുന്നത്. 13 മെഗാപിക്സൽ പ്രൈമറ ക്യാമറയും 2 മെഗാപിക്സൽ ഡെപ്ത് ക്യാമറയുമുള്ള ഡ്യുവൽ റിയർ ക്യാമറ സെറ്റപ്പാണ് ഡിവൈസിലുള്ളത്. സെൽഫികൾക്കും വീഡിയോ കോളിങ്ങിനുമായി എഫ് / 2.2 അപ്പേർച്ചറുള്ള 5 മെഗാപിക്സൽ ഫ്രണ്ട് ക്യാമറയും കമ്പനി നൽകിയിട്ടുണ്ട്.

5000 എംഎഎച്ച് ബാറ്ററിയാണ് റെഡ്മി 9 സ്മാർട്ട്ഫോണിന്റെ ഏറ്റവും വലിയ സവിശേഷത. ഈ ബാറ്ററി ഒരു ചാർജിൽ കുറഞ്ഞത് ഒരു ദിവസമെങ്കിലും ഫോൺ പ്രവർത്തിപ്പിക്കുമെന്നാണ് കമ്പനി അവകാശപ്പെടുന്നത്. ഇതിനൊപ്പം 10 വാൾട്ട് ഫാസ്റ്റ് ചാർജിങ് സപ്പോർട്ടും കമ്പനി നൽകിയിട്ടുണ്ട്. കമ്പനിയുടെ ഏറ്റവും പുതിയ സോഫ്റ്റ്വെയറായ MIUI 12ലാണ് ഈ ഡിവൈസ് പ്രവർത്തിക്കുന്നത്. സ്പ്ലാഷ് പ്രൂഫിനായി റെഡ്മി 9 സ്മാർട്ട്ഫോണിൽ പി 2 ഐ കോട്ടിങും നൽകിയിട്ടുണ്ട്.

കണക്റ്റിവിറ്റി ഓപ്ഷനുകളായി റെഡ്മി 9ൽ 4 ജി എൽടിഇ, വൈ-ഫൈ, ബ്ലൂടൂത്ത് വി 5.0, ജിപിഎസ് / എ-ജിപിഎസ്, മൈക്രോ-യുഎസ്ബി, 3.5 എംഎം ഹെഡ്‌ഫോൺ ജാക്ക് എന്നിവയാണ് ഉള്ളത്. സുരക്ഷയ്ക്കായി ഡിവൈസിന്റെ പിൻവശത്ത് ഫിംഗർപ്രിന്റ് സെൻസറും നൽകിയിട്ടുണ്ട്. റെഡ്മി 9 ഗ്ലോബൽ വേരിയൻറ് കഴിഞ്ഞ ജൂണിൽ സ്പെയിനിലാണ് പുറത്തിറക്കിയത്. ഈ ഡിവൈസ് സ്പാനിഷ് വിപണിയിൽ 149 യൂറോ (ഏകദേശം 13,000 രൂപ) എന്ന വിലയ്ക്കാണ് വിൽപ്പന നടത്തുന്നത്.