ആധിപത്യം തുടരാൻ റെഡ്മിയുടെ വജ്രായുധങ്ങൾ, റെഡ്മി 10എ, റെഡ്മി 10 പവർ എന്നിവ ഇന്ത്യയിലെത്തി

റെഡ്മി 10എ, റെഡ്മി 10 പവർ: വിലയും ലഭ്യതയും

റെഡ്മി 10എ സ്മാർട്ട്ഫോണിന്റെ 3 ജിബി റാമും 32 ജിബി സ്റ്റോറേജുമുള്ള വേരിയന്റിന് 8999 രൂപയാണ് വില ഫോണിന്റെ 4 ജിബി റാമും 64 ജിബി സ്റ്റോറേജുമുള്ള വേരിയന്റിന് 9499 രൂപ വിലയുണ്ട്. സ്മാർട്ട്‌ഫോൺ ഏപ്രിൽ 26ന് ആമസോണിലൂടെ വിൽപ്പനയ്‌ക്കെത്തും. ബ്ലൂ, ബ്ലാക്ക്, ഗ്രേ കളർ ഓപ്ഷനുകളിൽ ഈ ഡിവൈസ് ലഭ്യമാകും. റെഡ്മി 10 പവർ സ്മാർട്ട്ഫോൺ 8 ജിബി+128 ജിബി വേരിയന്റിലാണ് അവതരിപ്പിച്ചത്. ഈ ഫോണിന് 14,999 രൂപയാണ് വില. റെഡ്മി 10 പവറിന്റെ ആദ്യ വിൽപ്പന തിയ്യതി കമ്പനി ഇതുവരെ പ്രഖ്യാപിച്ചിട്ടില്ല.

റെഡ്മി 10എ: സവിശേഷതകൾ

റെഡ്മി 10എ സ്മാർട്ട്ഫോണിൽ 720×1600 പിക്സൽ റെസല്യൂഷനും 20:9 അസ്പാക്ട് റേഷിയോവും ഉള്ള 6.53 ഇഞ്ച് എച്ച്ഡി+ എൽസിഡി ഡിസ്പ്ലേയാണ് കമ്പനി നൽകിയിട്ടുള്ളത്. ബജറ്റ് സെഗ്മെന്റിൽ വച്ച് മികച്ച ഡിസ്പ്ലെ തന്നെയാണ് ഇത്. മീഡിയടെക് ഹെലിയോ ജി25 ഒക്ടാ കോർ പ്രോസസറാണ് റെഡ്മി 10എ സ്മാർട്ട്ഫോണിന് കരുത്ത് നൽകുന്നത്. 4 ജിബി വരെ റാമും 64 ജിബി വരെ ഇന്റേണൽ സ്റ്റോറേജും ഈ ഡിവൈസിൽ കമ്പനി നൽകിയിട്ടുണ്ട്. റാം എക്സ്റ്റന്റ് ഫീച്ചറും ഈ ഡിവൈസിലുണ്ട്. സ്റ്റോറേജ് തികയാത്ത ആളുകൾക്ക് മൈക്രോ എസ്ഡി കാർഡ് സ്ലോട്ട് വഴി സ്റ്റോറേജും എക്സ്പാൻഡ് ചെയ്യാം.

റെഡ്മി 10എ സ്മാർട്ട്ഫോണിൽ 13 മെഗാപിക്സൽ ക്യാമറയാണ് നൽകിയിട്ടുള്ളത്. എൻട്രിലെവൽ ഡിവൈസ് ആയതിനാലാണ് ഈ ഒരു ക്യാമറ മാത്രം നൽകിയിരിക്കുന്നത്. ഇതിനെപ്പം എൽഇഡി ഫ്ലാഷും ഉണ്ട്. സെൽഫികൾക്കും വീഡിയോ കോളുകൾക്കുമായി മുൻവശത്ത് 5 മെഗാപിക്സൽ ക്യാമറയാണ് ഉള്ളത്. നൈറ്റ് മോഡ്, പ്രോ മോഡ്, ടൈം-ലാപ്‌സ് പോർട്രെയിറ്റ് മോഡ്, എച്ച്ഡിആർ കൺട്രോൾ എന്നിവയുൾപ്പെടെ വിവിധ മോഡുകൾ സപ്പോർട്ട് ചെയ്യുന്ന ക്യാമറ മൊഡ്യൂളാണ് ഇത്.

10W ചാർജിങ് സപ്പോർട്ടുള്ള 5,000mAh ബാറ്ററിയാണ് റെഡ്മി 10എ ഫോണിലുള്ളത്. ഈ ഡിവൈസിന് പിന്നിൽ ഫിംഗർപ്രിന്റ് സെൻസറും നൽകിയിട്ടുണ്ട്. 3.5 എംഎം ഓഡിയോ ജാക്ക്, 4ജി എൽടിഇ, വൈഫൈ, ബ്ലൂടൂത്ത് 5.0, മൈക്രോ യുഎസ്ബി പോർട്ട്, ജിപിഎസ് തുടങ്ങിയ കണക്റ്റിവിറ്റി ഫീച്ചറുകളും ഈ ഡിവൈസിൽ റെഡ്മി നൽകിയിട്ടുണ്ട്. ആൻഡ്രോയിഡ് 11 ബേസ്ഡ് എംഐയുഐ 12.5ലാണ് റെഡ്മി 10എ പ്രവർത്തിക്കുന്നത്. റെഡ്മി 10എയ്ക്ക് മികച്ച ഗ്ലാസ് പ്രോട്ടക്ഷൻ, റബ്ബറൈസ്ഡ് സീലുകൾ, കോറഷൻ പ്രൂഫ് പോർട്ടുകൾ എന്നിവയുണ്ടെന്ന് കമ്പനി അവകാശപ്പെടുന്നു.

റെഡ്മി 10 പവർ: സവിശേഷതകൾ

റെഡ്മി 10 എയുടെ അതേ ഡിസൈനാണ് റെഡ്മി 10 പവറിനുള്ളത്. എച്ച്‌ഡി+ റെസല്യൂഷനോടുകൂടിയ 6.7 ഇഞ്ച് എൽസിഡി ഡിസ്‌പ്ലേയും ഫോണിലുണ്ട്. 400 നിറ്റ് ബ്രൈറ്റ്നസ്, വാട്ടർഡ്രോപ്പ് നോച്ച് എന്നിവയാണ് ഈ ഡിസ്പ്ലെയുടെ സവിശേഷതൾ. 8 ജിബി റാമും 128 ജിബി ഓൺബോർഡ് സ്റ്റോറേജുമുള്ള ഡിവൈസിന് കരുത്ത് നൽകുന്നത് ക്വാൽകോം സ്‌നാപ്ഡ്രാഗൺ 680 പ്രൊസസറാണ്. 3 ജിബി റാം വരെ അധികമായി വിപുലീകരിക്കാനുള്ള സാങ്കേതികവിദ്യയും സ്റ്റോറേജിനായി പ്രത്യേകം മൈക്രോ എസ്ഡി കാർഡ് സ്ലോട്ടും ഡിവൈസിൽ ഉണ്ട്.

രണ്ട് പിൻ ക്യാമറകളാണ് റെഡ്മി 10 പവറിൽ ഉള്ളത്. 50 എംപി പ്രൈമറി സെൻസറും 2 എംപി പോർട്രെയിറ്റ് ലെൻസുമടങ്ങുന്നതാണ് ഈ ഡ്യൂവൽ റിയർ ക്യാമറ സെറ്റപ്പ്. സെൽഫികൾക്കും വീഡിയോ കോളുകൾക്കുമായി 5 എംപി ഫ്രണ്ട് സെൽഫി ക്യാമറയും ഈ ഡിവൈസിൽ ഉണ്ട്. റെഡ്മി 10 പവറിൽ 18W ഫാസ്റ്റ് ചാർജിങ് സപ്പോർട്ടുള്ള 6,000mAh ബാറ്ററി യൂണിറ്റാണ് ഉള്ളത്. ആൻഡ്രോയിഡ് ബേസ്ഡ് എംഐയുഐ 13ൽ ഈ ഡിവൈസ് പ്രവർത്തിക്കുന്നു.